ಡೊಮಿನಿಕಾ(ವೆಸ್ಟ್ ಇಂಡೀಸ್):ಯುವ ಪಡೆಯೊಂದಿಗೆ ವೆಸ್ಟ್ ಇಂಡೀಸ್ ಪ್ರವಾಸ ಕೈಗೊಂಡಿರುವ ಭಾರತ ಕ್ರಿಕೆಟ್ ತಂಡ ಮೊದಲ ಟೆಸ್ಟ್ನಲ್ಲಿ ಕೆರೆಬಿಯನ್ನರ ವಿರುದ್ಧ ಇನಿಂಗ್ಸ್ ಮತ್ತು 141 ರನ್ ವಿಕ್ರಮ ಸಾಧಿಸಿದೆ. ಪದಾರ್ಪಣಾ ಪಂದ್ಯದಲ್ಲಿಯೇ ಶತಕ ಸಾಧನೆ ಮಾಡಿದ ಯಶಸ್ವಿ ಜೈಸ್ವಾಲ್, ಹಿರಿಯ ಆಟಗಾರ ಆರ್ ಅಶ್ವಿನ್ ಅವರ ಸ್ಪಿನ್ಮಾಂತ್ರಿಕತೆಗೆ ತರಗೆಲೆಯಂತೆ ಉದುರಿದ ವಿಂಡೀಸ್ ಬ್ಯಾಟಿಂಗ್ ಪಡೆ ಯಾವುದೇ ಹಂತದಲ್ಲಿ ಪ್ರತಿರೋಧ ಒಡ್ಡದೇ ಸೋಲೊಪ್ಪಿಕೊಂಡಿತು.
ಇದು ತನ್ನ ಪದಾರ್ಪಣೆ ಪಂದ್ಯ ಎಂಬ ಅಳುಕಿಲ್ಲದೇ ಭರ್ಜರಿ ಬ್ಯಾಟ್ ಮಾಡಿದ ಯಶಸ್ವಿ ಜೈಸ್ವಾಲ್ 387 ಎಸೆತಗಳಲ್ಲಿ 171 ರನ್ ಗಳಿಸಿ ವಿಂಡೀಸ್ ನೆಲದಲ್ಲಿ ಮೊದಲ ಟೂರ್ನಿಯನ್ನೇ ಅವಿಸ್ಮರಣೀಯ ಮಾಡಿಕೊಂಡರು. ಟಿ20 ಯಲ್ಲಿ ಲೀಲಾಜಾಲವಾಗಿ ಬ್ಯಾಟ್ ಮಾಡಿದ್ದ ಯುವ ಬ್ಯಾಟರ್, ಕ್ರಿಕೆಟ್ನ ಸತ್ವವನ್ನು ಒರೆಗಚ್ಚುವ ಟೆಸ್ಟ್ನಲ್ಲೂ ತಮ್ಮ ಬ್ಯಾಟಿಂಗ್ ಖದರ್ ತೋರಿಸಿದ್ದಾರೆ. ಇದು ನಾಯಕ ರೋಹಿತ್ ಶರ್ಮಾರ ಗಮನ ಸೆಳೆದಿದ್ದು, ಯುವ ಆಟಗಾರನನ್ನು ಹೊಗಳಿದ್ದಾರೆ.
ಯಶಸ್ವಿ ಜೈಸ್ವಾಲ್ ಪ್ರತಿಭಾವಂತ ಬ್ಯಾಟ್ಸ್ಮನ್. ಈಗ ಆತ ಮೇಲ್ದರ್ಜೆಯಲ್ಲಿ ಆಡಬಲ್ಲ ಶಕ್ತಿ ಹೊಂದಿದ್ದಾನೆ. ಬ್ಯಾಟ್ ಮಾಡುವಾಗ ಮೊದಲ ಪ್ರವಾಸವಾಗಿದ್ದರೂ ಒಂದು ಕ್ಷಣವೂ ಮುಖದಲ್ಲಿ ಗಾಬರಿ ಕಾಣಲಿಲ್ಲ. ನಿರಾತಂಕವಾಗಿ ಆಡುವ ಮೂಲಕ ಚೊಚ್ಚಲ ಪಂದ್ಯದಲ್ಲೇ ಶತಕ ಸಾಧನೆ ಮಾಡಿದ್ದು ಖುಷಿ ತಂದಿದೆ. ಮೈದಾನದಲ್ಲಿದ್ದಾಗ ಉತ್ತಮವಾಗಿ ಬ್ಯಾಟ್ ಮಾಡುತ್ತಿದ್ದೀಯಾ ಮುಂದುವರಿಸು ಎಂದು ಹುರಿದುಂಬಿಸಿದ್ದೆ ಎಂದು ಅವರು ಹೇಳಿದ್ದಾರೆ.
ನಮ್ಮಿಬ್ಬರ ನಡುವಿನ ಸಂಭಾಷಣೆಯ ವೇಳೆ ಎಲ್ಲಿಯೂ ಆತ ತನ್ನ ಚೈತನ್ಯವನನ್ನು ಬಿಟ್ಟುಕೊಡಲಿಲ್ಲ. ರನ್ ಗಳಿಕೆ ಮಾಡುವುದರಲ್ಲಿ ಆತನಿಗಿರುವ ಶ್ರದ್ಧೆ ಅದ್ಭುತ ಎಂದು ಹೇಳಿದ್ದಾರೆ. ಪಂದ್ಯದಲ್ಲಿ ಬ್ಯಾಟಿಂಗ್ ಜೊತೆಗೆ ಉತ್ತಮವಾಗಿ ಬೌಲಿಂಗ್ ಕೂಡ ಮಾಡಿದೆವು. ಕೆರೆಬಿಯನ್ನರನ್ನು ಎರಡೂ ಇನಿಂಗ್ಸ್ಗಳಲ್ಲಿ 150 ರನ್ಗಳ ಒಳಗೆ ಕಟ್ಟಿ ಹಾಕುವ ಮೂಲಕ ಪ್ರಾಬಲ್ಯ ಸಾಧಿಸಿದೆವು. ಎರಡನೇ ಇನಿಂಗ್ಸ್ ಬ್ಯಾಟಿಂಗ್ ಮಾಡುವ ಉದ್ದೇಶ ಹೊಂದಿರಲಿಲ್ಲ. ಹೀಗಾಗಿ ಸಾಧ್ಯವಾದಷ್ಟು ರನ್ಗಳನ್ನು ಮೊದಲ ಇನಿಂಗ್ಸ್ನಲ್ಲೇ ಗಳಿಸಲು ಪ್ರಯತ್ನಿಸಿದೆವು. ಬ್ಯಾಟರ್ಗಳು ಕೂಡ ಅದಕ್ಕೆ ಸ್ಪಂದಿಸಿದರು. ಆದ್ದರಿಂದ 421 ರನ್ ಗಳಿಸಿದ ನಂತರ ಡಿಕ್ಲೇರ್ ಮಾಡಿಕೊಂಡೆವು ಎಂದು ಪಂದ್ಯದ ರಣತಂತ್ರದ ಬಗ್ಗೆ ಹೇಳಿದರು.