IRE vs NZ: ಕೊನೆಯ ಓವರ್​ನಲ್ಲಿ ಬ್ರೇಸ್‌ವೆಲ್ 4,4,6,4,6 ಅಬ್ಬರ, ಕಿವೀಸ್​ಗೆ ರೋಚಕ ಜಯ

ಡಬ್ಲಿನ್​ನಲ್ಲಿ ಐರ್ಲೆಂಡ್​ ವಿರುದ್ಧ ಭಾನುವಾರ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ನ್ಯೂಜಿಲೆಂಡ್​ 1 ವಿಕೆಟ್​ ಅಂತರದ ರೋಚಕ ಗೆಲುವು ಕಂಡಿದೆ. ಪಂದ್ಯದಲ್ಲಿ ಎರಡೂ ತಂಡಗಳಲ್ಲೂ ತಲಾ ಒಂದು ಶತಕ ಮೂಡಿಬಂದಿದ್ದು, ಕೊನೆಯ ಓವರ್​ ಹೋರಾಟದಲ್ಲಿ ಕಿವೀಸ್​ ಗೆಲುವಿನ ನಗೆ ಬೀರಿತು.

ಡಬ್ಲಿನ್‌:ಅಜೇಯ ಶತಕ(127, 82 ಎಸೆತ) ಸಿಡಿಸಿದ ಆಲ್‌ರೌಂಡರ್ ಮೈಕೆಲ್ ಬ್ರೇಸ್‌ವೆಲ್ ಅವರ ಕೊನೆಯ ಓವರ್​ನಲ್ಲಿನ ಮಿಂಚಿನ ಬ್ಯಾಟಿಂಗ್​ನಿಂದ ನ್ಯೂಜಿಲೆಂಡ್ ತಂಡವು ಐರ್ಲೆಂಡ್​ ವಿರುದ್ಧ ಮೊದಲ ಏಕದಿನ ಪಂದ್ಯದಲ್ಲಿ 1 ವಿಕೆಟ್​ ಅಂತರದ ರೋಚಕ ಜಯ ದಾಖಲಿಸಿದೆ. ಮೂರು ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

301 ರನ್​ಗಳ ಗುರಿ ಬೆನ್ನಟ್ಟಿದ ಕಿವೀಸ್ ಆರಂಭಿಕ ಆಟಗಾರ ಮಾರ್ಟಿನ್​ ಗುಪ್ಟಿಲ್​ ಅರ್ಧಶತಕದ(51) ಹೊರತಾಗಿಯೂ 120 ರನ್​ಗೆ 5 ವಿಕೆಟ್​ ಕಳೆದುಕೊಂಡಿತ್ತು. ಫಿನ್​ ಅಲೆನ್​ 6, ವಿಲ್​ ಯಂಗ್​ 1, ನಾಯಕ ಟಾಮ್​​ ಲ್ಯಾಥಮ್​ 23 ಹಾಗೂ ಹೆನ್ರಿ ನಿಕೋಲಸ್​​ 7 ರನ್​ ಗಳಿಸಿ ಪೆವಿಲಿಯನ್​ ಸೇರಿದ್ದರು. ಆದರೆ ಈ ವೇಳೆ ಕ್ರೀಸ್​ಗೆ ಬಂದ ಮೈಕೆಲ್ ಬ್ರೇಸ್‌ವೆಲ್ ಪಂದ್ಯದ ಗತಿಯನ್ನೇ ಬದಲಿಸಿದರು.

ಭರ್ಜರಿ ಶತಕ ಚಚ್ಚಿದ ಬ್ರೇಸ್‌ವೆಲ್​ಗೆ ಗ್ಲೆನ್​ ಫಿಲಿಪ್ಸ್​ 38 ಹಾಗೂ ಈಸ್​ ಸೋಧಿ 25 ರನ್​ ಮೂಲಕ ಉತ್ತಮ ಸಾಥ್​ ನೀಡಿದರು. ಒಂದೆಡೆ ವಿಕೆಟ್​ ಪತನವಾಗುತ್ತಿದ್ದರೂ ಅಬ್ಬರ ಮುಂದುವರೆಸಿದ ಬ್ರೇಸ್‌ವೆಲ್ 10 ಬೌಂಡರಿ ಹಾಗೂ 7 ಸಿಕ್ಸರ್​ ಸಿಡಿಸಿ ಕೊನೆಯ ಓವರ್​ನ 5ನೇ ಎಸೆತದಲ್ಲಿ ಕಿವೀಸ್​ಗೆ ಗೆಲುವು ತಂದಿತ್ತರು.

ಅಂತಿಮ ಓವರ್​ನಲ್ಲಿ 20 ರನ್​: ಪಂದ್ಯದ 50ನೇ ಓವರ್​ನಲ್ಲಿ ನ್ಯೂಜಿಲೆಂಡ್​ಗೆ 20 ರನ್​ ಅಗತ್ಯವಿತ್ತು. ಕ್ರೇಗ್​ ಯಂಗ್​ ಎಸೆದ ಈ ಓವರ್​ನಲ್ಲಿ 4,4,6,4,6 ಬಾರಿಸುವ ಮೂಲಕ ಬ್ರೇಸ್‌ವೆಲ್ ನೆರೆದಿದ್ದ ಐರ್ಲೆಂಡ್​​ ಪ್ರೇಕ್ಷಕರಿಗೆ ಶಾಕ್​ ನೀಡಿದರು. ಇನ್ನೂ ಒಂದು ಎಸೆತ ಇರುವಾಗಲೇ ಕಿವೀಸ್​ 1 ವಿಕೆಟ್​​ ಅಂತರದ ಗೆಲುವಿನ ಕೇಕೆ ಹಾಕಿತು.

ಇದಕ್ಕೂ ಮುನ್ನ ಟಾಸ್​ ಸೋತು ಬ್ಯಾಟಿಂಗ್​ ಮಾಡಿದ ಐರ್ಲೆಂಟ್​​ ಹ್ಯಾರಿ ಟೆಕ್ಟರ್​ ಚೊಚ್ಚಲ ಶತಕ (113) ನೆರವಿನಿಂದ 50 ಓವರ್​ಗಳಲ್ಲಿ 9 ವಿಕೆಟ್​ಗೆ ಬರೋಬ್ಬರಿ 300 ರನ್​ ಪೇರಿಸಿತ್ತು. ಇನ್ನುಳಿದಂತೆ ಕರ್ಟಿಸ್​ ಕ್ಯಾಂಫರ್​ 42, ಆ್ಯಂಡಿ ಮ್ಯಾಕಬ್ರಿನ್​ 39 ಹಾಗೂ ವಿಕೆಟ್​ ಕೀಪರ್​ ಬ್ಯಾಟರ್​ ಟಕ್ಕರ್​ 26 ರನ್ ಕಾಣಿಕೆ ನೀಡಿದ್ದರು. ಮೂರು ಪಂದ್ಯಗಳ ಸರಣಿಯ 2ನೇ ಪಂದ್ಯ ಡಬ್ಲಿನ್​ನಲ್ಲೇ ಜುಲೈ 12ರಂದು ನಡೆಯಲಿದೆ.

ಇದನ್ನೂ ಓದಿ:ವಿರಾಟ್​ ಮತ್ತೆ ವಿಫಲ: ಮಾಜಿ ನಾಯಕನ ಬೆಂಬಲಕ್ಕೆ ನಿಂತ ಕ್ಯಾಪ್ಟನ್​ ರೋಹಿತ್​ ಹೀಗಂದ್ರು..