ಲಾಹೋರ್: ಕೋವಿಡ್ ಸಾಂಕ್ರಾಮಿಕದ ಕಾರಣ ಮುಂದೂಡಲ್ಪಟ್ಟಿರುವ ಪಾಕಿಸ್ತಾನ ಸೂಪರ್ ಲೀಗ್ನ ಮುಂದುವರಿದ ಭಾಗಕ್ಕೆ ಆತಿಥ್ಯವಹಿಸಲು ಯುನೈಟೆಡ್ ಅರಬ್ ಎಮಿರೇಟ್ಸ್ ಸರ್ಕಾರ ಅನುಮತಿ ನೀಡಿದೆ ಎಂದು ತಿಳಿದುಬಂದಿದೆ.
ಪಾಕಿಸ್ತಾನ ಸೂಪರ್ ಲೀಗ್ನ ಮೊದಲ 14 ಪಂದ್ಯಗಳು ಪಾಕಿಸ್ತಾನದಲ್ಲಿ ನಡೆದಿದ್ದವು. ಆದರೆ ಬಯೋಬಬಲ್ನಲ್ಲಿ ಆಟಗಾರರಿಗೆ ಕೊರೊನಾ ಕಾಣಿಸಿಕೊಂಡ ಹಿನ್ನೆಲೆ ಮಾರ್ಚ್ 4ರಂದು ಟೂರ್ನಿಯನ್ನು ಮುಂದೂಡಲಾಗಿತ್ತು. ಇದೀಗ ಉಳಿದ 20 ಪಂದ್ಯಗಳನ್ನು ಅಬುಧಾಬಿಯಲ್ಲಿ ಆಯೋಜಿಸಲು ಪಿಸಿಬಿಗೆ ಯುಎಇ ಸರ್ಕಾರ ಅನುಮತಿ ನೀಡಿದೆ.
ಇಂದು ಪಿಸಿಬಿ ಎಲ್ಲಾ 6 ಫ್ರಾಂಚೈಸಿಗಳ ಮಾಲೀಕರ ಜೊತೆ ಆನ್ಲೈನ್ ಮೀಟಿಂಗ್ ನಡೆಸಲಿದ್ದು, ಪ್ರಸ್ತುತ ಪ್ರಗತಿ, ಕ್ವಾರಂಟೈನ್ ಮತ್ತು ಮುಂದಿನ ಯೋಜನೆಗಳ ಕುರಿತು ಚರ್ಚಿಸಲಿವೆ ಎಂದು ತಿಳಿದುಬಂದಿದೆ.
ಜೂನ್ ತಿಂಗಳಲ್ಲಿ ಟೂರ್ನಿ ಪುನರಾರಂಭಗೊಳ್ಳಲಿದ್ದು, ಜೂನ್ 20ರಂದು ಫೈನಲ್ ಪಂದ್ಯ ನಿಗದಿಯಾಗಿದೆ. ಪ್ರಸ್ತುತ ಕರಾಚಿ ಕಿಂಗ್ಸ್ ತಂಡ 5 ಪಂದ್ಯಗಳಲ್ಲಿ 3 ಗೆಲುವು ಪಡೆದು 6 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ಪೇಶಾವರ್ ಜಾಲ್ಮಿ, ಇಸ್ಲಾಮಾಬಾದ್ ಯುನೈಟೆಡ್, ಲಾಹೋರ್ ಕೂಡ 6 ಅಂಕಗಳೊಂದಿಗೆ ನಂತರದ ಸ್ಥಾನದಲ್ಲಿವೆ.
ಇದನ್ನು ಓದಿ: ನಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಆಡಿದರೆ ವಿಶ್ವದ ಯಾವ ತಂಡವನ್ನಾದರೂ ಮಣಿಸಬಹುದು: ಪೂಜಾರ