T20: ಟೆಸ್ಟ್​ ವಿಶ್ವ ಚಾಂಪಿಯನ್​ ನ್ಯೂಜಿಲ್ಯಾಂಡ್​ಗೆ ಸೋಲಿನ ರುಚಿ ತೋರಿಸಿದ ಬಾಂಗ್ಲಾದೇಶ

ನ್ಯೂಜಿಲ್ಯಾಂಡ್ ತಂಡವನ್ನ ಕೇವಲ 60ರನ್​ಗಳಿಗೆ ಕಟ್ಟಿ ಹಾಕಿದ್ದ ಬಾಂಗ್ಲಾದೇಶ ಈ ಗುರಿಯನ್ನ 15 ಓವರ್​​ಗಳಲ್ಲಿ ಕೇವಲ 3ವಿಕೆಟ್​​ ಕಳೆದುಕೊಂಡು ಗುರಿ ಮುಟ್ಟುವ ಮೂಲಕ ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಕಾಯ್ದುಕೊಂಡಿದೆ.

ಢಾಕಾ: ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ 4-1 ಅಂತರದಿಂದ ಟಿ20 ಸರಣಿ ಗೆದ್ದು ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿದ್ದ ಬಾಂಗ್ಲಾದೇಶ ಇದೀಗ ವಿಶ್ವ ಟೆಸ್ಟ್​ ಚಾಂಪಿಯನ್​ ನ್ಯೂಜಿಲ್ಯಾಂಡ ವಿರುದ್ಧ ಮೊದಲ ಟಿ-20 ಪಂದ್ಯದಲ್ಲಿ ಭರ್ಜರಿ ಗೆಲುವು ದಾಖಲು ಮಾಡಿದೆ.

ಟಾಸ್​ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದ್ದ ನ್ಯೂಜಿಲ್ಯಾಂಡ್​ ಆರಂಭದಿಂದಲೇ ಬಾಂಗ್ಲಾದೇಶ ಬೌಲರ್​ಗಳ ದಾಳಿಗೆ ತರಗೆಲೆಯಂತೆ ಉದುರಿಹೋದರು. ಕೇವಲ 16.5 ಓವರ್​ಗಳಲ್ಲಿ 60 ರನ್​ಗಳಿಗೆ ಕಿವೀಸ್ ಸರ್ವಪತನಗೊಂಡಿತು. ನಾಯಕ ಟಾಪ್ ಲಾಥಮ್ ಮತ್ತು ಹೆನ್ರಿ ನಿಕೋಲ್ಸ್​ ಮಾತ್ರ ತಲಾ 18 ರನ್​ಗಳಿಸಿ ತಂಡದಲ್ಲಿ ಎರಡಂಕಿ ಮೊತ್ತ ದಾಟಿದ ಬ್ಯಾಟ್ಸ್​ಮನ್​ಗಳಾದರು.

ಆಸ್ಟ್ರೇಲಿಯಾ ವಿರುದ್ಧ 4-1ರಲ್ಲಿ ಟಿ20 ಸರಣಿ ಗೆದ್ದ ಹುಮ್ಮಸ್ಸಿನಲ್ಲಿರುವ ಬಾಂಗ್ಲಾದೇಶ ತಂಡ ಇದೀಗ ನ್ಯೂಜಿಲ್ಯಾಂಡ್ ವಿರುದ್ಧವೂ ತನ್ನ ಪ್ರಾಬಲ್ಯವನ್ನು ಮುಂದುವರಿಸಿದೆ. 5 ಪಂದ್ಯಗಳ ಟಿ20 ಸರಣಿಯಲ್ಲಿ ಬುಧವಾರ ಆರಂಭವಾದ ಮೊದಲ ಪಂದ್ಯದಲ್ಲಿ ಪ್ರವಾಸಿ ತಂಡವನ್ನು ಕೇವಲ 60 ರನ್​ಗಳಿಗೆ ಆಲೌಟ್ ಮಾಡಿದೆ. ಇದು ನ್ಯೂಜಿಲ್ಯಾಂಡ್ ಟಿ20 ಚರಿತ್ರೆಯಲ್ಲೇ ದಾಖಲಾದ ಅತ್ಯಂತ ಕಡಿಮೆ ಮೊತ್ತವಾಗಿದೆ.

ಆರಂಭಿಕ ಬ್ಯಾಟ್ಸ್​ಮನ್ ಟಾಮ್ ಬ್ಲಂಡೆಲ್(2), ರಚಿನ್ ರವೀಂದ್ರ (0), ವಿಲ್ ಯಂಗ್(5), ಕಾಲಿನ್ ಡಿ ಗ್ರ್ಯಾಂಡ್​ಹೋಮ್​(1), ಕೋಲ್ ಮೆಕಾಂಚಿ(0) ಡಾಗ್ ಬ್ರೇಸ್​ವೆಲ್(5) ,ಅಜಾಜ್ ಪಟೇಲ್(3), ಜಾಕೋಬ್​ ಡಫ್ಫಿ(3) ಒಂದಂಕಿ ಮೊತ್ತಕ್ಕೆ ವಿಕೆಟ್​ ಒಪ್ಪಿಸಿದರು.

ಮಾರಕ ಬೌಲಿಂಗ್ ದಾಳಿ ನಡೆಸಿದ ಬಾಂಗ್ಲಾ ಬೌಲರ್​ಗಳಲ್ಲಿ ಮುಸ್ತಫಿಜುರ್ ರಹಮಾನ್​ 13ಕ್ಕೆ 3, ಮೊಹಮ್ಮದ್ ಸೈಫುದ್ದೀನ್​ 7ಕ್ಕೆ 2, ಶಕಿಬ್ ಅಲ್ ಹಸನ್ 10ಕ್ಕೆ 2, ನಾಸುಮ್ ಅಹ್ಮದ್​ 5ಕ್ಕೆ 2, ಮೆಹೆದಿ ಹಸನ್​ 15ಕ್ಕೆ1 ವಿಕೆಟ್ ಪಡೆದು ಕಿವೀಸ್​ ಬ್ಯಾಟ್ಸ್​ಮನ್​ಗಳನ್ನು ಅಲ್ಪಮೊತ್ತಕ್ಕೆ ಆಲೌಟ್ ಮಾಡಿದರು.

ಆರಂಭದಲ್ಲೇ ಮುಗ್ಗರಿಸಿದ್ದ ಬಾಂಗ್ಲಾ

61ರನ್​ಗಳ ಗೆಲುವಿನ ಗುರಿ ಬೆನ್ನತ್ತಿದ್ದ ಬಾಂಗ್ಲಾದೇಶ ಕೂಡ ಆರಂಭದಲ್ಲೇ ಆಘಾತಕ್ಕೊಳಗಾಯಿತು. ಕೇವಲ 7ರನ್​ಗಳಿಕೆ ಮಾಡುವಷ್ಟರಲ್ಲಿ 2 ವಿಕೆಟ್​ ಕಳೆದುಕೊಂಡಿತು. ಇದಾದ ಬಳಿಕ ಒಂದಾದ ಶಕೀಬ್​ ಅಲ್ ಹಸನ್​​(25ರನ್​), ಮುಸ್ತುಫೀಜುರ್​​(16)ರನ್​ಗಳ ಜೊತೆಯಾಟದಿಂದ ತಂಡವನ್ನ ಗೆಲುವಿನತ್ತ ಕೊಂಡ್ಯೊಯ್ದರು. ಶಕೀಬ್​ ವಿಕೆಟ್​ ಪತನಗೊಳ್ಳುತ್ತಿದ್ದಂತೆ ಕ್ಯಾಪ್ಟನ್​​ ಮುಹಮ್ಮದುಲ್ಲಾ ಅಜೇಯ 14ರನ್​ಗಳಿಕೆ ಮಾಡಿ ತಂಡವನ್ನ ಗೆಲುವಿನ ದಡ ಸೇರಿಸಿದರು. ಕೊನೆಯದಾಗಿ ತಂಡ 15 ಓವರ್​ಗಳಲ್ಲಿ 3ವಿಕೆಟ್​ನಷ್ಟಕ್ಕೆ 62ರನ್​ಗಳಿಕೆ ಮಾಡಿ ಗೆಲುವು ಸಾಧಿಸಿತು.

ತಂಡದ ಪರ ಬೌಲಿಂಗ್ ಹಾಗೂ ಬ್ಯಾಟಿಂಗ್​ನಲ್ಲಿ ಮಿಂಚಿದ ಆಲ್​ರೌಂಡರ್ ಶಕೀಬ್​ ಅಲ್​ ಹಸನ್​​ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.