ಮುಂಬೈ: 'ಮಿಸ್ಟರ್ ಐಪಿಎಲ್' ಎಂದೇ ಖ್ಯಾತರಾಗಿರುವ ಸುರೇಶ್ ರೈನಾ 2022ರ ಐಪಿಎಲ್ನಲ್ಲಿ ಹೊಸ ಅವತಾರದಲ್ಲಿ ಕಾಣಿಸಿಕೊಳ್ಳುವುದಕ್ಕೆ ಸಿದ್ಧರಾಗಿದ್ದಾರೆ. ಮೆಗಾ ಹರಾಜಿನಲ್ಲಿ ಅನ್ಸೋಲ್ಡ್ ಆಗಿರುವ ರೈನಾ, ಈ ಬಾರಿ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಕಾಮೆಂಟೇಟರ್ ಆಗಿ ಕಾರ್ಯನಿರ್ವಹಿಸಲು ಸಜ್ಜಾಗಿದ್ದಾರೆ.
2020ರ ಆವೃತ್ತಿಯನ್ನು ಹೊರತುಪಡಿಸಿ ಐಪಿಎಲ್ನ ಎಲ್ಲಾ ಆವೃತ್ತಿಯಲ್ಲೂ ಆಡಿರುವ ರೈನಾ, ಇದೀಗ ಮೊದಲ ಬಾರಿ ಆಟಗಾರನಾಗಿ ಶ್ರೀಮಂತ ಲೀಗ್ನಿಂದ ಹೊರಗುಳಿದಿದ್ದಾರೆ. ರೈನಾ ಹಾಗೂ ರವಿಶಾಸ್ತ್ರಿ ಈ ಬಾರಿ ಐಪಿಎಲ್ನ ಹಿಂದಿ ಕಾಮೆಂಟೇಟರ್ಗಳಾಗಿ ಕಾರ್ಯನಿರ್ವಹಿಸಲಿದ್ದಾರೆ.
ರವಿಶಾಸ್ತ್ರಿ 2017ರಲ್ಲಿ ಭಾರತ ತಂಡದ ಮುಖ್ಯ ಕೋಚ್ ಆಗಿ ನೇಮಕಗೊಂಡ ನಂತರ ಕಾಮೆಂಟರಿಯಿಂದ ದೂರ ಉಳಿದಿದ್ದರು. ಐಪಿಎಲ್ನ ಹೊಸ ತಂಡಗಳಿಗೆ ಕೋಚ್ ಆಗಬಹುದು ಎಂಬ ಗುಸುಗುಸು ಕೇಳಿ ಬಂದರೂ ಅದು ಜರುಗಲಿಲ್ಲ. ಹಾಗಾಗಿ ಮತ್ತೆ ತಮ್ಮಿಷ್ಟದ ವೀಕ್ಷಕ ವಿವರಣೆಯ ಕಾರ್ಯಕ್ಕೆ ಮರು ಪ್ರವೇಶ ಮಾಡುತ್ತಿದ್ದಾರೆ.
ರೈನಾ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ 205 ಪಂದ್ಯಗಳನ್ನಾಡಿದ್ದು, 5,528 ರನ್ ಗಳಿಸಿದ್ದಾರೆ. ಅವರು ಚೆನ್ನೈ ಸೂಪರ್ ಕಿಂಗ್ಸ್ ಪರವೇ 176 ಪಂದ್ಯಗಳಲ್ಲಿ ಕಾಣಿಸಿಕೊಂಡಿದ್ದು, 32.32ರ ಸರಾಸರಿಯಲ್ಲಿ 4,787 ರನ್ ಬಾರಿಸಿದ್ದರು.
ಇದನ್ನೂ ಓದಿ:ಡೆಲ್ಲಿ ಕ್ಯಾಪಿಟಲ್ಸ್ ಬಸ್ ಕಿಟಕಿ ಗಾಜು ಪುಡಿಗಟ್ಟಿದ MNS ಕಾರ್ಯಕರ್ತರು
