ಕನ್ನಡಿಗರ ಅಬ್ಬರಕ್ಕೆ ಹರಿಣ ಪಡೆ ಸುಸ್ತು: 272 ರನ್​ಗಳಿಸಿದ ಭಾರತ ತಂಡಕ್ಕೆ ಮೊದಲ ದಿನದ ಗೌರವ

ಆರಂಭದಲ್ಲಿ ನಿಧಾನವಾಗಿ ಬ್ಯಾಟಿಂಗ್ ಮಾಡಿದ ರಾಹುಲ್​ ಕ್ರೀಸ್​ನಲ್ಲಿ ಸೆಟ್​ ಆದ ನಂತರ ಹರಿಣಗಳ ಬೌಲರ್​ಗಳನ್ನು ಚೆಂಡಾಡಿದರು. 218ನೇ ಎಸೆತದಲ್ಲಿ ತಮ್ಮ 7ನೇ ಶತಕ ಬಾರಿಸಿದ ರಾಹುಲ್​ ಒಟ್ಟಾರೆ 248 ಎಸೆತಗಳಲ್ಲಿ ಅಜೇಯ 122 ರನ್​ಗಳಿಸಿ ರಹಾನೆ ಜೊತೆಗೆ ಬ್ಯಾಟಿಂಗ್ ಕಾಯ್ದಿರಿಸಿಕೊಂಡಿದ್ದಾರೆ.

ಸೆಂಚುರಿಯನ್​:ದಕ್ಷಿಣ ಆಫ್ರಿಕಾ ವಿರುದ್ಧದ ಬಾಕ್ಸಿಂಗ್ ಡೇ ಟೆಸ್ಟ್​ ಪಂದ್ಯದಲ್ಲಿ ಭಾರತ ತಂಡ ಪ್ರಾಬಲ್ಯ ಸಾಧಿಸಿದೆ. ಕನ್ನಡಿಗ ಕೆಎಲ್ ರಾಹುಲ್​ ಶತಕದ ನೆರವಿನಿಂದ ಕೊಹ್ಲಿಪಡೆ ಮೊದಲ ದಿನ 3 ವಿಕೆಟ್ ಕಳೆದುಕೊಂಡು 272 ರನ್​ಗಳಿಸಿದೆ.

ಸೆಂಚುರಿಯನ್​ನ ಸೂಪರ್​ ಸ್ಪೋರ್ಟ್ಸ್​ ಪಾರ್ಕ್​​ ಮೈದಾನದಲ್ಲಿ ಟಾಸ್​ ಗೆದ್ದ ಕೊಹ್ಲಿ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಇನ್ನಿಂಗ್ಸ್​ ಆರಂಭಿಸಿದ ಕರ್ನಾಟಕ ಜೋಡಿ ಮಯಾಂಕ್​ ಮತ್ತು ರಾಹುಲ್​ ಮೊದಲ ವಿಕೆಟ್​ಗೆ 117 ರನ್​ಗಳ ಭರ್ಜರಿ ಆರಂಭ ಒದಗಿಸಿಕೊಟ್ಟರು.

ಮಯಾಂಕ್ ಅಗರ್ವಾಲ್​ 123 ಎಸೆತಗಳಲ್ಲಿ 9 ಬೌಂಡರಿ ಸಹಿತ 60 ರನ್​ಗಳಿಸಿ ಲುಂಗಿ ಎಂಗಿಡಿಗೆ ವಿಕೆಟ್​ ಒಪ್ಪಿಸಿದರು. ಇವರ ನಂತರ ಬಂದ ಚೇತೇಶ್ವರ್ ಪೂಜಾರ ಅದೇ ಓವರ್​​ನ ನಂತರದ ಎಸೆತದಲ್ಲೇ ಗೋಲ್ಡನ್ ​ ಡಕ್​ ಆಗಿ ನಿರಾಸೆ ಮೂಡಿಸಿದರು.

ನಂತರ ರಾಹುಲ್ ಜೊತೆಯಾದ ನಾಯಕ ಕೊಹ್ಲಿ 3ನೇ ವಿಕೆಟ್​ ಜೊತೆಯಾಟಕ್ಕೆ 82 ರನ್​ಗಳನ್ನು ಸೇರಿಸಿದರು. 35 ರನ್​ಗಳಿಸಿದ್ದ ವಿರಾಟ್​ ಕೊಹ್ಲಿ ಕೂಡ ಎಂಗಿಡಿ ಬೌಲಿಂಗ್​​ನಲ್ಲಿ ಸ್ಲಿಪ್​ನಲ್ಲಿದ್ದ ಮಲ್ಡರ್​ಗೆ ಕ್ಯಾಚ್​ ನೀಡಿ ಪೆವಿಲಿಯನ್​ ಸೇರಿಕೊಂಡರು.

ರಾಹುಲ್-ರಹಾನೆ ಅಜೇಯ ಜೊತೆಯಾಟ

ಕೊಹ್ಲಿ ವಿಕೆಟ್ ಪತನದ ಬಳಿಕ ಕ್ರೀಸ್​ಗೆ ಆಗಮಿಸಿದ ರಹಾನೆ ಅತ್ಯುತ್ತಮವಾಗಿ ಬ್ಯಾಟ್​ ಬೀಸಿದರು. ಅವರು ರಾಹುಲ್​ ಜೊತೆಗೂಡಿ 4ನೇ ವಿಕೆಟ್​ಗೆ 73 ರನ್​ ಸೇರಿಸಿ 2ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡರು. ಕಳಪೆ ಫಾರ್ಮ್​ನಿಂದ ಟೀಕೆಗೆ ಒಳಗಾಗಿರುವ ರಹಾನೆ ಇಂದು 81 ಎಸೆತಗಳಲ್ಲಿ 8 ಆಕರ್ಷಕ ಬೌಂಡರಿಗಳ ಮೂಲಕ ಅಜೇಯ 40 ರನ್​ಗಳಿಸಿ ಟೀಕಾಕಾರರ ಬಾಯಿ ಮುಚ್ಚಿಸಿದರು.

ರಾಹುಲ್ 7ನೇ ಶತಕ

ಇತ್ತ ಆರಂಭದಲ್ಲಿ ನಿಧಾನವಾಗಿ ಬ್ಯಾಟಿಂಗ್ ಮಾಡಿದ ರಾಹುಲ್​ ಕ್ರೀಸ್​ನಲ್ಲಿ ಸೆಟ್​ ಆದ ನಂತರ ಹರಿಣಗಳ ಬೌಲರ್​ಗಳನ್ನು ಚೆಂಡಾಡಿದರು. 218ನೇ ಎಸೆತದಲ್ಲಿ ತಮ್ಮ 7ನೇ ಶತಕ ಬಾರಿಸಿದ ರಾಹುಲ್​ ಒಟ್ಟಾರೆ 248 ಎಸೆತಗಳಲ್ಲಿ ಅಜೇಯ 122 ರನ್​ಗಳಿಸಿ ರಹಾನೆ ಜೊತೆಗೆ ಬ್ಯಾಟಿಂಗ್ ಕಾಯ್ದಿರಿಸಿಕೊಂಡಿದ್ದಾರೆ.

ಇದನ್ನೂ ಓದಿ: ಮಯಾಂಕ್​-ರಾಹುಲ್ ದಾಖಲೆ: 11 ವರ್ಷಗಳ ಬಳಿಕ ದ.ಆಫ್ರಿಕಾ ನೆಲದಲ್ಲಿ ದಾಖಲೆ ಶತಕದ ಆರಂಭ