ಮ್ಯಾಕ್ಸ್​ವೆಲ್ ಈ ಬಾರಿ ಆರ್​ಸಿಬಿ ಯಶಸ್ಸಿನಲ್ಲಿ ಪ್ರಮುಖ ಪಾತ್ರ ವಹಿಸಲಿದ್ದಾರೆ: ಕೋಚ್ ಕ್ಯಾಟಿಚ್

ಕಳೆದ ಐಪಿಎಲ್​ನಲ್ಲಿ ಪಂಜಾಬ್ ಕಿಂಗ್ಸ್ ತಂಡ ಕೈಬಿಟ್ಟರೂ ಮ್ಯಾಕ್ಸ್​ವೆಲ್​ ಮೇಲೆ ಭರವಸೆಯಿಟ್ಟು ಆರ್​ಸಿಬಿ ದುಬಾರಿ ಬೆಲೆಗೆ ಖರೀದಿಸಿತ್ತು. ಕ್ಯಾಟಿಚ್ ಪ್ರಕಾರ ಮ್ಯಾಕ್ಸ್​ವೆಲ್​ ಈ ಬಾರಿ ತಂಡಕ್ಕೆ ಬಹುಮುಖ ಪ್ರತಿಭೆಯಾಗಿ ನೆರವಾಗಲಿದ್ದಾರೆ ಎಂದು ತಿಳಿಸಿದ್ದಾರೆ.

ಚೆನ್ನೈ:ಐಪಿಎಲ್​ನ ಆರಂಭದಲ್ಲೇ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ತೋರುವ ಮೂಲಕ ಆಸ್ಟ್ರೇಲಿಯಾದ ಆಲ್​ರೌಂಡರ್​ ಗ್ಲೇನ್ ಮ್ಯಾಕ್ಸ್​ವೆಲ್ ಆರ್​ಸಿಬಿಗೆ ಬಹುಪಯೋಗಿ ಆಟಗಾರನೆಂದು ಸಾಬೀತುಪಡಿಸಿದ್ದಾರೆ ಎಂದು ಬೆಂಗಳೂರ ಫ್ರಾಂಚೈಸಿ ಮುಖ್ಯ ಕೋಚ್ ಸೈಮನ್ ಕ್ಯಾಟಿಚ್ ಅಭಿಪ್ರಾಯಪಟ್ಟಿದ್ದಾರೆ.

ಫೆಬ್ರವರಿಯಲ್ಲಿ ನಡೆದ ಐಪಿಎಲ್ ಹರಾಜಿನಲ್ಲಿ 32 ವರ್ಷದ ಆಸೀಸ್ ಆಲ್​ರೌಂಡರ್​ರನ್ನು ಆರ್​ಸಿಬಿ ಸಿಎಸ್​ಕೆ ಜೊತೆಗೆ ಭಾರಿ ಪೈಪೋಟಿ ನಡೆಸಿ 14.25 ಕೋಟಿ ರೂ.ಗಳಿಗೆ ಖರೀದಿಸಿತ್ತು. ಇದೀಗ ಮೊದಲೆರಡು ಪಂದ್ಯಗಳಲ್ಲೇ ತಾವು ಪಡೆದ ಮೊತ್ತಕ್ಕೆ ಸತತ 2 ಅದ್ಭುತ ಇನ್ನಿಂಗ್ಸ್​ ಮೂಲಕ ಮ್ಯಾಕ್ಸ್​ವೆಲ್ ನ್ಯಾಯ ಒದಗಿಸಿಕೊಟ್ಟಿದ್ದಾರೆ. ಜೊತೆಗೆ ಐಪಿಎಲ್​ನಲ್ಲಿ ದೀರ್ಘ ಕಾಲದಿಂದಲೂ ಹೊಂದಿರುವ ಕಳಪೆ ಪ್ರದರ್ಶನದ ಟ್ಯಾಗ್ ಕಳಚಲು ಎದುರು ನೋಡುತ್ತಿದ್ದಾರೆ ಎಂದು ಆರ್​ಸಿಬಿ ಕೋಚ್ ಕ್ಯಾಟಿಚ್​ ತಿಳಿಸಿದ್ದಾರೆ.

"ಅವರು (ಮ್ಯಾಕ್ಸ್​ವೆಲ್) ತುಂಬಾ ಪ್ರಬುದ್ಧತೆ ತೋರುತ್ತಿದ್ದಾರೆ. ಅದರಲ್ಲೂ ಈ ದಿನದ(ಹೈದರಾಬಾದ್ ವಿರುದ್ಧ) ಪಂದ್ಯದಲ್ಲಿ ಅವರ ಆಟ ಅದ್ಭುತವಾಗಿತ್ತು. ಅವರ ಸುತ್ತಲಿನ ಬ್ಯಾಟ್ಸ್​ಮನ್​ಗಳು ವಿಕೆಟ್ ಕೈಚೆಲ್ಲುತ್ತಿದ್ದರೆ, ಇವರು ಮಾತ್ರ ಪರಿಸ್ಥಿತಿಯನ್ನು ಚೆನ್ನಾಗಿ ಅರ್ಥೈಸಿಕೊಂಡು ಆಟವನ್ನು ಮತ್ತಷ್ಟು ಆಳಕ್ಕೆ ಕೊಂಡೊಯ್ದರು. ಕೊನೆಯಲ್ಲಿ ತಂಡಕ್ಕೆ ಅಗತ್ಯವಿದ್ದ ತ್ವರಿತ ರನ್​ಗಳನ್ನು ದೊರೆಕಿಸಿಕೊಟ್ಟಿರುವುದರ ಶ್ರೇಯ ಅವರ ಅಪಾರ ಅನುಭವಕ್ಕೆ ಸಲ್ಲುತ್ತದೆ" ಎಂದು ಕ್ಯಾಟಿಚ್ ಪಂದ್ಯದ ನಂತರ ಹೇಳಿದ್ದಾರೆ.

ಕಳೆದ ಐಪಿಎಲ್​ನಲ್ಲಿ ಪಂಜಾಬ್ ಕಿಂಗ್ಸ್ ತಂಡದಲ್ಲಿದ್ದ ಮ್ಯಾಕ್ಸ್​ವೆಲ್ 13 ಪಂದ್ಯಗಳಿಂದ ಕೇವಲ 15.42ರ ಸರಾಸರಿಯಲ್ಲಿ 108 ರನ್ ​ಗಳಿಸಿದ್ದರು. ಬ್ಯಾಟಿಂಗ್​ನಲ್ಲೂ ವೈಫಲ್ಯ ಅನುಭವಿಸಿದ್ದ ಅವರು ಅಷ್ಟು ಪಂದ್ಯಗಳಿಂದ ಒಂದೇ ಒಂದು ಸಿಕ್ಸರ್​ ಸಿಡಿಸಲು ಸಹ ವಿಫಲರಾಗಿದ್ದರು. ಕಾರಣ ಪಂಜಾಬ್​ ಅವರನ್ನು ಹರಾಜಿಗೂ ಮುನ್ನ ತಂಡದಿಂದ ಕೈಬಿಟ್ಟಿತ್ತು.

ಆದರೂ ಮ್ಯಾಕ್ಸ್​ವೆಲ್​ ಮೇಲೆ ಭರವಸೆಯಿಟ್ಟು ಆರ್​ಸಿಬಿ ದುಬಾರಿ ಬೆಲೆಗೆ ಖರೀದಿಸಿತ್ತು. ಕ್ಯಾಟಿಚ್ ಪ್ರಕಾರ ಮ್ಯಾಕ್ಸ್​ವೆಲ್​ ಈ ಬಾರಿ ತಂಡಕ್ಕೆ ಬಹುಮುಖ ಪ್ರತಿಭೆಯಾಗಿ ನೆರವಾಗಲಿದ್ದಾರೆ ಎಂದು ತಿಳಿಸಿದ್ದಾರೆ.

ಮ್ಯಾಕ್ಸ್​ವೆಲ್ ಕೇವಲ ಬ್ಯಾಟಿಂಗ್​ನಲ್ಲಿ ಅಲ್ಲದೆ, ಪೀಲ್ಡಿಂಗ್ ಸೆಟಪ್​ನಲ್ಲೂ ಕೊಹ್ಲಿಗೆ ನೆರವಾಗಲಿದ್ದಾರೆ. ಯಾವ ಫೀಲ್ಡರ್​ ಯಾವ ಸಮಯದಲ್ಲಿ ಎಲ್ಲಿ ನಿಲ್ಲಬೇಕು ಎನ್ನುವುದನ್ನು ಅವರು ಜವಾಬ್ದಾರಿಯುತವಾಗಿ ನಿರ್ವಹಿಸುತ್ತಿದ್ದಾರೆ. ಫೀಲ್ಡಿಂಗ್ ಅಭ್ಯಾಸದ ವೇಳೆ ಸಾಕಷ್ಟು ಯುವಕರನ್ನು ತಮ್ಮ ಜೊತೆ ಕರೆದೊಯ್ಯುತ್ತಾರೆ. ರನ್​ ಔಟ್ ಮತ್ತು ಕ್ಯಾಚ್​ಗಳಿಗೆ ಅವಕಾಶವನ್ನು ಹೇಗೆ ಪಡೆಯಬೇಕು ಎನ್ನುವ ವಿಚಾರದಲ್ಲಿ ಅವರು ತಂಡಕ್ಕೆ ನೆರವಾಗಿದ್ದಾರೆ ಎಂದು ಆಸೀಸ್ ಮಾಜಿ ಕ್ರಿಕೆಟಿಗ ಹೇಳಿದ್ದಾರೆ.

ಇದನ್ನು ಓದಿ:ಥ್ರಿಲ್ಲಿಂಗ್​​ ಪಂದ್ಯದಲ್ಲಿ ಗೆದ್ದ ಆರ್​ಸಿಬಿ.. ಡ್ರೆಸ್ಸಿಂಗ್​ ರೂಂನಲ್ಲಿ ತಂಡಕ್ಕೆ ಅಭಿನಂದನೆ ಸಲ್ಲಿಸಿದ ಕೊಹ್ಲಿ!