Sachin Tendulkar: ನಿಮ್ಮ ಆಟ ಹೃದಯ ಮುಟ್ಟಿದೆ; "ವಿರಾಟ" ಶತಕಕ್ಕೆ ತಲೆಬಾಗಿದ ಕ್ರಿಕೆಟ್​ ದೇವರು

Sachin Tendulkar reaction: ಭಾರತೀಯ ಆಟಗಾರನೇ ನನ್ನ ದಾಖಲೆ ಮುರಿದಿರುವುದು ನನಗೆ ಇನ್ನಷ್ಟು ಸಂತಸ ತಂದಿದೆ ಎಂದು ಸಚಿನ್​ ತೆಂಡೂಲ್ಕರ್​ ಎಕ್ಸ್​ ಆ್ಯಪ್​ನಲ್ಲಿ ಪೋಸ್ಟ್​ ಮಾಡಿದ್ದಾರೆ.

ಮುಂಬೈ (ಮಹಾರಾಷ್ಟ್ರ):ನನ್ನ ತವರು ಮೈದಾನದಲ್ಲಿ ಬಂದ ಈ ಪ್ರದರ್ಶನ ನನಗೆ ಕೇಕ್ ಮೇಲೆ ಐಸ್​ಕ್ರೀಮ್​ ಹಾಕಿ ಕೊಟ್ಟಷ್ಟು ಸಂತಸ ತಂದಿದೆ ಎಂದು ಕ್ರಿಕೆಟ್​ ದೇವರು ಸಚಿನ್​ ತೆಂಡೂಲ್ಕರ್​ ವಿರಾಟ್​ ಕೊಹ್ಲಿಯ ಶತಕದ ಬಗ್ಗೆ ಎಕ್ಸ್​ ಆ್ಯಪ್​ನಲ್ಲಿ ಪೋಸ್ಟ್​ ಮಾಡಿದ್ದಾರೆ.

2023ರ ವಿಶ್ವಕಪ್​ನ ಮೊದಲ ಸೆಮಿಫೈನಲ್​​ ಪಂದ್ಯ ಮುಂಬೈನ ವಾಂಖೆಡೆಯಲ್ಲಿ ನಡೆಯುತ್ತಿದ್ದು, ಭಾರತ ಮತ್ತು ನ್ಯೂಜಿಲೆಂಡ್​ ತಂಡಗಳು ಫೈನಲ್​ ಪ್ರವೇಶಕ್ಕಾಗಿ ಕಾದಾಡುತ್ತಿವೆ. ನಡೆಯುತ್ತಿರುವ ವಿಶ್ವಕಪ್​ನ ರಾಯಭಾರಿ ಆಗಿರುವ ಸಚಿನ್​ ತಮ್ಮ ತವರು ಮೈದಾನದಲ್ಲಿ ಕುಳಿತು ಪಂದ್ಯವನ್ನು ವೀಕ್ಷಿಸುತ್ತಿದ್ದಾರೆ. ಈ ಪಂದ್ಯದಲ್ಲಿ ವಿರಾಟ್​ ಕೊಹ್ಲಿ ಸಚಿನ್​ ತೆಂಡೂಲ್ಕರ್​ ಅವರ ಎರಡು ದಾಖಲೆ ಮುರಿದಿದ್ದಾರೆ. ಇದನ್ನು ಸ್ವತಃ ಸಚಿನ್​ ಕಣ್ತುಂಬಿಕೊಂಡಿದ್ದಾರೆ. ಅಲ್ಲದೇ ವಿರಾಟ್​ ಕೊಹ್ಲಿಯ ಆಟಕ್ಕೆ ತಮ್ಮ ಮೆಚ್ಚುಗೆಯನ್ನು ವ್ಯಕ್ತಪಡಿಸಿದ್ದಾರೆ.

ವಿರಾಟ್​​ ಕೊಹ್ಲಿ ಕಿವೀಸ್​ ವಿರುದ್ಧದ ಪಂದ್ಯದಲ್ಲಿ ಏಕದಿನ ಕ್ರಿಕೆಟ್​ನ 50ನೇ ಶತಕವನ್ನು ದಾಖಲಿಸಿದರು. ಸಚಿನ್​ ತೆಂಡೂಲ್ಕರ್​ ಏಕದಿನ ಕ್ರಿಕೆಟ್​ನಲ್ಲಿ 49 ಶತಕ ಗಳಿಸಿದ ಮೈಲಿಗಲ್ಲು ಸ್ಥಾಪಿಸಿದ್ದರು. ಇದನ್ನು ವಿರಾಟ್​ ದಾಟಿದ್ದಾರೆ. ಅಲ್ಲದೇ ಒಂದು ವಿಶ್ವಕಪ್​ನಲ್ಲಿ ಅತಿ ಹೆಚ್ಚು ರನ್​ಗಳಿಸಿದ ಮೈಲಿಗಲ್ಲನ್ನು ಸಚಿನ್​ ಮಾಡಿದ್ದರು. 2003ರ ವಿಶ್ವಕಪ್​ನಲ್ಲಿ ಸಚಿನ್​ ತೆಂಡೂಲ್ಕರ್​ ಗಳಿಸಿದ್ದ 673 ರನ್ ಗಳಿಸಿದ್ದು ಅತಿ ಹೆಚ್ಚಿನ ರನ್​ ಆಗಿತ್ತು. ಪ್ರಸ್ತುತ ವಿರಾಟ್​ ಇದನ್ನು ದಾಟಿದ್ದಲ್ಲದೇ 711* ರನ್​ ಗಳಿಸಿದ್ದಾರೆ. ವಿಶ್ವಕಪ್​ನಲ್ಲಿ ಭಾರತಕ್ಕೆ ಇನ್ನೂ ಒಂದು ಪಂದ್ಯ ಆಡುವ ಅವಕಾಶ ಇದ್ದು, ವಿರಾಟ್​ ಈ ಮೊತ್ತವನ್ನು ಹೆಚ್ಚಿಸುವ ಸಾಧ್ಯತೆ ಇದೆ.

ಕ್ರಿಕೆಟ್​ ದೇವರಿಂದ ಮೆಚ್ಚುಗೆ: ವಿರಾಟ್​ ಶತಕವನ್ನು ಮೈದಾನದಲ್ಲೇ ನೋಡಿದ ಸಚಿನ್, ಇನ್ನಿಂಗ್ಸ್​ ಮುಗಿದ ನಂತರ ಕೊಹ್ಲಿಯನ್ನು ಭೇಟಿ ಆಗಿ ಶುಭಾಶಯ ತಿಳಿಸಿದ್ದಾರೆ. ಹಾಗೇ ಸಾಮಾಜಿಕ ಜಾಲತಾಣದಲ್ಲೂ ಹಂಚಿಕೊಂಡಿದ್ದಾರೆ. 'ನಾನು ನಿಮ್ಮನ್ನು ಮೊದಲ ಬಾರಿಗೆ ಭಾರತೀಯ ಡ್ರೆಸ್ಸಿಂಗ್ ರೂಮ್‌ನಲ್ಲಿ ಭೇಟಿಯಾದಾಗ, ನನ್ನ ಪಾದಗಳನ್ನು ಮುಟ್ಟುವಂತೆ ಇತರ ತಂಡದ ಸದಸ್ಯರು ನಿಮ್ಮನ್ನು ತಮಾಷೆ ಮಾಡಿದ್ದರು. ಆ ದಿನ ನನಗೆ ನಗು ತಡೆಯಲಾಗಿರಲಿಲ್ಲ. ಆದರೆ ಶೀಘ್ರದಲ್ಲೇ, ನಿಮ್ಮ ಉತ್ಸಾಹ ಮತ್ತು ಕೌಶಲ್ಯದಿಂದ ನೀವು ನನ್ನ ಹೃದಯವನ್ನು ತಲುಪಿದಿರಿ. ಆ ಚಿಕ್ಕ ಹುಡುಗ ‘ವಿರಾಟ್’ ಆಟಗಾರನಾಗಿ ಬೆಳೆದಿದ್ದಕ್ಕೆ ನನಗೆ ತುಂಬಾ ಖುಷಿಯಾಗಿದೆ. ಒಬ್ಬ ಭಾರತೀಯ ನನ್ನ ದಾಖಲೆಯನ್ನು ಮುರಿದಿದ್ದಕ್ಕೆ ನಾನು ಹೆಚ್ಚು ಸಂತೋಷಪಡುತ್ತೇನೆ. ದೊಡ್ಡ ವೇದಿಕೆ, ವಿಶ್ವಕಪ್ ಸೆಮಿಫೈನಲ್‌ ಮತ್ತು ನನ್ನ ತವರು ಮೈದಾನದಲ್ಲಿ ಇದನ್ನು ಮಾಡಿದ್ದು ನನಗೆ ಕೇಕ್ ಮೇಲೆ ಐಸ್​ಕ್ರಿಮ್​ ಹಾಕಿದಂತಿದೆ' ಎಂದು ಬರೆದುಕೊಂಡಿದ್ದಾರೆ.

ಸಚಿನ್​ ಮಾತು ಪಾಲಿಸಿದ ವಿರಾಟ್​:49ನೇ ಶತಕವನ್ನು ವಿರಾಟ್​ ಗಳಿಸಿದಾಗ ಸಚಿನ್​ ತೆಂಡೂಲ್ಕರ್​ 'ನನಗೆ 49 ರಿಂದ 50ಕ್ಕೆ (ವರ್ಷ) ಬರಲು 365 ದಿನ ಬೇಕಾಯಿತು. ನೀನು ಇದನ್ನು ವೇಗವಾಗಿ ಸಾಧಿಸುವೆ' ಎಂದು ಬರೆದು ಇತ್ತೀಚೆಗೆ ವಿಶ್​​ ಮಾಡಿದ್ದರು. ಅದರಂತೆ ವಿರಾಟ್​ ಕೊಹ್ಲಿ ವಾರಗಳ ಅಂತರದಲ್ಲಿ 49 ರಿಂದ 50ನೇ ಶತಕ ಗಳಿಸಿದ್ದಾರೆ.

ಇದನ್ನೂ ಓದಿ:ವಿಶ್ವಕಪ್​ನಲ್ಲಿ ಹೆಚ್ಚು ರನ್​​ಗಳ​ ದಾಖಲೆ ಬರೆದ ‘ವಿರಾಟ’: ಸಚಿನ್ ತೆಂಡೂಲ್ಕರ್​ ರೆಕಾರ್ಡ್​​ ಮುರಿದ ಕಿಂಗ್​ ಕೊಹ್ಲಿ