ಆಸೀಸ್​ ವಿರುದ್ಧ ತವರಿನಲ್ಲೇ ಮುಖಭಂಗ ಅನುಭವಿಸಿದ ಪಾಕ್.. 148ಕ್ಕೆ ಆಲೌಟ್, 408 ರನ್​ಗಳ ಬೃಹತ್​ ಹಿನ್ನಡೆ..

ಪಾಕ್ ತಂಡವನ್ನು 148ಕ್ಕೆ ನಿಯಂತ್ರಿಸುವಲ್ಲಿ ಯಶಸ್ವಿಯಾಗಿರುವ ಕಾಂಗರೂ ಪಡೆ 408ರನ್​ಗಳ ಬೃಹತ್ ಮುನ್ನಡೆಯ ಹೊರತಾಗಿಯೂ ಎದುರಾಳಿಯ ಮೇಲೆ ಫಾಲೋ ಆನ್​ ಹೇರದೆ ಮತ್ತೆ ಬ್ಯಾಟಿಂಗ್ ಮಾಡುವುದಕ್ಕೆ ನಿರ್ಧರಿಸಿದೆ..

ಕರಾಚಿ :ಆಸ್ಟ್ರೇಲಿಯಾ ಬೌಲಿಂಗ್ ದಾಳಿಗೆ ತತ್ತರಿಸಿದ ಆತಿಥೇಯ ಪಾಕಿಸ್ತಾನ ತನ್ನ ಮೊದಲ ಇನ್ನಿಂಗ್ಸ್​ನಲ್ಲಿ ಕೇವಲ 148 ರನ್​ಗಳಿಗೆ ಸರ್ವಪತನಗೊಂಡು ಬರೋಬ್ಬರಿ 408 ರನ್​ಗಳ ಇನ್ನಿಂಗ್ಸ್ ಮುನ್ನಡೆ ಅನುಭವಿಸಿದೆ.

2ನೇ ಟೆಸ್ಟ್​ನಲ್ಲಿ ಯಶಸ್ವಿಯಾಗಿ ಎರಡು ದಿನ ಬ್ಯಾಟಿಂಗ್ ಮಾಡಿ 505 ರನ್​ಗಳಿಸಿದ್ದ ಪ್ರವಾಸಿ ಆಸ್ಟ್ರೇಲಿಯಾ ತಂಡ 3ನೇ ದಿನ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 556ರನ್​​ಗಳಿಸಿದ್ದ ವೇಳೆ ಡಿಕ್ಲೇರ್ ಘೋಷಿಸಿತು.

ಮೊದಲ ದಿನ ಆಸ್ಟ್ರೇಲಿಯಾ ತಂಡ 3 ವಿಕೆಟ್ ಕಳೆದುಕೊಂಡು 251 ರನ್​ಗಳಿಸಿತ್ತು. 2ನೇ ದಿನವೂ ಸಂಪೂರ್ಣ ಬ್ಯಾಟಿಂಗ್ ಮಾಡಿದ ಆಸೀಸ್​ ತಂಡ 9 ವಿಕೆಟ್ ಕಳೆದುಕೊಂಡು 505 ರನ್​ಗಳಿಸಿತ್ತು. ಇಂದು ಆ ಮೊತ್ತಕ್ಕೆ 51 ರನ್​ ಸೇರಿಸಿತ್ತು. ಉಸ್ಮಾನ್ ಖವಾಜ 160, ಅಲೆಕ್ಸ್​ ಕ್ಯಾರಿ 92, ಸ್ಟೀವ್​ ಸ್ಮಿತ್​ 72 ರನ್​ಗಳಿಸಿದ್ದರು.

ಆಸ್ಟ್ರೇಲಿಯಾದ ಬೃಹತ್​​ ಮೊತ್ತವನ್ನು ಹಿಂಬಾಲಿಸಿದ ಪಾಕಿಸ್ತಾನ ತಂಡ ಕೆಟ್ಟದಾಗಿ ಬ್ಯಾಟ್​ ಬೀಸಿ ನಿರಂತರ ವಿಕೆಟ್ ಕಳೆದುಕೊಂಡಿತು. ಆಸೀಸ್​ ಬೌಲರ್​​ಗಳ ಮುಂದೆ ಯಾವುದೇ ಹಂತದಲ್ಲೂ ತಿರುಗೇಟು ನೀಡುವುದಕ್ಕೆ ಸಾಧ್ಯವಾಗಲಿಲ್ಲ.

ನಾಯಕ ಬಾಬರ್ ಅಜಮ್ ಸಿಡಿಸಿದ 36 ರನ್​ ತಂಡದ ಗರಿಷ್ಠ ಮೊತ್ತ ಎನಿಸಿತು. ನೌಮನ್ ಅಲಿ 20, ಇಮಾಮ್​ ಉಲ್​ ಹಕ್(20) ಮಾತ್ರ ತಂಡದಲ್ಲಿ 20ರ ಗಡಿ ದಾಟಿದರು.

ಅಬ್ದುಲ್ ಶಫೀಕ್​ 13, ಅಜರ್ ಅಲಿ 14, ಫವಾದ್ ಆಲಮ್ 0, ರಿಜ್ವಾನ್ 6, ಫಹೀಮ್ ಆಶ್ರಫ್ 4, ಸಾಜಿದ್ ಖಾನ್ 5, ಹಸನ್​ ಅಲಿ 0 ಬಂದಷ್ಟೇ ವೇಗವಾಗಿ ಪೆವಿನಿಲಿಯನ್​ಗೆ ಮರಳಿದರು.

ಆಸೀಸ್​ ಪರ ಮಿಚೆಲ್ ಸ್ಟಾರ್ಕ್​ 29ಕ್ಕೆ3 ವಿಕೆಟ್ ಪಡೆದು ಯಶಸ್ವಿ ಬೌಲರ್ ಎನಿಸಿಕೊಂಡರು. ಇವರಿಗೆ ಸಾಥ್ ನೀಡಿದ ಮಿಚೆಲ್ ಸ್ವೆಪ್ಸನ್​ 2, ಕ್ಯಾಮರಾನ್ ಗ್ರೀನ್, ನೇಥನ್ ಲಿಯಾನ್, ಕಮ್ಮಿನ್ಸ್ ತಲಾ ಒಂದು ವಿಕೆಟ್ ಪಡೆದರು.

ಫಾಲೋ ಆನ್ ಹೇರದ ಆಸ್ಟ್ರೇಲಿಯಾ :ಪಾಕ್ ತಂಡವನ್ನು 148ಕ್ಕೆ ನಿಯಂತ್ರಿಸುವಲ್ಲಿ ಯಶಸ್ವಿಯಾಗಿರುವ ಕಾಂಗರೂ ಪಡೆ 408ರನ್​ಗಳ ಬೃಹತ್ ಮುನ್ನಡೆಯ ಹೊರತಾಗಿಯೂ ಎದುರಾಳಿಯ ಮೇಲೆ ಫಾಲೋ ಆನ್​ ಹೇರದೆ ಮತ್ತೆ ಬ್ಯಾಟಿಂಗ್ ಮಾಡುವುದಕ್ಕೆ ನಿರ್ಧರಿಸಿದೆ.

ಬೇಸಿಗೆಯಾಗಿರುವುದರಿಂದ ತಮ್ಮ ಬೌಲರ್​ಗಳಿಗೆ ವಿಶ್ರಾಂತಿ ನೀಡುವ ಕಾರಣದಿಂದ ಮತ್ತೆ ಬ್ಯಾಟಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿದೆ. ಇನ್ನು 2 ದಿನಗಳ ಆಟ ಬಾಕಿ ಉಳಿದಿರುವುದರಿಂದ ಆಸೀಸ್ ಈ ನಿರ್ಧಾರ ತೆಗೆದುಕೊಂಡಿದೆ.

ಇದನ್ನೂ ಓದಿ:ಡೇಲ್​ ಸ್ಟೇನ್ ಹಿಂದಿಕ್ಕಿದ ಅಶ್ವಿನ್ ​; ಟೆಸ್ಟ್​ನಲ್ಲಿ ಹೆಚ್ಚು ವಿಕೆಟ್ ಪಡೆದ ವಿಶ್ವದ 7ನೇ ಬೌಲರ್​