ಮುಂಬೈ: ಭಾರತ ಮತ್ತು ನ್ಯೂಜಿಲ್ಯಾಂಡ್ ತಂಡಗಳ ನಡುವೆ ಶುಕ್ರವಾರದಿಂದ ಚೊಚ್ಚಲ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಪಂದ್ಯ ನಡೆಯಲಿದೆ. ಕಳೆದ ತಿಂಗಳು ಒಂದೇ ತಂಡದಲ್ಲಿ ಐಪಿಎಲ್ ಆಡಿದ್ದ ಆಟಗಾರರು ಇನ್ನೆರಡು ದಿನಗಳಲ್ಲಿ ನಡೆಯುವ ಮಹಾನ್ ಪಂದ್ಯದಲ್ಲಿ ಎದುರಾಳಿಗಳಾಗಲಿದ್ದಾರೆ.
ಮುಂಬೈ ಇಂಡಿಯನ್ಸ್ ತಂಡದಲ್ಲಿ ಆಡುವ ಕಿವೀಸ್ ವೇಗಿ ಟ್ರೆಂಟ್ ಬೌಲ್ಟ್ ಮತ್ತು ನಾಯಕ ರೋಹಿತ್ ಶರ್ಮಾ ನಡುವೆ ನೆಟ್ಸ್ನಲ್ಲಿ ಅಭ್ಯಾಸ ನಡೆಸುವ ವೇಳೆ ನಡೆದ ಸ್ವಾರಸ್ಯಕರ ಘಟನೆಯೊಂದನ್ನು ಮುಂಬೈ ಬೌಲಿಂಗ್ ಕೋಚ್ ಶೇನ್ ಬಾಂಡ್ ಬಹಿರಂಗಪಡಿಸಿದ್ದಾರೆ.
ಐಸಿಸಿ WTC ಫೈನಲ್ ಪಂದ್ಯಕ್ಕೂ ಮುನ್ನ ಸ್ಟಾರ್ ಸ್ಪೋರ್ಟ್ಸ್ ಆಯೋಜಿಸಿದ್ದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಬಾಂಡ್, ಬೌಲ್ಟ್ ಮತ್ತು ರೋಹಿತ್ ನಡುವಿನ ಕಾದಾಟ ಫೈನಲ್ ಪಂದ್ಯದಲ್ಲಿ ಎದುರು ನೋಡಬಹುದಾದ ಅತ್ಯುತ್ತಮ ಕ್ಷಣವಾಗಲಿದೆ ಎಂದು ತಿಳಿಸಿದ್ದಾರೆ.
ಐಪಿಎಲ್ ನಡೆಯುತ್ತಿದ್ದ ಸಂದರ್ಭದಲ್ಲಿ ಟ್ರೆಂಟ್ ಬೌಲ್ಟ್ ನೆಟ್ಸ್ನಲ್ಲಿ ಬೌಲಿಂಗ್ ಮಾಡುವ ವೇಳೆ ರೋಹಿತ್ ಪ್ಯಾಡ್ಗೆ ತಗುಲಿತು. ನಂತರ ಬೌಲ್ಟ್ ಮುಂಬರುವ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ನಲ್ಲಿ ಇದೇ ರೀತಿ ಆಗಲಿದೆ ಎಂದು ಹೇಳಿದ್ದರು ಎಂದು ಬಾಂಡ್ ಬಹಿರಂಗ ಪಡಿಸಿದ್ದಾರೆ.
ಈ ಘಟನೆ ಫೈನಲ್ ಪಂದ್ಯ ನಡೆಯುವುದಕ್ಕೂ ಒಂದು ತಿಂಗಳ ಮುನ್ನ ನಡೆದಿದೆ. ಆದರೆ, ಆ ಇಬ್ಬರಿಗೂ ಮುಂದೆ ತಾವೂ ಪರಸ್ಪರ ಎದುರಾಳಿಗಳು ಎಂಬುದರ ಬಗ್ಗೆ ಜಾಗೃತಿ ಹೊಂದಿದ್ದರು ಎಂದು ಕಿವೀಸ್ ಮಾಜಿ ಪೇಸರ್ ತಿಳಿಸಿದ್ದಾರೆ.
ನಾನು ರೋಹಿತ್ ಶರ್ಮಾ ಆಟಗಾರನನ್ನು ತುಂಬಾ ಇಷ್ಟಪಡುತ್ತೇನೆ. ಅವರು ಹೆಚ್ಚು ಕಡಿಮೆ ಆಸ್ಟ್ರೇಲಿಯಾದ ಮ್ಯಾಥ್ಯೂ ಹೇಡನ್ರಂತಹ ಆಟಗಾರ. ಕಠಿಣ ಸಂದರ್ಭದಲ್ಲಿ ಹೋದರೂ ತಾವೇ ಎಲ್ಲವನ್ನು ಹೊತ್ತು ಆಡುತ್ತಾರೆ. ಫೈನಲ್ನಲ್ಲಿ ಬೌಲ್ಟ್ ಮತ್ತು ರೋಹಿತ್ ನಡುವಿನ ಕಾದಾಟ ನೋಡಲು ನಾನಂತೂ ಕಾತುರದಿಂದಿದ್ದೇನೆ ಎಂದು ಹೇಳಿದ್ದಾರೆ.
ಇದನ್ನು ಓದಿ: ನಾವು WTC ಫೈನಲ್ ಪ್ರವೇಶಿಸಲು ಇವರೇ ಕಾರಣ: ಪೂಜಾರ
