ನವದೆಹಲಿ: ವಿರಾಟ್ ಕೊಹ್ಲಿ ಇನ್ಸ್ಟಾಗ್ರಾಮ್ ಒಂದು ಪೋಸ್ಟ್ಗೆ ಗಳಿಸುವ ಮೊತ್ತ ಎಷ್ಟು ಗೊತ್ತೇ ಎಂದು ಹಾಪರ್ ಎಂಬ ಸಂಸ್ಥೆ ನೀಡಿದ ಅಂಕಿ ಅಂಶದ ಮೇಲೆ ಕಳೆದೆರಡು ದಿನ ಸುದ್ದಿಗಳು ಹರಿದಾಡಿದ್ದವು. ಈ ಬಗ್ಗೆ ಸ್ವತಃ ವಿರಾಟ್ ಪ್ರತಿಕ್ರಿಯಿಸಿದ್ದು, ಅದು ಸರಿಯಾದ ಅಂಕಿ ಅಂಶ ಅಲ್ಲ ಸುಳ್ಳು ಎಂದು ಹೇಳಿಕೊಂಡಿದ್ದಾರೆ.
ಸುಮಾರು 256 ಮಿಲಿಯನ್ ಫಾಲೋವರ್ಸ್ಗಳನ್ನು ಹೊಂದಿರುವ ವಿರಾಟ್ ವಿಶ್ವದ ಜನಪ್ರಿಯ ಕ್ರೀಡಾಪಟುಗಳಲ್ಲಿ ಒಬ್ಬರು. ಕಿಂಗ್ ಕೊಹ್ಲಿ ತಮ್ಮ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ತುಂಬಾ ಆ್ಯಕ್ಟೀವ್ ಆಗಿರುತ್ತಾರೆ. ಜಾಹೀರಾತು ಸಂಬಂಧಿತ ಪೋಸ್ಟ್ಗಳು, ವಿಶೇಷ ಸಂದರ್ಭಗಳ ಬಗ್ಗೆ ತಮ್ಮ ಖಾತೆಯಲ್ಲಿ ಹಂಚಿಕೊಳ್ಳುತ್ತಾ ಇರುತ್ತಾರೆ. ತಮ್ಮ ದಿನದ ಕೆಲ ಸಮಯದ ಬಗ್ಗೆ ಜಿಮ್ನಲ್ಲಿ ವರ್ಕೌಟ್ ಮಾಡುವ ಚಿತ್ರಗಳನ್ನು ಪೊಸ್ಟ್ ಮಾಡುತ್ತಾರೆ. ಹಾಗೇ ಪತ್ನಿ ಅನುಷ್ಕಾ ಅವರ ಜೊತೆ ಹೊರಗಡೆ ಟ್ರಿಪ್ಗಳನ್ನು ಮಾಡಿದಾಗ ವಿಶೇಷ ಕ್ಷಣದ ಪೋಟೋವನ್ನು ಹಂಚಿಕೊಳ್ಳುತಾರೆ.
ಹಾಪರ್ ಎಂಬ ಸಂಸ್ಥೆ ವಿರಾಟ್ ಈ ರೀತಿ ತಮ್ಮ ಇನ್ಸ್ಟಾಗ್ರಾಮ್ನ ಖಾತೆಯಲ್ಲಿ ಹಂಚಿಕೊಳ್ಳುವ ಫೋಟೋ ಒಂದಕ್ಕೆ 11 ಕೋಟಿ ರೋಪಾಯಿ ಗಳಿಸುತ್ತಾರೆ. ಅವರು ಕ್ರೀಡಾ ಪಟುಗಳ ಪಟ್ಟಿಯಲ್ಲಿ ಮೂರನೇ ಅತಿ ಹೆಚ್ಚು ಸಂಪಾದಿಸುವ ಆಟಗಾರ, ಕ್ರಿಸ್ಟಿಯಾನೊ ರೊನಾಲ್ಡೊ ಒಂದು ಪೋಸ್ಟ್ಗೆ 26.7 ಕೋಟಿ ಮತ್ತು ಲಿಯೊನೆಲ್‌ ಮೆಸ್ಸಿ 21.5 ಕೋಟಿ ಗಳಿಸುತ್ತಾರೆ ಎಂದು ವರದಿ ಮಾಡಿತ್ತು. ಇದರ ಆಧಾರದಲ್ಲಿ ಮಾಧ್ಯಮಗಳು ಸುದ್ದಿ ಬಿತ್ತರಿಸಿದ್ದವು.
ಈಗ ವಿರಾಟ್ ಈ ವರದಿಯ ಬಗ್ಗೆ ಪ್ರತಿಕ್ರಿಯಿಸಿದ್ದು, ಸುದ್ದಿ ಮಾಧ್ಯಮಗಳಲ್ಲಿ ಪ್ರಸಾರ ಆಗುತ್ತಿರುವ ಸುದ್ದಿ ಸುಳ್ಳೆಂದು ಎಕ್ಸ್ ಆ್ಯಪ್ನಲ್ಲಿ ಬರೆದುಕೊಂಡಿದ್ದಾರೆ. ತಮ್ಮ ಎಕ್ಸ್ ಆ್ಯಪ್ ಖಾತೆಯಲ್ಲಿ "ನಾನು ಜೀವನದಲ್ಲಿ ಸ್ವೀಕರಿಸಿದ ಎಲ್ಲದಕ್ಕೂ ಕೃತಜ್ಞನಾಗಿದ್ದೇನೆ ಮತ್ತು ಋಣಿಯಾಗಿದ್ದೇನೆ, ನನ್ನ ಸಾಮಾಜಿಕ ಮಾಧ್ಯಮ ಗಳಿಕೆಯ ಬಗ್ಗೆ ಸುತ್ತುತ್ತಿರುವ ಸುದ್ದಿ ನಿಜವಲ್ಲ" ಎಂದು ಬರೆದುಕೊಂಡಿದ್ದಾರೆ. ಈ ಮೂಲಕ ತಾವು ಸಾಮಾಜಿಕ ಜಾಲತಾಣದಿಂದ ಅಷ್ಟು ಸಂಪಾದನೆ ಮಾಡುತ್ತಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.
ವೆಸ್ಟ್ ಇಂಡೀಸ್ನ ಪ್ರವಾಸ ಮುಗಿಸಿರುವ ವಿರಾಟ್ ಆಗಸ್ಟ್ 30ರಿಂದ ಶ್ರೀಲಂಕಾ ಮತ್ತು ಪಾಕಿಸ್ತಾನದಲ್ಲಿ ನಡೆಯಲಿರುವ ಏಷ್ಯಾಕಪ್ ಮತ್ತು 2023ರ ವಿಶ್ವಕಪ್ನ ಸಿದ್ಧತೆಯಲ್ಲಿದ್ದಾರೆ. ವಿಶ್ವಕಪ್ ಭಾರತದಲ್ಲಿ ಅಕ್ಟೋಬರ್ 5 ರಿಂದ ನವೆಂಬರ್ 19ರ ವರೆಗೆ ನಡೆಯಲಿದೆ. ವಿಶ್ವಕಪ್ ನಡುವೆ ಆಸ್ಟ್ರೇಲಿಯಾದ ಜೊತೆಗೆ ಏಕದಿನ ಸರಣಿಯನ್ನು ವಿರಾಟ್ ಆಡಲಿದ್ದಾರೆ. ವಿಂಡೀಸ್ನಲ್ಲಿ ಎರಡು ಟೆಸ್ಟ್ನಲ್ಲಿ ಮಾತ್ರ ಆಡಿದ್ದರು. ಏಕದಿನ ಕ್ರಿಕೆಟ್ನಲ್ಲಿ ತಮ್ಮ ಸ್ಥಾನವನ್ನು ಯುವ ಆಟಗಾರರಿಗೆ ಬಿಟ್ಟುಕೊಟ್ಟಿದ್ದರು. ಎರಡು ಏಕದಿನ ಪಂದ್ಯದಿಂದ ಅವರು ಸಂಪೂರ್ಣ ಹೊರಗುಳಿದಿದ್ದರು.
111 ಟೆಸ್ಟ್‌ಗಳಲ್ಲಿ ತಲಾ 29 ಶತಕ ಮತ್ತು 29 ಅರ್ಧಶತಕಗಳೊಂದಿಗೆ 8,676 ರನ್, 275 ಏಕದಿನದಲ್ಲಿ 46 ಶತಕಗಳು ಮತ್ತು 65 ಅರ್ಧಶತಕ ಸಹಿತ 12,898 ರನ್, 115 ಟಿ20 ಗಳಲ್ಲಿ 1 ಶತಕ ಮತ್ತು 37 ಅರ್ಧಶತಕಗಳೊಂದಿಗೆ 4,008 ರನ್ಗಳನ್ನು ಮಾಡಿರುವ ವಿರಾಟ್ ಟೀಮ್ ಇಂಡಿಯಾದ ಸಾರ್ವಕಾಲಿಕ ಯಶಸ್ವಿ ಬ್ಯಾಟರ್ ಆಗಿದ್ದಾರೆ. ಪ್ರಸ್ತುತ 25,000 ಅಂತಾರಾಷ್ಟ್ರೀಯ ರನ್ ಮತ್ತು 76 ಶತಕಗಳನ್ನು ಹೊಂದಿರುವ ವಿರಾಟ್ ಸಚಿನ್ ಅವರ ದಾಖಲೆಯನ್ನು ಮುರಿಯುತ್ತಾರಾ ಎಂಬುದನ್ನು ಅಭಿಮಾನಿಗಳು ಕಾತರದಿಂದ ನೋಡುತ್ತಿದ್ದಾರೆ.
ಇದನ್ನೂ ಓದಿ:Virat Kohli: ಸಾವಿರ ಕೋಟಿಗೆ ಒಡೆಯ ವಿರಾಟ್.. ಒಂದು ಇನ್ಸ್ಟಾಗ್ರಾಮ್ ಪೋಸ್ಟ್ನಿಂದ ಕೊಹ್ಲಿ ಎಷ್ಟು ಸಂಪಾದಿಸ್ತಾರೆ ಗೊತ್ತಾ?
