ಚಂಡೀಗಢ: ಏಷ್ಯಾಕಪ್ ಟೂರ್ನಿಯ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ರೌದ್ರಾವತಾರ ತೋರಿದ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯಾರನ್ನು ಲೆಜೆಂಡರಿ ಕ್ರಿಕೆಟರ್ ಕಪಿಲ್ ದೇವ್ ಅವರು ಹಾಡಿ ಹೊಗಳಿದ್ದಾರೆ. ಪಾಂಡ್ಯಾ ಒಬ್ಬ ಶ್ರೇಷ್ಠ ಕ್ರೀಡಾಪಟು ಎಂದೂ ಬಣ್ಣಿಸಿದ್ದಾರೆ.
ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಅವರು, ಹಾರ್ದಿಕ್ ಪಾಂಡ್ಯಾ ಅವರಂತಹ ಶ್ರೇಷ್ಠ ಆಲ್ರೌಂಡರ್ಗಳ ಸ್ಥಿರ ಪ್ರದರ್ಶನ ತಂಡಕ್ಕೆ ಅನುಕೂಲ. ಪಾಂಡ್ಯಾ ಹಾಗೂ ರವೀಂದ್ರ ಜಡೇಜಾ ಅವರು ಬ್ಯಾಟಿಂಗ್, ಬೌಲಿಂಗ್ನಲ್ಲಿ ಮಿಂಚಿದರು. ಇಬ್ಬರೂ ಮಹಾನ್ ಆಟಗಾರರು ಎಂದು ಮೆಚ್ಚುಗೆ ಬಣ್ಣಿಸಿದರು.
ಯಾವುದೇ ಆಲ್‌ರೌಂಡರ್ಗಳು ತಂಡಕ್ಕೆ ಕೇಕ್ ಮೇಲಿನ ಚೆರ್ರಿ ಇದ್ದಂತೆ. ಹಾರ್ದಿಕ್ ಮತ್ತು ಜಡೇಜಾ ಅವರ ಆಟ ನಿಜಕ್ಕೂ ಅದ್ಭುತ. ಹಾರ್ದಿಕ್ ಬಗ್ಗೆ ನನಗೆ ತುಂಬಾ ಹೆಮ್ಮೆ ಇದೆ. ಆತನ ಆಟ ತಂಡಕ್ಕೆ ಎಂದಿಗೂ ಪ್ಲಸ್ ಆಗಿರುತ್ತದೆ. ಗಾಯಗೊಂಡಾಗ ಇಡೀ ತಂಡಕ್ಕೆ ನಷ್ಟವಾಗುತ್ತದೆ. ಆತನ ಸಾಮರ್ಥ್ಯದ ಬಗ್ಗೆ ಯಾರಿಗೂ ಅನುಮಾನವಿಲ್ಲ. ಆದರೆ, ಪಾಂಡ್ಯಾ ಪ್ರತಿ ಬಾರಿ ಗಾಯಕ್ಕೀಡಾಗುವುದು ಬೇಸರದ ಸಂಗತಿ ಎಂದು ಕಪಿಲ್ ದೇವ್ ಹೇಳಿದರು.
ವರ್ಷದ ಹಿಂದೆ ಮೊಣಕಾಲಿನ ಶಸ್ತ್ರಚಿಕಿತ್ಸೆಗೆ ಒಳಗಾದ ಪಾಂಡ್ಯಾ ಗಾಯದಿಂದ ಕ್ರಿಕೆಟ್ನಿಂದಲೇ ದೂರವುಳಿದಿದ್ದರು. ಚೇತರಿಕೆ ಬಳಿಕ ಭರ್ಜರಿ ಪ್ರದರ್ಶನ ನೀಡುತ್ತಿದ್ದು, ಐಪಿಎಲ್ನಲ್ಲಿ ಗುಜರಾತ್ ಟೈಟಾನ್ಸ್ ತಂಡವನ್ನು ಚಾಂಪಿಯನ್ ಮಾಡಿದರು. ಮೊನ್ನೆ ನಡೆದ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಬೌಲಿಂಗ್ನಲ್ಲಿ 3 ವಿಕೆಟ್ ಪಡೆದರೆ, ಬ್ಯಾಟಿಂಗ್ನಲ್ಲೂ ಮಿಂಚಿ 33 ರನ್ ಗಳಿಸಿದರು. ಹಾರ್ದಿಕ್ರ ಗೆಲುವಿನ ಹೊಡೆತಕ್ಕೂ ಮುನ್ನ ಅವರು ತೋರಿದ ಆತ್ಮವಿಶ್ವಾಸ ಸಂದೇಶ ಭಾರೀ ವೈರಲ್ ಆಗಿತ್ತು.