ಕಾನ್ಪುರ : ಮುಂದಿನ ಐಪಿಎಲ್ಗೆ ಫ್ರಾಂಚೈಸಿಗಳು ರಿಟೈನ್ ಆಟಗಾರರನ್ನು ಘೋಷಿಸುವ ಮುನ್ನವೇ ನೂತನ ಲಖನೌ ಫ್ರಾಂಚೈಸಿ ತಮ್ಮ ಆಟಗಾರರನ್ನು ಸೆಳೆದುಕೊಳ್ಳಲು ಪ್ರಯತ್ನಿಸುತ್ತಿವೆ ಎಂದು ಪಂಜಾಬ್ ಕಿಂಗ್ಸ್ ಮತ್ತು ಸನ್ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿಗಳು ಬಿಸಿಸಿಐಗೆ ಮೌಖಿಕ ದೂರು ನೀಡಿವೆ ಎಂದು ವರದಿಗಳಿಂದ ತಿಳಿದು ಬಂದಿದೆ.
ಬಿಸಿಸಿಐ ನಿಯಮದ ಪ್ರಕಾರ ಡಿಸೆಂಬರ್ 30ರೊಳಗೆ ಎಲ್ಲಾ ಫ್ರಾಂಚೈಸಿಗಳು ತಮ್ಮ ರೀಟೈನ್ ಆಟಗಾರರ ಪಟ್ಟಿಯನ್ನು ಸಲ್ಲಿಸಿದ ನಂತರ ಲಖನೌ ಮತ್ತು ಆಹ್ಮದಾಬಾದ್ ಫ್ರಾಂಚೈಸಿಗಳು ತಲಾ ಮೂರು ಆಟಗಾರರನ್ನು ನೇರವಾಗಿ ಖರೀದಿಸಬಹುದಾಗಿದೆ.
ಆದರೆ, ಇನ್ನೂ ಫ್ರಾಂಚೈಸಿಗಳು ಆಟಗಾರರ ರಿಟೈನ್ ಮಾಡಿಕೊಳ್ಳುವ ಮುನ್ನವೇ ಲಖನೌ ಹಣದ ಆಮಿಷವೊಡ್ಡಿ ತಮ್ಮ ತಂಡದ ಪರ ಆಡಲು ಆಟಗಾರರನ್ನು ಭೇಟಿ ಮಾಡಲು ಪ್ರಯತ್ನಿಸುತ್ತಿದೆ ಎಂದು ಪಂಜಾಬ್ ಕಿಂಗ್ಸ್ ಮತ್ತು ಸನ್ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿಗಳು ಲಖನೌ ವಿರುದ್ಧ ದೂರು ನೀಡಿವೆ.
ವರದಿಯ ಪ್ರಕಾರ ಪಂಜಾಬ್ ಕಿಂಗ್ಸ್ ತಂಡದ ಕೆ ಎಲ್ ರಾಹುಲ್ ಮತ್ತು ಸನ್ರೈಸರ್ಸ್ ಹೈದರಾಬಾದ್ ತಂಡದ ಸ್ಟಾರ್ ಸ್ಪಿನ್ನರ್ ರಶೀದ್ ಖಾನ್ರನ್ನು ತನ್ನತ್ತ ಸೆಳೆಯಲು ಲಖನೌ ಫ್ರಾಂಚೈಸಿ ಪ್ರಯತ್ನಸಿದೆ ಎನ್ನಲಾಗಿದೆ.
ನಾವು ಈ ವಿಷಯದಲ್ಲಿ ಇನ್ನೂ ಯಾವುದೇ ಲಿಖಿತ ದೂರನ್ನು ಸ್ವೀಕರಿಸಿಲ್ಲ. ಆದರೆ, ಎರಡೂ ಫ್ರಾಂಚೈಸಿಗಳು ತಮ್ಮ ತಂಡದ ಆಟಗಾರರನ್ನು ಸೆಳೆಯಲು ಪ್ರಯತ್ನಿಸುತ್ತಿವೆ ಎಂದು ಲಖನೌ ತಂಡದ ವಿರುದ್ಧ ಮೌಖಿಕ ದೂರು ನೀಡಿವೆ.
ನಾವು ಈ ವಿಷಯವನ್ನು ಗಂಭೀರವಾಗಿ ಪರಿಶೀಲಿಸುತ್ತಿದ್ದೇವೆ ಮತ್ತು ತಪ್ಪಿತಸ್ಥರೆಂದು ಕಂಡು ಬಂದರೆ ಸೂಕ್ತ ಕ್ರಮ ಕೈಗೊಳ್ಳುತ್ತೇವೆ ಎಂದು ಬಿಸಿಸಿಐ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಪ್ರಬಲ ಪೈಪೋಟಿ ಇದ್ದಾಗ, ಅಂತಹ ವಿಷಯಗಳನ್ನು ನಿರ್ಲಕ್ಷಿಸಲಾಗುವುದಿಲ್ಲ. ಪ್ರಸ್ತುತ ಫ್ರಾಂಚೈಸಿಗಳು ತಮ್ಮ ತಂಡವನ್ನು ಸಮತೋಲನದಲ್ಲಿಡಲು ಪ್ರಯತ್ನಿಸುತ್ತಿರುವಾಗ ಈ ರೀತಿಯ ವರ್ತನೆ ಮಾಡುವುದು ಅನ್ಯಾಯ ಎಂದು ಅಧಿಕಾರಿ ಪ್ರತಿಷ್ಠಿತ ಕ್ರೀಡಾ ವೆಬ್ಸೈಟ್ ಇನ್ಸೈಡ್ ಸ್ಪೋರ್ಟ್ಗೆ ತಿಳಿಸಿದ್ದಾರೆ.
ಈಗಾಗಲೇ ಕೆ ಎಲ್ ರಾಹುಲ್ ತಾವೂ ರಿಟೈನ್ಗೆ ಲಭ್ಯರಿರುವುದಿಲ್ಲ. ಹರಾಜಿಗೆ ಹೋಗುವುದಾಗಿ ಪಂಜಾಬ್ಗೆ ತಿಳಿಸಿದ್ದರೆ, ರಶೀದ್ ತಮ್ಮನ್ನು ಮೊದಲ ಆಟಗಾರನಾಗಿ ರಿಟೈನ್ ಮಾಡಿಕೊಳ್ಳಬೇಕೆಂದು ಹೈದರಾಬಾದ್ಗೆ ಬೇಡಿಕೆಯಿಟ್ಟಿದ್ದಾರೆ.
ಬಿಸಿಸಿಐ ನಿಯಮದ ಪ್ರಕಾರ ಮೊದಲ ಆಟಗಾರನಾಗಿ ರಿಟೈನ್ ಮಾಡಕೊಳ್ಳುವ ಆಟಗಾರ 14-16 ಕೋಟಿ ರೂ. ಪಡೆಯಲಿದ್ದಾರೆ. ರಾಹುಲ್ ಪ್ರಸ್ತುತ 11, ರಶೀದ್ 9 ಕೋಟಿ ಪಡೆಯುತ್ತಿದ್ದಾರೆ.
ನಿಷೇಧದ ಭೀತಿ :2010ರಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದಲ್ಲಿದ್ದ ರವೀಂದ್ರ ಜಡೇಜಾ ತಮ್ಮನ್ನ ಖರೀದಿಸುವಂತೆ ಕೆಲವು ಫ್ರಾಂಚೈಸಿಗಳ ಜೊತೆ ಮಾತನಾಡಿದ ಕಾರಣ ಅವರನ್ನು ಒಂದು ಆವೃತ್ತಿಯಲ್ಲಿ ನಿಷೇಧಿಸಲಾಗಿತ್ತು. ಒಂದು ವೇಳೆ ರಾಹುಲ್-ರಶೀದ್ ವಿರುದ್ಧದ ಆರೋಪ ಸಾಬೀತಾದರೆ ಇವರಿಬ್ಬರೂ ಸಹಾ ನಿಷೇಧಕ್ಕೊಳಗಾಗುವ ಸಾಧ್ಯತೆಯಿದೆ.
ಇದನ್ನೂ ಓದಿ:5 ದಿನ ಕ್ರಿಕೆಟ್ ರಸದೌತಣ ನೀಡಿದ ಪಿಚ್ ತಯಾರಿಸಿದ್ದಕ್ಕೆ ಸಿಬ್ಬಂದಿಗೆ ₹35,000 ನೀಡಿದ ರಾ'ವಾಲ್‌' ದ್ರಾವಿಡ್!
