ನವದೆಹಲಿ: ಮುಂಬರುವ ಇಂಡಿಯನ್ ಪ್ರೀಮಿಯರ್ ಲೀಗ್ಗೂ ಮುನ್ನ ಶ್ರೇಯಸ್ ಅಯ್ಯರ್ ಮತ್ತು ನನ್ನನ್ನು ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿ ರೀಟೈನ್ ಮಾಡಿಕೊಳ್ಳುವ ಸಾಧ್ಯತೆ ಇಲ್ಲ ಎಂದು ಸ್ವತಃ ಅಶ್ವಿನ್ ಯೂಟ್ಯೂಬ್ ಚಾನೆಲ್ ಸಂಭಾಷಣೆ ವೇಳೆ ತಿಳಿಸಿದ್ದಾರೆ.
2022ರ ಐಪಿಎಲ್ಗೂ ಮುನ್ನ ಮೆಗಾ ಹರಾಜು ನಡೆಯಲಿದೆ. ಇದಕ್ಕೂ ಮುನ್ನ ಎಲ್ಲಾ ಫ್ರಾಂಚೈಸಿಗಳು 4 ಆಟಗಾರರನ್ನು ರೀಟೈನ್ ಮಾಡಿಕೊಳ್ಳುವುದಕ್ಕೆ ಬಿಸಿಸಿಐ ತಿಳಿಸಿದೆ. ಅದು ತಲಾ ಇಬ್ಬರು ವಿದೇಶಿ ಆಟಗಾರರಾಗಿರಬಹುದು ಅಥವಾ 3 ಭಾರತೀಯರು ಮತ್ತು ಒಬ್ಬ ವಿದೇಶಿಗನನ್ನು ಉಳಿಸಿಕೊಳ್ಳಬಹುದೆಂದು ನಿಯಮದಲ್ಲಿ ತಿಳಿಸಿದೆ.
ಇನ್ನು ಹೊಸದಾಗಿ ಐಪಿಎಲ್ಗೆ ಸೇರಿರುವ ಅಹ್ಮದಾಬಾದ್ ಮತ್ತು ಲಖನೌ ಫ್ರಾಂಚೈಸಿಗಳು ಮಾತ್ರ ಹಳೆಯ ತಂಡಗಳು ರೀಟೈನ್ ಘೋಷಿಸಿದ ನಂತರ ತಲಾ ಮೂರು ಆಟಗಾರರನ್ನು ಉಳಿಸಿಕೊಳ್ಳಲು ತಿಳಿಸಿದೆ.
ಇನ್ನು ಯೂಟ್ಯೂಬ್ ಚಾನಲ್ನಲ್ಲಿ ಗೌರವ್ ಸುಂದರಾಮನ್ ಜೊತೆಗಿನ ಸಂಭಾಷಣೆ ವೇಳೆ ಅಶ್ವಿನ್ ನಾನು ಮತ್ತು ಶ್ರೇಯಸ್ ಡೆಲ್ಲಿ ಕ್ಯಾಪಿಟಲ್ಸ್ ಪರ ದೀರ್ಘಕಾಲ ಉಳಿಯುವುದಿಲ್ಲ ಎಂದು ತಿಳಿಸಿದ್ದಾರೆ.
ಡೆಲ್ಲಿ ಕ್ಯಾಪಿಟಲ್ಸ್ ರಿಷಭ್ ಪಂತ್, ಕಗಿಸೋ ರಬಾಡ, ಎನ್ರಿಚ್ ನಾಕಿಯಾರನ್ನು ಭಾಗಶಃ ರೀಟೈನ್ ಮಾಡಿಕೊಳ್ಳುವುದು ಖಚಿತ. ಇನ್ನು ನಾಯಕತ್ವವನ್ನು ಕಳೆದುಕೊಂಡಿರುವ ಶ್ರೇಯಸ್ ಅಯ್ಯರ್ ತಾವಾಗಿಯೇ ಫ್ರಾಂಚೈಸಿಯಿಂದ ಹೊರಬರಲು ಮುಂದಾಗಿದ್ದಾರೆ. ಅವರು ಹೊಸ 2 ಫ್ರಾಂಚೈಸಿಯಲ್ಲಿ ನಾಯಕತ್ವವನ್ನು ಬಯಸುತ್ತಿರುವ ಪ್ರಮುಖರ ಲಿಸ್ಟ್ನಲ್ಲಿದ್ದಾರೆ. ಹಾಗಾಗಿ ಫೃಥ್ವಿ ಶಾ, ಶಿಖರ್ ಧವನ್ ಅಕ್ಷರ್ ಪಟೇಲ್ ಸೇರಿದಂತೆ ಇನ್ನು ಕೆಲವು ಉಳಿದ ಒಂದು ಸ್ಥಾನಕ್ಕಾಗಿ ಪೈಪೋಟಿ ನಡೆಸಲಿದ್ದಾರೆ.
ಇದೇ ಕಾರಣದಿಂದ ಅಶ್ವಿನ್ ತಮ್ಮನ್ನು ಡೆಲ್ಲಿ ಕ್ಯಾಪಿಟಲ್ಸ್ ರೀಟೈನ್ ಮಾಡಿಕೊಳ್ಳುವ ಸಾಧ್ಯತೆಯಿಲ್ಲ ಎಂದಿರಬಹುದು ಎಂದು ಊಹಿಸಬಹುದಾಗಿದೆ. ಇದರ ಜೊತೆಗೆ ಐಪಿಎಲ್ನಲ್ಲಿನ ಅನುಭವವನ್ನು ಪರಿಗಣಿಸಿ ನೋಡುವುದಾದರೆ ಅಶ್ವಿನ್ ಕೂಡ 2022ರ ಆವೃತ್ತಿಯಲ್ಲಿ ಯಾವುದಾದರೂ ತಂಡದ ನಾಯಕನಾಗಿ ಆಫರ್ ಬಂದಿದ್ದರೂ ಅಚ್ಚರಿಯಿಲ್ಲ. ಈಗಾಗಲೇ ಕೆ.ಎಲ್.ರಾಹುಲ್ ಪಂಜಾಬ್ ತಂಡದಿಂದ ಹೊರಬರಲು ಬಯಸಿದ್ದು, ಹೊಸ ತಂಡದ ನಾಯಕತ್ವದ ನಿರೀಕ್ಷೆಯಲ್ಲಿದ್ದಾರೆ.
ಇದನ್ನೂ ಓದಿ:ಆರಂಭಿಕ ಸ್ಥಾನದಿಂದ ಶುಬ್ಮನ್ ಗಿಲ್ಗೆ ಹಿಂಬಡ್ತಿ, ಹೊಸ ಜವಾಬ್ದಾರಿ ನೀಡಿದ ಮ್ಯಾನೇಜ್ಮೆಂಟ್
