ಮುಂಬೈ ವೇಗಿಗಳ ದಾಳಿಗೆ ಧೂಳಿಪಟವಾದ ರಾಜಸ್ಥಾನ್​ : ರೋಹಿತ್​​ ಪಡೆ ಗೆಲ್ಲಲು 91 ರನ್​ಗಳ ಗುರಿ

ನೇಥನ್ ಕೌಲ್ಟರ್​ ನೈಲ್, ಜಸ್ಪ್ರೀತ್ ಬುಮ್ರಾ ಮತ್ತು ಜಿಮ್ಮಿ ನೀಶಮ್ ದಾಳಿಗೆ ತತ್ತರಿಸಿದ ರಾಜಸ್ಥಾನ್​ ರಾಯಲ್ಸ್​ 100 ಗಟಿದಾಟಲು ಸಾಧ್ಯವಾಗದೇ ಕೇವಲ 91 ರನ್​ಗಳ ಅಲ್ಪ ಮೊತ್ತದ ಗುರಿ ನೀಡಿದೆ.

ಶಾರ್ಜಾ: ಮುಂಬೈ ವೇಗಿಗಳ ಮಾರಕ ಬೌಲಿಂಗ್ ದಾಳಿಗೆ ತತ್ತರಿಸಿದ ರಾಜಸ್ಥಾನ್​ ರಾಯಲ್ಸ್​ ಪ್ಲೇ ಆಫ್​ ಪ್ರವೇಶಿಸಲು ಗೆಲ್ಲಲೇ ಬೇಕಾದ ಪಂದ್ಯದಲ್ಲಿ ರೋಹಿತ್ ಪಡೆಗೆ ಕೇವಲ 91 ರನ್​ಗಳ ಸಾಧಾರಣ ಗುರಿ ನೀಡಿದೆ.

ಟಾಸ್​ ಗೆದ್ದ ಮುಂಬೈ ಇಂಡಿಯನ್ಸ್​ ನಾಯಕ ರೋಹಿತ್ ರಾಜಸ್ಥಾನಕ್ಕೆ ಬ್ಯಾಟಿಂಗ್ ಆಹ್ವಾನ ನೀಡಿತು. ಅಲ್ಲದೇ ಪವರ್​ ಪ್ಲೇ ಮುಗಿಯುವುದರೊಳಗೆ ಎವಿನ್ ಲೂಯಸ್​(24) ಮತ್ತು ಯಶಸ್ವಿ ಜೈಸ್ವಾಲ್​(12) ರನ್ನು ಪೆವಿಲಿಯನ್​ಗಟ್ಟುವಲ್ಲಿ ಬುಮ್ರಾ ಮತ್ತು ಕೌಲ್ಟರ್​ ನೈಲ್ ಯಶಸ್ವಿಯಾದರು.

ಕ್ವಿಂಟನ್​ ಡಿಕಾಕ್​ ಜಾಗದಲ್ಲಿ ಅವಕಾಶ ಪಡೆದಿದ್ದ ಕಿವೀಸ್ ಆಲ್​ರೌಂಡರ್​ ಜಿಮ್ಮಿ ನೀಶಮ್ ತಮ್ಮ ಮೊದಲ ಓವರ್​ನಲ್ಲೇ ಉತ್ತಮ ಲಯದಲ್ಲಿದ್ದ ರಾಜಸ್ಥಾನ್​ ನಾಯಕ ಸಂಜು ಸಾಮ್ಸನ್​(3) ಮತ್ತು ಶಿವಂ ದುಬೆ(3) ವಿಕೆಟ್​ ಪಡೆದು ರಾಜಸ್ಥಾನಕ್ಕೆ ಮರ್ಮಾಘಾತ ನೀಡಿದರು. ಗ್ಲೇನ್ ಫಿಲಿಫ್ಸ್(4)ರನ್ನು ಕೌಲ್ಟರ್​ ಲೈನ್​ ಬೌಲ್ಡ್​ ಮಾಡುವ ಮೂಲಕ ಕೇವ 10 ಓವರ್​ನೊಳಗೆ ರಾಜಸ್ಥಾನದ ಅರ್ಧ ತಂಡ ಪೆವಿಲಿಯನ್ ಸೇರಿಕೊಂಡಿತು.

ಈ ಹಂತದಲ್ಲಿ ಒಂದಾದ ಮಿಲ್ಲರ್(15) ಮತ್ತು ತೆವಾಟಿಯಾ(12) 5 ಓವರ್​ಗ​ಳವರಗೆ ವಿಕೆಟ್​ ಕಾಯ್ದುಕೊಂಡರೆ ಹೊರೆತು ರನ್​ಗತಿ ಏರಿಸುವಲ್ಲಿ ವಿಫಲರಾದರು. ತೆವಾಟಿಯಾ ನೀಶಮ್​ಗೆ ವಿಕೆಟ್​ ಒಪ್ಪಿಸಿದರೆ, ಮಿಲ್ಲರ್​ ಕೌಲ್ಟರ್​ ನೈಲ್​ಗೆ 3ನೇ ಬಲಿಯಾದರು.

ಉಳದಂತೆ ಶ್ರೇಯಸ್ ಗೋಪಾಲ್​ ಶೂನ್ಯಕ್ಕೆ ಬುಮ್ರಾ ಓವರ್​ನಲ್ಲಿ ಕೀಪರ್​ಗೆ ಕ್ಯಾಚ್​ ನೀಡಿ ಔಟಾದರೆ ಚೇತನ್ ಸಕಾರಿಯಾ 6ರನ್​ಗಳಿಸಿ ನೈಲ್​ ಬೌಲಿಂಗ್​ನಲ್ಲಿ ಕ್ಲೀನ್ ಬೌಲ್ಡ್ ಆದರು. ಒಟ್ಟಾರೆ 20 ಓವರ್​ಗಳಲ್ಲಿ ರಾಜಸ್ಥಾನ್​​ 9 ವಿಕೆಟ್ ಕಳೆದುಕೊಂಡು 90 ರನ್​ಗಳಿಗೆ ಸುಸ್ತಾಯಿತು.

ನೇಥನ್ ಕೌಲ್ಟರ್ ನೈಲ್ 14ಕ್ಕೆ4, ಜಿಮ್ಮಿ ನೀಶಮ್​ 12ಕ್ಕೆ 3 ಮತ್ತು ಬುಮ್ರಾ 14ಕ್ಕೆ 2 ವಿಕೆಟ್​ ಪಡೆದು ರಾಜಸ್ಥಾನ್​ಗೆ ಆರಂಭದಿಂದ ಅಂತ್ಯದವರೆಗೆ ಚೇತರಿಸಿಕೊಳ್ಳಲಾಗದಂತೆ ಮಾಡಿದರು ಜೊತೆ 100ರ ಗಡಿದಾಟದಂತೆ ತಡೆಯುವಲ್ಲಿ ಸಫಲರಾದರು.

ಇದನ್ನು ಓದಿ:ಪಾಂಡ್ಯ ಬೌಲಿಂಗ್ ಮಾಡದಿರುವುದು ಮುಂಬೈಗಷ್ಟೇ ಅಲ್ಲ, ಭಾರತಕ್ಕೂ ದೊಡ್ಡ ನಷ್ಟ: ಗವಾಸ್ಕರ್