ರಣಜಿ ಟ್ರೋಫಿ: ಪಾಂಡಿಚೇರಿ ವಿರುದ್ಧ ಶತಕ ಸಿಡಿಸಿ ಅಬ್ಬರಿಸಿದ ದೇವದತ್​ ಪಡಿಕ್ಕಲ್​

21 ವರ್ಷದ ಯುವ ಬ್ಯಾಟರ್​ 165 ಎಸೆತಗಳಲ್ಲಿ 15 ಬೌಂಡರಿ ಸಹಿತ ಶತಕ ದಾಖಲಿಸಿದ್ದಾರೆ. ಇದು ಅವರ ಮೊದಲ ಪ್ರಥಮ ದರ್ಜೆ ಕ್ರಿಕೆಟ್ ಶತಕವಾಗಿದೆ.

ಚೆನ್ನೈ: ಪಾಂಡಿಚೇರಿ ವಿರುದ್ಧ ನಡೆಯುತ್ತಿರುವ ಲೀಗ್​ ಹಂತದ ಮೂರನೇ ರಣಜಿ ಪಂದ್ಯದಲ್ಲಿ ಕರ್ನಾಟಕ ತಂಡದ ಯುವ ಬ್ಯಾಟರ್​ ದೇವದತ್​ ಪಡಿಕ್ಕಲ್​ ಶತಕ ಸಿಡಿಸಿ ಅಬ್ಬರಿಸಿದರು. ಇದು ಅವರ ಮೊದಲ ಪ್ರಥಮ ದರ್ಜೆ ಶತಕವಾಗಿದೆ. ಈ ಹಿಂದೆ 99 ರನ್​ಗಳಿಸಿದ್ದು ಅವರ ಗರಿಷ್ಠ ಮೊತ್ತವಾಗಿತ್ತು.

ಕರ್ನಾಟಕ ತಂಡ 39 ರನ್​ಗಳಿಗೆ ಸಮರ್ಥ್​(11) ಮತ್ತು ಕರುಣ್ ನಾಯರ್​(6) ವಿಕೆಟ್​ ಕಳೆದುಕೊಂಡು ಆರಂಭಿಕ ಆಘಾತ ಅನುಭವಿಸಿತ್ತು. ಈ ಸಂದರ್ಭದಲ್ಲಿ ಅದ್ಭುತ ಲಯದಲ್ಲಿರುವ ಸಿದ್ಧಾರ್ಥ್​ ಕೆ.ವಿ ಜೊತೆಗೂಡಿದ ಪಡಿಕ್ಕಲ್​ 3ನೇ ವಿಕೆಟ್​ಗೆ 150 ಕ್ಕೂ ಹೆಚ್ಚು ರನ್​ಗಳ ಜೊತೆಯಾಟ ನಡೆಸಿ ತಂಡವನ್ನು ಸುಸ್ಥಿತಿಗೆ ತಂದಿದ್ದಾರೆ.

ಪಡಿಕ್ಕಲ್​ಗೆ ಸಾಥ್​ ನೀಡುತ್ತಿರುವ ಸಿದ್ಧಾರ್ಥ್​ 124 ಎಸೆತಗಳಲ್ಲಿ 10 ಬೌಂಡರಿ ಸಹಿತ ಅಜೇಯ 72 ರನ್​ಗಳಿಸಿ ಕ್ರೀಸ್​ನಲ್ಲಿದ್ದಾರೆ. ಮನೀಶ್​ ಪಾಂಡೆ ಪಡೆ 61 ಓವರ್​ಗಳಲ್ಲಿ 2 ವಿಕೆಟ್​ ಕಳೆದುಕೊಂಡು 204 ರನ್​ಗಳಿಸಿದೆ.

ಕರ್ನಾಟಕ ತಂಡ ಈಗಾಗಲೆ ರೈಲ್ವೇಸ್ ವಿರುದ್ಧ ಡ್ರಾ ಸಾಧಿಸಿದ್ದರೆ, 2ನೇ ಪಂದ್ಯದಲ್ಲಿ ಜಮ್ಮು ಕಾಶ್ಮೀರದ ವಿರುದ್ಧ ಗೆಲುವು ಸಾಧಿಸಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದುಕೊಂಡಿದೆ.

ಇದನ್ನೂ ಓದಿ:ವಿರಾಟ್‌ ಕೊಹ್ಲಿ 100ನೇ ಟೆಸ್ಟ್‌ ಪಂದ್ಯ ಗೆದ್ದು ಸ್ಮರಣೀಯವಾಗಿಸಲು ನಾಯಕ ರೋಹಿತ್‌ ಪಡೆ ರಣತಂತ್ರ..