T20 ವಿಶ್ವಕಪ್ ಕ್ವಾಲಿಫೈಯರ್​​ನಲ್ಲಿ ಕೇವಲ 8 ರನ್​​ಗಳಿಗೆ ನೇಪಾಳ ತಂಡ ಆಲೌಟ್​!

2023ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲಿರುವ ಮಹಿಳೆಯರ ಅಂಡರ್​ 19 ಟಿ20 ವಿಶ್ವಕಪ್​​ಗೋಸ್ಕರ ಈಗಾಗಲೇ ಅರ್ಹತಾ ಪಂದ್ಯ ಶುರುವಾಗಿವೆ. ನಿನ್ನೆ ನಡೆದ ನೇಪಾಳ-ಯುಎಇ ನಡುವಿನ ಪಂದ್ಯದಲ್ಲಿ ಕಳಪೆ ದಾಖಲೆ ನಿರ್ಮಾಣವಾಗಿದೆ.

ಯುಎಇ: ವಿಶ್ವ ಕ್ರಿಕೆಟ್ ದುನಿಯಾದಲ್ಲಿ ಪ್ರತಿದಿನ ಒಂದಿಲ್ಲೊಂದು ವಿಭಿನ್ನ, ವಿಚಿತ್ರ ದಾಖಲೆ ಮೂಡಿ ಬರುತ್ತಲೇ ಇರುತ್ತವೆ. ಇದೀಗ ನಂಬಲು ಸಾಧ್ಯವಿಲ್ಲದಂತಹ ಕಳಪೆ ರೆಕಾರ್ಡ್​ವೊಂದು ಮೂಡಿ ಬಂದಿದೆ. ಐಸಿಸಿ ಅಂಡರ್​​-19 ಮಹಿಳೆಯರ ಟಿ-20 ವಿಶ್ವಕಪ್​ನ ಅರ್ಹತಾ ಪಂದ್ಯದಲ್ಲಿ ನೇಪಾಳ ತಂಡ ಕೇವಲ 8ರನ್​​ಗಳಿಗೆ ಆಲೌಟ್​ ಆಗಿದೆ. ಈ ಮೂಲಕ ವಿಶ್ವ ಕ್ರಿಕೆಟ್​ನಲ್ಲಿ ಅತಿ ಕಡಿಮೆ ರನ್​​ಗಳಿಗೆ ಆಲೌಟ್​ ಆಗಿರುವ ಮಹಿಳಾ ತಂಡವಾಗಿ ಹೊರಹೊಮ್ಮಿದೆ.

ಐದು ವಿಕೆಟ್ ಪಡೆದು ಮಿಂಚಿದ ಯುಎಇ ತಂಡದ ಬೌಲರ್​

ಐಸಿಸಿ ಅಂಡರ್​-19 ಟಿ20 ವಿಶ್ವಕಪ್ ಕ್ವಾಲಿಫೈಯರ್​ ಪಂದ್ಯದಲ್ಲಿ ನೇಪಾಳ ಹಾಗೂ ಯುಎಇ ಮಹಿಳಾ ತಂಡ ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್​ ಮಾಡಿದ ನೇಪಾಳ ತಂಡ 8.1 ಓವರ್​​ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು ಆಲೌಟ್​ ಆಗಿದೆ. ಈ ಗುರಿ ಮುಟ್ಟಲು ಎದುರಾಳಿ ತಂಡ ಯುಎಇ ತೆಗೆದುಕೊಂಡಿದ್ದು ಮಾತ್ರ 1.1 ಓವರ್​. ಶನಿವಾರ ಈ ಪಂದ್ಯ ನಡೆದಿದ್ದು, ಯುನೈಟೆಡ್​ ಅರಬ್​ ಎಮಿರೇಟ್ಸ್ ವಿರುದ್ಧ ನೇಪಾಳ ಮಹಿಳಾ ಪಡೆ ಇಂತಹದೊಂದು ಕಳಪೆ ಸಾಧನೆಯನ್ನು ದಾಖಲಿಸಿದೆ.

ಅಂಡರ್​ 19 ಟಿ20 ವಿಶ್ವಕಪ್​​ ಅರ್ಹತಾ ಪಂದ್ಯದಲ್ಲಿ ನೇಪಾಳ, ಯುಎಇ, ಥಾಯ್ಲೆಂಡ್​, ಭೂತಾನ್ ಮತ್ತು ಕತಾರ್ ಭಾಗಿಯಾಗಿವೆ. ಇಲ್ಲಿ ಗೆಲುವು ಸಾಧಿಸುವ ತಂಡ ಮುಂದಿನ ವರ್ಷ ದಕ್ಷಿಣ ಆಫ್ರಿಕಾದಲ್ಲಿ ನಡೆಯುವ ಟೂರ್ನಿಯಲ್ಲಿ ಅವಕಾಶ ಗಿಟ್ಟಿಸಿಕೊಳ್ಳಲಿದೆ. ನೇಪಾಳ ತಂಡದ ಪರ ಆರು ಬ್ಯಾಟರ್​ಗಳು ಯಾವುದೇ ಸ್ಕೋರ್ ಗಳಿಕೆ ಮಾಡದೇ ಔಟಾದರೆ, ಸ್ನೇಹ ಮಹಾರಾ ಮೂರು ರನ್​ ಹಾಗೂ ಮನೀಶಾ ರಾಣಾ ಎರಡು ರನ್​ಗಳಿಸಿದರು. ಯುಎಇ ಪರ ಬೌಲಿಂಗ್ ಮಾಡಿದ ಆಫ್​ ಸ್ಪಿನ್ನರ್​ ಮಹಿಕಾ ಗೌರ್​ 5ವಿಕೆಟ್ ಪಡೆದು ಮಿಂಚಿದರು.