ಜಡೇಜಾ ಮುಂದೆ ಡ್ಯಾನ್ಸ್​ ಮಾಡಿದ ಧವನ್​.. ಮದುವೆಯಾದರೆ ಸರಿ ಹೋಗ್ತೀಯಾ ಎಂದ ಜಡ್ಡು

ರವೀಂದ್ರ ಜಡೇಜಾರನ್ನು ಕಿಚಾಯಿಸುವ ರೀತಿ ಶಿಖರ್​ ಧವನ್​ ಡ್ಯಾನ್ಸ್ ಮಾಡಿದ್ದು, ಇದಕ್ಕೆ ಜಡೇಜಾ ಮದುವೆ ಮಾಡಿದರೆ ಸರಿ ಹೋಗ್ತಿಯಾ ಎಂದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗಿರುವ ಕ್ರಿಕೆಟರ್​ ಅಂದರೆ ಅದು ಭಾರತ ತಂಡದ ಆರಂಭಿಕ ಬ್ಯಾಟ್ಸ್‌ಮನ್ ಶಿಖರ್ ಧವನ್. ಹಲವಾರು ಡ್ಯಾನ್ಸ್​, ಡೈಲಾಗ್​ ವಿಡಿಯೋಗಳನ್ನು ತಮ್ಮ ಇನ್​ಸ್ಟಾಗ್ರಾಮ್​ನಲ್ಲಿ ಶೇರ್​ ಮಾಡುತ್ತಿರುತ್ತಾರೆ. ಈಗ ಗಾಯಗೊಂಡು ಚಿಕಿತ್ಸೆಗೆ ಒಳಗಾಗಿರುವ ರವೀಂದ್ರ ಜಡೇಜಾ ಮುಂದೆ ಡ್ಯಾನ್ಸ್​ ಮಾಡಿದ ವಿಡಿಯೋವನ್ನು ಹಂಚಿಕೊಂಡಿದ್ದು, ಧವನ್​ರ ತಮಾಷೆಯನ್ನು ಅಭಿಮಾನಿಗಳು ಮೆಚ್ಚಿದ್ದಾರೆ.

ಮದುವೆ ಮಾಡ್ಕೋ ಜವಾಬ್ದಾರಿ ಬರುತ್ತೆ:ಕಾಲಿನ ಶಸ್ತ್ರಚಿಕಿತ್ಸೆಗೆ ಒಳಗಾಗಿರುವ ರವೀಂದ್ರ ಜಡೇಜಾ ಸ್ಟ್ರೆಚರ್​ ಮೇಲೆ ಕುಳಿತಿದ್ದರೆ, ಶಿಖರ್​ ಧವನ್​ ಅವರ ಪಕ್ಕ ಸಿನಿಮಾ ಹಾಡಿಗೆ ನೃತ್ಯ ಮಾಡಿ ಜಡೇಜಾರನ್ನು ರಂಜಿಸುತ್ತಿದ್ದಾರೆ. ತಮಾಷೆ ಮಾಡುತ್ತಿರುವ ಧವನ್​ ಕಂಡು ಜಡೇಜಾ, "ಮದುವೆಯಾಗು ಜವಾಬ್ದಾರಿ ಬರುತ್ತೆ. ಆಗಲಾದರೂ ಸುಧಾರಿಸುತ್ತೀಯಾ" ಎಂದು ಹೇಳುತ್ತಾರೆ.

ಇದನ್ನು ಕೇಳಿದ ಧವನ್​ ಮತ್ತೂ ಡ್ಯಾನ್ಸ್​ ಮಾಡಿದ್ದಾರೆ. ಈ ವಿಡಿಯೋವನ್ನು ಸ್ವತಃ ಶಿಖರ್​ ಧವನ್​ ಸಾಮಾಜಿಕ ಜಾಲತಾಣ ಇನ್​ಸ್ಟಾದಲ್ಲಿ ಹಂಚಿಕೊಂಡಿದ್ದಾರೆ. ಧವನ್​ರ ಈ ತಮಾಷೆಯನ್ನು ಅಭಿಮಾನಿಗಳು ಮೆಚ್ಚಿದರೆ, ಇನ್ನು ಕೆಲವರು ಕಾಲೆಳೆದಿದ್ದಾರೆ.

ಇನ್ನು ಆರಂಭಿಕ ಬ್ಯಾಟರ್ ಶಿಖರ್​ ಧವನ್​ ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧದ ಟಿ20 ಸರಣಿಗೆ ಆಯ್ಕೆಯಾಗಿಲ್ಲ. ಅಲ್ಲದೇ ವಿಶ್ವಕಪ್​ಗೂ ಅವರನ್ನು ಪರಿಗಣಿಸಲಾಗಿಲ್ಲ. ಏಕದಿನ ತಂಡದ ಭಾಗವಾಗಿರುವ ಧವನ್​ ಪೂರ್ಣವಾಗಿ ಅದರ ಮೇಲೆಯೇ ಗಮನ ಕೇಂದ್ರೀಕರಿಸಲು ಇಚ್ಚಿಸಿದ್ದಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು 2023 ರ ಏಕದಿನ ವಿಶ್ವಕಪ್​ನಲ್ಲಿ ಭಾರತ ಪರ ಆಡಲು ಬಯಸುವೆ ಎಂದು ಹೇಳಿದ್ದರು.

ರವೀಂದ್ರ ಜಡೇಜಾ ಕೂಡ ಏಷ್ಯಾಕಪ್​ ಟೂರ್ನಿ ವೇಳೆ ಕಾಲಿಗೆ ಗಾಯ ಮಾಡಿಕೊಂಡು ಶಸ್ತ್ರಚಿಕಿತ್ಸಗೆ ಒಳಗಾಗಿದ್ದಾರೆ. ಇದರಿಂದ ಬಿಸಿಸಿಐ ಪ್ರಕಟಿಸಿದ ಟಿ20 ವಿಶ್ವಕಪ್​ ತಂಡದಲ್ಲಿ ಅವರು ಸ್ಥಾನ ಪಡೆದಿಲ್ಲ. ಜಡೇಜಾಗೆ ಇನ್ನೂ ಕೆಲ ವಾರಗಳು ವಿಶ್ರಾಂತಿ ಬೇಕಾದ್ದರಿಂದ ಅವರನ್ನು ತಂಡದಿಂದ ಕೈಬಿಡಲಾಗಿದೆ. ಅಕ್ಸರ್​ ಪಟೇಲ್​ರನ್ನು ಜಡೇಜಾ ಸ್ಥಾನಕ್ಕೆ ಭರ್ತಿ ಮಾಡಲಾಗಿದೆ.

ಓದಿ:ಜೂಲನ್​ ಗೋಸ್ವಾಮಿಗೆ ಇಂಗ್ಲೆಂಡ್​ನಿಂದ ಗಾರ್ಡ್​ ಆಫ್​ ಹಾನರ್​.. ಮೈದಾನದಲ್ಲೇ ಕಣ್ಣೀರಿಟ್ಟ ಭಾರತ ವನಿತೆಯರು