ನವದೆಹಲಿ: ಐಪಿಎಲ್ ಮುಂದೂಡಲ್ಪಟ್ಟಿದ್ದರಿಂದ ಮನೆಗೆ ಮರಳಿರುವ ಭಾರತ ತಂಡದ ಹಿರಿಯ ಕ್ರಿಕೆಟಿಗ ಶಿಖರ್ ಧವನ್ ಗುರುವಾರ ಮೊದಲ ಡೋಸ್ ಕೋವಿಡ್ 19 ವ್ಯಾಕ್ಸಿನ್ ಸ್ವೀಕರಿಸಿದ್ದಾರೆ.
35 ವರ್ಷದ ಬ್ಯಾಟ್ಸ್ಮನ್ ಐಪಿಎಲ್ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಭಾಗವಾಗಿದ್ದರು. ಚೊಚ್ಚಲ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿದ್ದ ತಂಡ ಈ ಆವೃತ್ತಿಯಲ್ಲಿ ಆಡಿದ 8 ಪಂದ್ಯಗಳಲ್ಲಿ 6 ರಲ್ಲಿ ಗೆಲುವು ಸಾಧಿಸಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿತ್ತು. ದುರಾದೃಷ್ಟವಶಾತ್ ಬಯೋಬಬಲ್ ಬ್ರೇಕ್ನಿಂದ ಟೂರ್ನಿ ತಾತ್ಕಾಲಿಕವಾಗಿ ರದ್ದಾಗಿದೆ.
"ಲಸಿಕೆ ಸ್ವೀಕರಿಸಿಲಾಗಿದೆ. ಈ ಕಠಿಣ ಸಂದರ್ಭದಲ್ಲಿ ಫ್ರಂಟ್ಲೈನ್ ವಾರಿಯರ್ಗಳ ತ್ಯಾಗ ಮತ್ತು ಸಮರ್ಪಣೆಗೆ ನಾವು ಎಷ್ಟು ಧನ್ಯವಾದ ಹೇಳಿದರೂ ಸಾಲದು. ಕೊರೊನಾ ವ್ಯಾಕ್ಸಿನ್ ತೆಗೆದುಕೊಳ್ಳುವ ವಿಚಾರದಲ್ಲಿ ಅಸಡ್ಡೆ ಬೇಡ. ದಯವಿಟ್ಟು ಆದಷ್ಟು ಬೇಗ ಎಲ್ಲರೂ ವ್ಯಾಕ್ಸಿನ್ ಪಡೆದುಕೊಳ್ಳಿ, ಇದು ವೈರಸ್ ಅನ್ನು ಮಣಿಸಲು ನಮಗೆಲ್ಲಾ ನೆರವಾಗಲಿದೆ" ಎಂದು ಧವನ್ ಟ್ವೀಟ್ ಮಾಡಿದ್ದಾರೆ.
ಟೀಮ್ ಇಂಡಿಯಾದಲ್ಲಿ ಕೋಚ್ ರವಿಶಾಸ್ತ್ರಿ ವ್ಯಾಕ್ಸಿನ್ ಪಡೆದ ಮೊದಲು ವ್ಯಕ್ತಿಯಾಗಿದ್ದರು. ಅವರು ಮಾರ್ಚ್ನಲ್ಲಿ ಮೊದಲ ಹಂತದಲ್ಲಿ ಹಿರಿಯ ನಾಗರೀಕರಿಗೆ ವ್ಯಾಕ್ಸಿನ್ಗೆ ಅನುಮತಿ ನೀಡಿದಾಗಲೇ ಲಸಿಕೆ ಹಾಕಿಸಿಕೊಂಡಿದ್ದರು.
ಇದನ್ನು ಓದಿ:ಐಪಿಎಲ್ ಬಯೋ ಬಬಲ್ಗೆ ಕೋವಿಡ್ ಲಗ್ಗೆ ಹಾಕಿದ್ದು ಹೇಗೆ?... ಗಂಗೂಲಿ ತಿಳಿಸಿದ್ರು ಈ ಮಾಹಿತಿ