'ಇನ್ನು ಸಾಕು, ವಿಶ್ವಕಪ್​ ನಿಲ್ಲಿಸಿ ಬಿಡಿ': ಪಾಕ್​-ಭಾರತ ಪಂದ್ಯಕ್ಕೆ ಆಸ್ಟ್ರೇಲಿಯಾ ಕ್ರಿಕೆಟಿಗನ ಕಮೆಂಟ್​

ಭಾರತ-ಪಾಕಿಸ್ತಾನ ನಡುವಿನ ಪಂದ್ಯ ವಿಶ್ವಕ್ಕೆ ಅಚ್ಚರಿ ಮೂಡಿಸಿದೆ. ವಿರಾಟ್​ ಕೊಹ್ಲಿಯ ಹೋರಾಟದಿಂದ ಭಾರತಕ್ಕೆ ಸಿಕ್ಕ ಜಯದಿಂದ ಕ್ರಿಕೆಟ್​ ಪಂಡಿತರು ಬ್ಯಾಟಿಂಗ್​ ಕಿಂಗ್​ಗೆ ಫುಲ್​ ಮಾರ್ಕ್ಸ್​ ನೀಡಿದ್ದಾರೆ. ಆಸ್ಟ್ರೇಲಿಯಾ ಕ್ರಿಕೆಟಿಗ ಮಿಷೆಲ್ ಮಾರ್ಷ್‌ ಪ್ರತಿಕ್ರಿಯೆ ವಿಶೇಷವಾಗಿತ್ತು.

ಮೆಲ್ಬರ್ನ್​(ಆಸ್ಟ್ರೇಲಿಯಾ):ಭಾರತ ಮತ್ತು ಪಾಕಿಸ್ತಾನ ಮಧ್ಯೆ ನಡೆದ ಗುಂಪು ಹಂತದ ಪಂದ್ಯ ಸಾಕಷ್ಟು ರೋಚಕತೆ ಉಂಟುಮಾಡಿತ್ತು. ಕೊನೆಯ ಎಸೆತದವರೆಗೂ ಅಭಿಮಾನಿಗಳನ್ನು ತುದಿಗಾಲ ಮೇಲೆ ನಿಲ್ಲಿಸಿದ್ದ ಪಂದ್ಯವನ್ನು ಚೇಸ್ ಮಾಸ್ಟರ್​ ವಿರಾಟ್​ ಕೊಹ್ಲಿ ಗೆಲ್ಲಿಸಿ ಕೊಟ್ಟ ಪರಿಯೇ ಅದ್ಭುತ.

ಪಂದ್ಯವನ್ನು ಭಾರತ 4 ವಿಕೆಟ್​ಗಳಿಂದ ಗೆದ್ದ ಬಳಿಕ ಕ್ರಿಕೆಟ್​ ಪಂಡಿತರು ಮತ್ತು ಅಭಿಮಾನಿಗಳ ಬಾಯಲ್ಲಿ ವಿರಾಟ್​ ಕೊಹ್ಲಿಯದ್ದೇ ಗುಣಗಾನ. ಪಂದ್ಯದ ರೋಚಕತೆ ಹೆಚ್ಚಿಸಿದ ವಿರಾಟ್​ಗೆ ಎಲ್ಲರೂ ಫುಲ್​ಮಾರ್ಕ್​ ಕೊಟ್ಟಿದ್ದಾರೆ. ಈ ಹಾದಿಯಲ್ಲಿ ಇನ್ನೊಂದು ಹೆಜ್ಜೆ ಮುಂದೆ ಹೋಗಿರುವ ಆಸ್ಟ್ರೇಲಿಯಾ ತಂಡದ ಆಲ್​ರೌಂಡರ್​ ಮಿಚೆಲ್​ ಮಾರ್ಷ್​, "ಇನ್ನು ಸಾಕು, ವಿಶ್ವಕಪ್​ ಅನ್ನೇ ನಿಲ್ಲಿಸಿಬಿಡಿ" ಎಂದಿದ್ದಾರೆ.

ಆಸ್ಟ್ರೇಲಿಯಾ- ಶ್ರೀಲಂಕಾ ಪಂದ್ಯಕ್ಕೂ ಮುನ್ನ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಇಂತಹದ್ದೊಂದು ರೋಚಕ ಪಂದ್ಯವನ್ನು ನೋಡಿದ ಬಳಿಕ ವಿಶ್ವಕಪ್​ ಆಡಿಸುವುದೇ ಬೇಡ ಅನ್ನಿಸಿದೆ. ಭಾರತ-ಪಾಕ್ ನಡುವಿನ ಪಂದ್ಯಕ್ಕಿಂತ ಉತ್ತಮವಾದ ಆಟವನ್ನು ವೀಕ್ಷಿಸಲು ಸಾಧ್ಯವೇ?. ಟಿ20 ವಿಶ್ವಕಪ್‌ಗೆ ಇನ್ನೂ ಮೂರು ವಾರ ಬಾಕಿ ಇದೆ. ಅದಕ್ಕೂ ಮುನ್ನವೇ ಅಭಿಮಾನಿಗಳು ಇದೊಂದು ಪಂದ್ಯದಿಂದ ಎಲ್ಲ ಖುಷಿ ಅನುಭವಿಸಿದ್ದಾರೆ. ಹೀಗಾಗಿ ವಿಶ್ವಕಪ್​ ಇಲ್ಲಿಗೆ ನಿಲ್ಲಿಸಿದರೂ ಒಕೆ ಎಂದು ತಮಾಷೆ ಮಾಡಿದ್ದಾರೆ.

ಭಾರತ-ಪಾಕ್ ಪಂದ್ಯವನ್ನು ಕ್ರೀಡಾಂಗಣದಲ್ಲಿ 90 ಸಾವಿರಕ್ಕೂ ಅಧಿಕ ಕ್ರಿಕೆಟ್ ಅಭಿಮಾನಿಗಳು ನೋಡಿದ್ದಾರೆ. ಅವರಲ್ಲಿ ನಾನು ಒಬ್ಬನಾಗಿದ್ದರೆ ಹೇಗಿರುತ್ತಿತ್ತು ಎಂದು ಊಹಿಸಿಕೊಳ್ಳುತ್ತಿದ್ದೇನೆ. ಕ್ಲಿಷ್ಟಕರ ಸನ್ನಿವೇಶಗಳಲ್ಲಿ ಅಮೋಘ ಆಟವಾಡಿದ ವಿರಾಟ್ ಕೊಹ್ಲಿಗೆ ಎಲ್ಲ ಶ್ರೇಯ ಸಲ್ಲಬೇಕು. ಆತನ ಕ್ರಿಕೆಟ್​ ಜೀವನವೇ ಅದ್ಭುತವಾಗಿದೆ. ಹಲವು ಏರಿಳಿತಗಳನ್ನು ಎದುರಿಸಿದ ಬಳಿಕ ಟಿ20 ವಿಶ್ವಕಪ್‌ನಲ್ಲಿ ತಮ್ಮ ಖದರ್​ ತೋರಿಸಿದ್ದಾರೆ. ಅಸಾಧ್ಯವಾದುದನ್ನು ಮಾಡಿ ತೋರಿಸಿದ್ದಾರೆ. ಇಂತಹ ಪವಾಡಗಳು ಇನ್ನಷ್ಟು ನಡೆಯಲಿ ಎಂದು ಮಾರ್ಷ್‌ ಆಶಿಸಿದರು.

ಚುಟುಕು ಮಾದರಿಯ ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾ ಮೊದಲ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್​ ವಿರುದ್ಧ ಹೀನಾಯವಾಗಿ ಸೋಲು ಕಂಡಿತ್ತು.

ಇದನ್ನೂ ಓದಿ:ಗೆಲುವಿನ ರೂವಾರಿ ವಿರಾಟ್​ ಎತ್ತಿ ಮುದ್ದಾಡಿದ ಇರ್ಫಾನ್​: ಸುನಿಲ್ ಗವಾಸ್ಕರ್, ಶ್ರೀಕಾಂತ್ ಡ್ಯಾನ್ಸ್​ ಮಾಡಿ ಸಂಭ್ರಮ