ಮಹಿಳಾ ಕ್ರಿಕೆಟ್ ತಂಡದ ಕೋಚ್ ಆಗಿ ಮತ್ತೆ ರಮೇಶ್ ಪವಾರ್​ ನೇಮಕ!

ರಮೇಶ್ ಪವಾರ್​ ಇತ್ತೀಚೆಗೆ ವಿಜಯ್ ಹಜಾರೆ ಟ್ರೋಫಿ ಗೆದ್ದ ಮುಂಬೈ ತಂಡದ ಕೋಚ್​ ಆಗಿದ್ದರು. ಅಲ್ಲದೇ ರಾಹುಲ್ ದ್ರಾವಿಡ್​ ಮುಖ್ಯಸ್ಥರಾಗಿರುವ ಎನ್​ಸಿಎನಲ್ಲೂ ಬೌಲಿಂಗ್ ಕೋಚ್​ ಆಗಿ ಸೇವೆ ಸಲ್ಲಿಸಿದ್ದಾರೆ.

ಮುಂಬೈ: ಭಾರತ ತಂಡದ ಮಾಜಿ ಸ್ಪಿನ್​ ಬೌಲರ್​ ರಮೇಶ್ ಪವಾರ್​ ಭಾರತ ಮಹಿಳಾ ತಂಡದ ಮುಖ್ಯ ಕೋಚ್ ಆಗಿ ನೇಮಕಗೊಂಡಿದ್ದಾರೆ.

ಅವರು 2018ರ ಟಿ20 ವಿಶ್ವಕಪ್​ ಸೆಮಿಫೈನಲ್​ ಪಂದ್ಯದಲ್ಲಿ ಮಿಥಾಲಿ ರಾಜ್​ರನ್ನು ಆಡಿಸದೇ ವಿವಾದಕ್ಕೀಡಾದ ನಂತರ ಕೋಚ್​ ಸ್ಥಾನದಿಂದ ಕೆಳಕ್ಕಿಳಿದಿದ್ದರು. ಇದೀಗ ಮತ್ತೆ ಕೋಚ್​ ಸ್ಥಾನಕ್ಕೆ ಜಾಹೀರಾತು ನೀಡಿದ್ದು, ಅರ್ಜಿ ಸಲ್ಲಿಸಿದ 35 ಅಭ್ಯರ್ಥಿಗಳಲ್ಲಿ ರಮೇಶ್​ ಪವಾರ್​ ಅವರನ್ನು ಮತ್ತೆ ಆಯ್ಕೆ ಮಾಡಲಾಗಿದೆ.

ಸುಲಕ್ಷಣ ನಾಯಕ್, ಮದನ್​ ಲಾಲ್ ಮತ್ತು ರುದ್ರಪ್ರತಾಪ್​ ಸಿಂಗ್​ ಒಳಗೊಂಡ ಕ್ರಿಕೆಟ್​ ಸಲಹಾ ಸಮಿತಿ ಸಂದರ್ಶನ ಮಾಡಿದ್ದು, ರಮೇಶ್ ಪವಾರ್​ ಅವರನ್ನು ಅವಿರೋಧವಾಗಿ ಆಯ್ಕೆ ಮಾಡಿದ್ದಾರೆ.

ಮಾಜಿ ಬೌಲರ್​ ಪವಾರ್​ ಭಾರತ ತಂಡದ ಪರ 31 ಏಕದಿನ ಪಂದ್ಯ ಹಾಗೂ 2 ಟೆಸ್ಟ್​ ಪಂದ್ಯಗಳನ್ನಾಡಿದ್ದಾರೆ. ಅವರು​ ಬಾರತ ಎ ತಂಡದ ಪರ ಬೌಲಿಂಗ್ ಕೋಚ್ ಆಗಿ ಕಾರ್ಯನಿರ್ವಹಿಸಿದ್ದಾರೆ. ಜೊತೆಗೆ ಎನ್​ಸಿಎನಲ್ಲಿ ಲೆವೆಲ್ 2 ಕೋಚಿಂಗ್ ಕೋರ್ಸ್​ ಮುಗಿಸಿದ್ದಾರೆ. 2018ರಲ್ಲಿ ಜುಲೈನಿಂದ ನವೆಂಬರ್​ವರೆಗೆ ಭಾರತ ಮಹಿಳಾ ತಂಡದ ಕೋಚ್ ಆಗಿ 14 ಪಂದ್ಯಗಳಲ್ಲಿ ಕಾರ್ಯನಿರ್ವಹಿಸಿದ್ದಾರೆ.

ಇತ್ತೀಚೆಗೆ ವಿಜಯ್ ಹಜಾರೆ ಟ್ರೋಫಿ ಗೆದ್ದ ಮುಂಬೈ ತಂಡದ ಕೋಚ್​ ಆಗಿದ್ದರು. ಅಲ್ಲದೇ ರಾಹುಲ್ ದ್ರಾವಿಡ್​ ಮುಖ್ಯಸ್ಥರಾಗಿರುವ ಎನ್​ಸಿಎನಲ್ಲೂ ಬೌಲಿಂಗ್ ಕೋಚ್​ ಆಗಿ ಸೇವೆ ಸಲ್ಲಿಸಿದ್ದಾರೆ.

2018ರ ಟಿ-20 ವಿಶ್ವಕಪ್​ ವೇಳೆ ಸೆಮಿಫೈನಲ್​ನಲ್ಲಿ ಭಾರತ ತಂಡದ ಏಕದಿನ ತಂಡದ ನಾಯಕಿ ಮಿಥಾಲಿ ರಾಜ್​ ಅವರು ಪವಾರ್​ ಸೆಮಿಫೈನಲ್​ನಲ್ಲಿ ಬೆಂಚ್​ ಕಾಯಿಸಿದ್ದು, ದೊಡ್ಡ ವಿವಾದವೆಬ್ಬಿಸಿತ್ತು. ಇದರಿಂದ ಕೋಪಗೊಂಡಿದ್ದ ಮಿಥಾಲಿ ರಾಜ್​ ಬಿಸಿಸಿಐಗೆ ದೂರು ನೀಡಿದ್ದರು.

ಇದಲ್ಲದೇ ಪವಾರ್​ ಮಿಥಾಲಿ ತಂಡಕ್ಕೋಸ್ಕರ ಆಡುವ ಬದಲು, ವೈಯಕ್ತಿಕ ದಾಖಲೆಗಳಿಗಾಗಿ ಆಡುತ್ತಾರೆ ಎಂದು ಹೇಳಿಕೆ ನೀಡಿದ್ದರು. ಕೊನೆಗೆ ಪವಾರ್​ ಅವರನ್ನು ಮಹಿಳಾ ತಂಡದ ಕೋಚ್​ ಸ್ಥಾನದಿಂದ ಬಿಸಿಸಿಐ ಕೆಳಗಿಳಿಸಿತ್ತು.

ಇದನ್ನು ಓದಿ:ಮಂದಾನ, ಕೌರ್​ ಜೊತೆಗೆ ಬಿಗ್​ಬ್ಯಾಶ್​ನಲ್ಲಿ​ ಆಡಲಿದ್ದಾರೆ ಶೆಫಾಲಿ ವರ್ಮಾ