ಪ್ರತಿ ದಿಗ್ಗಜ ತಂಡವೂ ವೈಫಲ್ಯ ಅನುಭವಿಸಿವೆ: ರೋಹಿತ್ ಭಾವನಾತ್ಮಕ ಟ್ವೀಟ್

15ನೇ ಆವೃತ್ತಿಯಲ್ಲಿ ಮುಂಬೈ ತಂಡ ಅತ್ಯುತ್ತಮ ಪ್ರದರ್ಶನವನ್ನು ತೋರುವಲ್ಲಿ ವಿಫಲವಾಗಿದೆ ಎಂದು ನಾಯಕ ರೋಹಿತ್ ಒಪ್ಪಿಕೊಂಡಿದ್ದಾರೆ. ಆದಾಗ್ಯೂ, ಪ್ರಸಿದ್ಧ ತಂಡಗಳು ಇಂತಹ ಕಠಿಣ ಪರಿಸ್ಥಿತಿಯನ್ನು ಅನುಭವಿಸಿ ಮುಂದೆ ಹೋಗಿರುತ್ತವೆ, ಈ ಸಂದರ್ಭದಲ್ಲಿ ಎಲ್ಲರೂ ಒಂದಾಗಿರಬೇಕೆಂದು ತಿಳಿಸಿದ್ದಾರೆ.

ಮುಂಬೈ: ಕಳೆದ ಒಂದು ದಶಕದಲ್ಲಿ ಇಂಡಿಯನ್​ ಪ್ರೀಮಿಯರ್​ ಲೀಗ್​ನಲ್ಲಿ ಯಶಸ್ವಿಯಾಗಿದ್ದ ಮುಂಬೈ ಇಂಡಿಯನ್ಸ್ ತಂಡ ಪ್ರಸ್ತುತ ಆವೃತ್ತಿಯಲ್ಲಿ ಸತತ 8 ಸೋಲುಗಳನ್ನು ಕಂಡು ನಿರಾಶೆಯನುಭವಿಸಿದೆ. ನಾಯಕ ರೋಹಿತ್ ಶರ್ಮಾ ಕೂಡ ಇಡೀ ತಂಡ 15ನೇ ಆವೃತ್ತಿಯಲ್ಲಿ ತಮ್ಮ ಅತ್ಯುತ್ತಮ ಪ್ರದರ್ಶನವನ್ನು ತೋರುವಲ್ಲಿ ವಿಫಲವಾಗಿದ ಎಂದು ಒಪ್ಪಿಕೊಂಡಿದ್ದಾರೆ.

ಆದಾಗ್ಯೂ, ಪ್ರಸಿದ್ಧ ತಂಡಗಳು ಇಂತಹ ಕಠಿಣ ಪರಿಸ್ಥಿತಿಯನ್ನು ಅನುಭವಿಸಿ ಮುಂದೆ ಹೋಗಿರುತ್ತವೆ, ಈ ಸಂದರ್ಭದಲ್ಲಿ ಎಲ್ಲರೂ ಒಂದಾಗಿರಬೇಕೆಂದು ತಿಳಿಸಿದ್ದಾರೆ. ನಾವು ಪ್ರಸ್ತುತ ನಡಯುತ್ತಿರುವ ಟೂರ್ನಮೆಂಟ್​ನಲ್ಲಿ ನಮ್ಮ ಉತ್ತಮ ಪ್ರದರ್ಶನ ತೋರಿಲ್ಲ. ಆದರೆ, ಈ ರೀತಿ ನಡೆಯುತ್ತಿರುತ್ತವೆ. ಹಲವು ಕ್ರೀಡಾ ದೈತ್ಯರು ಇದೇ ರೀತಿ ಕಠಿಣ ಪರಿಸ್ಥಿತಿಯನ್ನು ಎದುರಿಸಿಯೇ ಹೋಗಿರುತ್ತಾರೆ.

ಆದರೆ, ನಾನು ಈ ತಂಡವನ್ನು ಮತ್ತು ಇಲ್ಲಿ ಪರಿಸರವನ್ನು ತುಂಬಾ ಇಷ್ಟಪಡುತ್ತೇನೆ. ಇಲ್ಲಿಯವರೆಗೂ ನಮ್ಮ ತಂಡದ ಮೇಲೆ ನಂಬಿಕೆ ಮತ್ತು ಅಂತ್ಯವಿಲ್ಲದ ನಿಷ್ಠೆ ತೋರಿಸಿದ ಹಿತೈಷಿಗಳನ್ನು ಪ್ರಶಂಸಿಸಲು ಬಯಸುತ್ತೇನೆ ಎಂದು ಮುಂಬೈ ಇಂಡಿಯನ್ಸ್ ತಂಡದ ನಾಯಕ ಟ್ವೀಟ್​ ಮಾಡಿದ್ದಾರೆ.

ಟೂರ್ನಮೆಂಟ್​ ಮೊದಲಾರ್ಧ ಮುಗಿದಿದೆ. ಆದರೆ, ಮುಂಬೈ ಇನ್ನೂ ಜಯ ಸಾಧಿಸಲು ಸಾಧ್ಯವಾಗಿಲ್ಲ. ಸ್ವತಃ ರೋಹಿತ್ ಶರ್ಮಾ ಕೂಡ ನಿರೀಕ್ಷಿತ ಪ್ರದರ್ಶನ ತೋರಿಲ್ಲ, ಜೊತೆಗಾರ ಇಶಾನ್​ ಕಿಶನ್ ತಾವು ಪಡೆದಿರುವ 15.25 ಕೋಟಿ ರೂಗಳಿಗೆ ತಕ್ಕಂತೆ ಪ್ರದರ್ಶನ ತೋರುವಲ್ಲಿ ಸಂಪೂರ್ಣ ವಿಫಲರಾಗಿದ್ದಾರೆ. ಅಲ್ಲದೇ ಬೌಲಿಂಗ್ ಘಟಕ ಕೂಡ ನಿರೀಕ್ಷಿತ ಪ್ರದರ್ಶನ ತೋರುತ್ತಿಲ್ಲ.

ಬುಮ್ರಾ ರನ್​ಗಳಿಗೆ ಕಡಿವಾಣ ಹಾಕುತ್ತಿದ್ದಾರೆ ಹೊರತು ವಿಕೆಟ್​ ಪಡೆಯುವಲ್ಲಿ ಹಿಂದೆ ಬಿದ್ದಿದ್ದಾರೆ. ಒಟ್ಟಾರೆ ಸಂಪೂರ್ಣ ತಂಡವಾಗಿ ವೈಫಲ್ಯ ಅನುಭವಿಸಿರುವ 5 ಬಾರಿಯ ಚಾಂಪಿಯನ್ಸ್ ಮುಂಬರುವ 6 ಪಂದ್ಯಗಳನ್ನಾದರೂ ಗೆದ್ದು ಅಭಿಮಾನಿಗಳ ಮುಖದಲ್ಲಿ ಸಂಭ್ರಮ ನೋಡುವುದಕ್ಕೆ ಬಯಸುತ್ತಿದೆ.

ಇದನ್ನೂ ಓದಿ:ಐಪಿಎಲ್​ನಲ್ಲಿ ಒಂದೇ ತಂಡದೆದರು ಹೆಚ್ಚು ಶತಕ ಸೇರಿದಂತೆ ರಾಹುಲ್ ನಿರ್ಮಿಸಿದ ದಾಖಲೆಗಳು ಇಲ್ಲಿವೆ