ಲಂಕಾ ವಿರುದ್ಧ ಕೊಹ್ಲಿ - ರೋಹಿತ್ ಅನುಪಸ್ಥಿತಿಯಲ್ಲಿ ಭಾರತ ತಂಡಕ್ಕೆ ಧವನ್​ ನಾಯಕನಾಗುವ ಸಾಧ್ಯತೆ?

35 ವರ್ಷದ ಶಿಖರ್ ಧವನ್ ಭಾರತದ ಪರ 34 ಟೆಸ್ಟ್, 142 ಏಕದಿನ ಪಂದ್ಯ ಮತ್ತು 65 ಟಿ - 20 ಪಂದ್ಯಗಳನ್ನಾಡಿದ್ದಾರೆ. ಅಲ್ಲದೇ 14ನೇ ಆವೃತ್ತಿಯ ಐಪಿಎಲ್​ನಲ್ಲೂ 380 ರನ್​ ಸಿಡಿಸಿ ಆರೆಂಜ್ ಕ್ಯಾಪ್ ಪಡೆದಿದ್ದರು. ಅವರು 2018ರಲ್ಲಿ ನಿಡಾಹಸ್ ಟ್ರೋಫಿಯಲ್ಲಿ ರೋಹಿತ್​ ಜೊತೆಗೆ ಉಪನಾಯಕನಾಗಿದ್ದರು.

ನವದೆಹಲಿ :ಭಾರತ ಇಂಗ್ಲೆಂಡ್ ಪ್ರವಾಸಕ್ಕಾಗಿ ಎರಡೂವರೆ ತಿಂಗಳು ಪ್ರವಾಸ ಕೈಗೊಳ್ಳಲಿದೆ. ಈ ವೇಳೆ ಶ್ರೀಲಂಕಾ ವಿರುದ್ಧ ಸೀಮಿತ ಓವರ್​ಗಳ ಸರಣಿಗಾಗಿ ಮತ್ತೊಂದು ತಂಡವನ್ನು ಕಟ್ಟಲು ಬಿಸಿಸಿಐ ನಿರ್ಧರಿಸಿದೆ. ಈ ತಂಡಕ್ಕೆ ಗಬ್ಬರ್ ಖ್ಯಾತಿಯ ಶಿಖರ್ ಧವನ್ ನಾಯಕನಾಗುವ ಸಾಧ್ಯತೆಯಿದೆ.

ಕ್ವಾರಂಟೈನ್ ಕಾರಣದಿಂದ ಭಾರತ ಸೀನಿಯರ್ಸ್ ತಂಡ ಜುಲೈನಲ್ಲಿ ಯಾವುದೇ ಪಂದ್ಯಗಳಿಲ್ಲದಿದ್ದರೂ ಇಂಗ್ಲೆಂಡ್​ನಲ್ಲೇ ಉಳಿಯಬೇಕಾಗಿದೆ. ಹಾಗಾಗಿ, ವೈಟ್​ಬಾಲ್ ಸ್ಪೆಷಲಿಸ್ಟ್​ ಮತ್ತು ಕೆಲವು ಯುವ ಆಟಗಾರರು ಈ ಸರಣಿಯಲ್ಲಿ ಅವಕಾಶ ಪಡೆಯುವ ಸಾಧ್ಯತೆಯಿದೆ.

ಈ ಸರಣಿಗೆ ಟೆಸ್ಟ್​ ತಂಡದಿಂದ ಹೊರ ಬಿದ್ದಿರುವ ವೈಟ್​ ಬಾಲ್​ ತಂಡದ ಖಾಯಂ ಆಟಗಾರ ಶಿಖರ್ ಧವನ್, ಭುವನೇಶ್ವರ್ ಕುಮಾರ್, ಪೃಥ್ವಿ ಶಾ,ಕುಲ್ದೀಪ್ ಯಾದವ್ ಜೊತೆಗೆ ವೈಟ್​ ಬಾಲ್ ಸ್ಪೆಷಲಿಸ್ಟ್​ಗಳಾದ ದೀಪಕ್ ಚಹರ್​, ಮನೀಶ್ ಪಾಂಡೆ, ಕೃನಾಲ್ ಪಾಂಡ್ಯ ಹಾಗೂ ಇತ್ತೀಚೆಗಷ್ಟೇ ಟೀಂ ಇಂಡಿಯಾಗೆ ಪದಾರ್ಪಣೆ ಮಾಡಿರುವ ಸೂರ್ಯಕುಮಾರ್ ಯಾದವ್, ಇಶಾನ್ ಕಿಶನ್, ರಾಹುಲ್ ಚಹರ್ ತಂಡದಲ್ಲಿ ಆಡುವ ಸಾಧ್ಯತೆ ಹೆಚ್ಚಿದೆ.

2021ರ ಐಪಿಎಲ್​ನಲ್ಲಿ ಗಮನಾರ್ಹ ಪ್ರದರ್ಶನ ತೋರಿದ್ದ ಆರ್​ಸಿಬಿ ಮತ್ತು ಕರ್ನಾಟಕದ ದೇವದತ್ ಪಡಿಕ್ಕಲ್, ರಾಜಸ್ಥಾನ್ ರಾಯಲ್ಸ್​ನ ಚೇತನ್ ಸಕಾರಿಯಾ, ಪಂಜಾಬ್ ಕಿಂಗ್ಸ್ ತಂಡದ ಹರ್​ಪ್ರೀತ್ ಸಿಂಗ್ ತಂಡದ ಭಾಗವಾಗುವ ಸಾಧ್ಯತೆಯಿದೆ.

ನಾಯಕನಾಗಿ ಯಾರನ್ನು ಆಯ್ಕೆ ಮಾಡಬಹುದು ಎಂಬುದರ ಬಗ್ಗೆ ಸುದ್ದಿ ಸಂಸ್ಥೆ 5 ಆಯ್ಕೆಗಾರರಲ್ಲಿ ನಾಲ್ವರಿಗೆ ಕರೆ ಮಾಡಿತ್ತಾದರೂ ಯಾರೊಬ್ಬರು ಪ್ರತಿಕ್ರಿಯೆ ನೀಡಿಲ್ಲ.

ಆದರೆ, ಅನುಭವ ಮತ್ತು ದೇಶಿ ಟೂರ್ನಮೆಂಟ್​ಗಳಲ್ಲಿ ದೆಹಲಿ ತಂಡವನ್ನು ಮುನ್ನಡೆಸಿರುವ ಶಿಖರ್ ಧವನ್ ಅವರನ್ನು ಲಂಕಾ ಪ್ರವಾಸಕ್ಕೆ ನಾಯಕನಾಗಿ ನೇಮಿಸುವ ಸಾಧ್ಯತೆಯಿದೆ.

35 ವರ್ಷದ ಶಿಖರ್ ಧವನ್ ಭಾರತದ ಪರ 34 ಟೆಸ್ಟ್, 142 ಏಕದಿನ ಪಂದ್ಯ ಮತ್ತು 65 ಟಿ-20 ಪಂದ್ಯಗಳನ್ನಾಡಿದ್ದಾರೆ. ಅಲ್ಲದೇ 14ನೇ ಆವೃತ್ತಿಯ ಐಪಿಎಲ್​ನಲ್ಲೂ 380 ರನ್​ ಸಿಡಿಸಿ ಆರೆಂಜ್ ಕ್ಯಾಪ್ ಪಡೆದಿದ್ದರು. ಅವರು 2018ರಲ್ಲಿ ನಿಡಾಹಸ್ ಟ್ರೋಫಿಯಲ್ಲಿ ರೋಹಿತ್​ ಜೊತೆಗೆ ಉಪನಾಯಕನಾಗಿದ್ದರು.

ಇದನ್ನು ಓದಿ: ಅದು ಯಾರೇ ಆಗಲಿ, ಕೊರೊನಾ ಪಾಸಿಟಿವ್ ಬಂದ್ರೆ ಇಂಗ್ಲೆಂಡ್ ಪ್ರವಾಸದಿಂದ ಗೇಟ್​ ಪಾಸ್: ಬಿಸಿಸಿಐ ಎಚ್ಚರಿಕೆ