ಮಾಲಿಂಗ ದಾಖಲೆ ಮುರಿದ ಯಜುವೇಂದ್ರ ಚಹಲ್​: ಐಪಿಎಲ್​ ಟಾಪ್​ 2 ವಿಕೆಟ್​ ಟೇಕರ್​

ಐಪಿಎಲ್​ ಟೂರ್ನಿಯಲ್ಲಿ ಯಜುವೇಂದ್ರ ಚಹಲ್​ ವಿಶೇಷ ಸಾಧನೆ ಮಾಡಿದ್ದಾರೆ. ಅತಿ ಹೆಚ್ಚು ವಿಕೆಟ್​ ಪಡೆದವರ ಪಟ್ಟಿಯಲ್ಲಿ 2ನೇ ಸ್ಥಾನ ಪಡೆಯುವ ಮೂಲಕ ಲಂಕಾದ ಲಸಿತ್​ ಮಾಲಿಂಗ ದಾಖಲೆಯನ್ನು ಮುರಿದರು.

ನವದೆಹಲಿ:ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಪಂಜಾಬ್​ ವಿರುದ್ಧ ನಿನ್ನೆ ನಡೆದ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಸ್ಪಿನ್ನರ್​ ಯಜುವೇಂದ್ರ ಚಹಲ್ ವಿಶೇಷ ದಾಖಲೆ ನಿರ್ಮಿಸಿದ್ದಾರೆ. ಪಂದ್ಯದಲ್ಲಿ ಜಿತೇಂದ್ರ ಶರ್ಮಾರವನ್ನು ಔಟ್​ ಮಾಡುವ ಮೂಲಕ ಐಪಿಎಲ್​ನಲ್ಲಿ 171 ವಿಕೆಟ್​ ಪಡೆದರು. ಈ ಮೂಲಕ ಶ್ರೀಲಂಕಾದ ಮಾಜಿ ಆಟಗಾರನ ದಾಖಲೆಯನ್ನು ಮುರಿದರು.

ಐಪಿಎಲ್ ಟೂರ್ನಿಯಲ್ಲಿ ಮುಂಬೈ ಇಂಡಿಯನ್ಸ್ ಪರ ಅದ್ಭುತ ಬೌಲಿಂಗ್​ ಪ್ರದರ್ಶನ ನೀಡಿದ್ದ ಲಸಿತ್​ ಮಾಲಿಂಗ 120 ಪಂದ್ಯಗಳಲ್ಲಿ 170 ವಿಕೆಟ್​ ಪಡೆದು 2ನೇ ಸ್ಥಾನದಲ್ಲಿದ್ದರು. ಇದೀಗ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್‌ಗಳ ಪಟ್ಟಿಯಲ್ಲಿ ಯಜುವೇಂದ್ರ ಚಹಲ್​ ಲಗ್ಗೆ ಇಟ್ಟಿದ್ದಾರೆ. ಈ ಪಟ್ಟಿಯಲ್ಲಿ ದೀರ್ಘಕಾಲದಿಂದ ನಂಬರ್ ಒನ್ ಆಗಿ ಡ್ವೇನ್ ಬ್ರಾವೋ ಅವರು ಮುಂದುವರಿದಿದ್ದಾರೆ. ಕೆರೆಬಿಯನ್​ ಆಟಗಾರ 161 ಪಂದ್ಯಗಳಲ್ಲಿ 183 ವಿಕೆಟ್​ ಗಳಿಸಿದ್ದಾರೆ.

ಪಂಜಾಬ್​ ವಿರುದ್ಧದ ಪಂದ್ಯದಲ್ಲಿ ಯಜುವೇಂದ್ರ ಚಹಲ್ 4 ಓವರ್‌ಗಳಲ್ಲಿ 50 ರನ್ ನೀಡಿ 1 ವಿಕೆಟ್ ಪಡೆದರು. 16ನೇ ಓವರ್​ನ ನಾಲ್ಕನೇ ಎಸೆತದಲ್ಲಿ ಜಿತೇಶ್ ಶರ್ಮಾ ಅವರನ್ನು ಔಟ್​ ಮಾಡಿ ಈ ಸಾಧನೆ ಮಾಡಿದರು.

ಬ್ರಾವೋ ದಾಖಲೆಯತ್ತ ಗುರಿ:133 ಪಂದ್ಯವಾಡಿರುವ ಯಜುವೇಂದ್ರ ಚಹಲ್​ ಅದ್ಭುತ ಲಯದಲ್ಲಿದ್ದಾರೆ. ಟೀಂ ಇಂಡಿಯಾ ಪರವಾಗಿಯೂ ಉತ್ತಮ ಬೌಲಿಂಗ್​ ಸ್ಪೆಲ್​ ಹೊಂದಿದ್ದಾರೆ. ಅತಿ ಹೆಚ್ಚು ವಿಕೆಟ್​ ಪಡೆದವರ ಪಟ್ಟಿಯಲ್ಲಿ ನಂಬರ್​ 1 ಸ್ಥಾನದಲ್ಲಿರುವ ಚೆನ್ನೈ ಸೂಪರ್​ ಕಿಂಗ್ಸ್​ ತಂಡದ ಮಾಜಿ ಆಟಗಾರ ಡ್ವೇನ್​ ಬ್ರಾವೋ 183 ವಿಕೆಟ್​ ಗಳಿಸಿದ್ದಾರೆ. ಈ ದಾಖಲೆಯನ್ನು ಮೀರಲು ಚಹಲ್​ಗೆ ಇನ್ನೂ 12 ವಿಕೆಟ್​ ಬೇಕು. ಈ ಸೀಸನ್​ನಲ್ಲಿ 2 ಪಂದ್ಯಗಳನ್ನು ಮಾತ್ರ ಆಡಿರುವ ಆಟಗಾರ ಈ ದಾಖಲೆ ಮುರಿಯಲು ಅದ್ಭುತ ಅವಕಾಶ ಹೊಂದಿದ್ದಾರೆ.

ಡ್ವೇನ್​ ಬ್ರಾವೋ ಈಗಾಗಲೇ ಐಪಿಎಲ್​ಗೆ ವಿದಾಯ ಹೇಳಿದ್ದು, ಚೆನ್ನೈ ಸೂಪರ್​ಕಿಂಗ್ಸ್​ ತಂಡದ ತರಬೇತುದಾರರ ತಂಡದಲ್ಲಿದ್ದಾರೆ. ಇದು ಚಹಲ್​ಗೆ ವರದಾನವಾಗಿದೆ. ರಾಜಸ್ಥಾನ ರಾಯಲ್ಸ್​ ತಂಡದ ಪ್ರಮುಖ ಸ್ಪಿನ್ನರ್ ಆಗಿರುವ ಚಹಲ್​ ಅತಿಹೆಚ್ಚು ವಿಕೆಟ್​ ಪಟ್ಟಿಯಲ್ಲಿ ಅಗ್ರಜನಾಗಲು ಅವಕಾಶವಿದೆ.

ಅಮಿತ್​ ಮಿಶ್ರಾ ದಾಖಲೆ ಮುರಿದಿದ್ದ ಚಹಲ್​:ಐಪಿಎಲ್​ನಲ್ಲಿ ಯಶಸ್ವಿ ಬೌಲರ್​ಗಳ ಸಾಲಿನಲ್ಲಿರುವ ಯಜುವೇಂದ್ರ ಚಹಲ್​ ಕಳೆದ ಪಂದ್ಯದಲ್ಲಿ ಸಸನ್​ರೈಸರ್ಸ್​ ಹೈದರಾಬಾದ್​ ವಿರುದ್ಧ 17 ರನ್​ ನೀಡಿ ಪ್ರಮುಖ 4 ವಿಕೆಟ್​ ಪಡೆದಿದ್ದರು. ಪಂದ್ಯದಲ್ಲಿ ಮಿಂಚುವ ಮೂಲಕ 170 ನೇ ವಿಕೆಟ್​ ದಾಖಲಿಸಿದ ಬಲಗೈ ಸ್ಪಿನ್ನರ್​, ಭಾರತದ ಹಿರಿಯ ಸ್ಪಿನ್​ ಮಾಂತ್ರಿಕ ಅಮಿತ್​ ಮಿಶ್ರಾ ಅವರನ್ನು ಹಿಂದಿಕ್ಕಿದ್ದರು. ಮಿಶ್ರಾ ಐಪಿಎಲ್​ನಲ್ಲಿ 166 ವಿಕೆಟ್​ ಪಡೆದು ವಿಕೆಟ್ ಟೇಕರ್ ಪಟ್ಟಿಯಲ್ಲಿ 3 ನೇ ಸ್ಥಾನದಲ್ಲಿದ್ದರು.

ರಾಜಸ್ಥಾನ ರಾಯಲ್ಸ್​ಗೆ 5 ರನ್​ ಸೋಲು:ಪಂಜಾಬ್ ವಿರುದ್ಧದ ಪಂದ್ಯದಲ್ಲಿ ರಾಜಸ್ಥಾನ ರಾಯಲ್ಸ್​ ತಂಡ ಕೊನೆಯವರೆಗೂ ದಿಟ್ಟ ಹೋರಾಟ ನಡೆಸಿದಾಗ್ಯೂ 5 ರನ್​ಗಳ ಸೋಲು ಕಂಡಿತು. ಮೊದಲು ಬ್ಯಾಟ್​ ಮಾಡಿದ ಪಂಜಾಬ್​ ಕಿಂಗ್ಸ್​ ತಂಡ 20 ಓವರ್​ಗಳಲ್ಲಿ 197 ರನ್​ ದಾಖಲಿಸಿತು. 198 ರನ್​ ಗುರಿ ಬೆನ್ನತ್ತಿದ ರಾಜಸ್ಥಾನ ರಾಯಲ್ಸ್​ ನಿಗದಿತ ಓವರ್​ಗಳಲ್ಲಿ 192 ರನ್​ ಮಾಡಿತು. ಇದರಿಂದ 5 ರನ್​ ಅಂತರದಲ್ಲಿ ಪರಾಜಯ ಹೊಂದಿತು. ಮೊದಲ ಪಂದ್ಯದಲ್ಲಿ ಸನ್​​ರೈಸರ್ಸ್​ ಹೈದರಾಬಾದ್​ ವಿರುದ್ಧ 72 ರನ್​ಗಳ ಅಧಿಕಾರಯುತ ಜಯ ದಾಖಲಿಸಿತ್ತು.

ಓದಿ:ಕ್ರಿಕೆಟಿಗ ಪೃಥ್ವಿ ಶಾ ವಿರುದ್ಧ ಕ್ರಿಮಿನಲ್ ಕೇಸ್​ ದಾಖಲು!