ಕೊಹ್ಲಿ ಪಡೆಗೆ ಧನ್ಯವಾದ ಅರ್ಪಿಸಿದ ಆರ್​​ಸಿಬಿ ಮ್ಯಾನೇಜ್​​ಮೆಂಟ್​​​​

ರಾಯಲ್ ಚಾಲೆಂಜರ್ಸ್ ತಂಡದ ಐಪಿಎಲ್ ಸೀಸನ್-14 ಅಧ್ಯಾಯ ಅಂತ್ಯಗೊಂಡಿದೆ. ಆರ್​​ಸಿಬಿ ಫ್ರಾಂಚೈಸಿ ಎಲ್ಲಾ ಆಟಗಾರರಿಗೂ ಧನ್ಯವಾದ ಅರ್ಪಿಸಿದೆ.

ದುಬೈ: ಎಲಿಮಿನೇಟರ್ ಪಂದ್ಯದಲ್ಲಿ ಸೋತು ಆರ್​ಸಿಬಿ ತಂಡ ಐಪಿಎಲ್ ಟೂರ್ನಿಯ ಪ್ರಯಾಣ ಕೊನೆಗೊಳಿಸಿದೆ. ಟೂರ್ನಿಯುದ್ದಕ್ಕೂ ಅದ್ಭುತ ಪ್ರದರ್ಶನ ತೋರಿದ್ದ ತಂಡ ಎಲಿಮಿನೇಟರ್​ನಲ್ಲಿ ಕೆಕೆಆರ್ ವಿರುದ್ಧ ಮುಗ್ಗರಿಸಿದೆ.

ಈ ಬಗ್ಗೆ ನಾಯಕ ವಿರಾಟ್ ಕೊಹ್ಲಿ ಸಹ ಪಂದ್ಯದ ಬಳಿಕ ಅಭಿಮಾನಿಗಳಿಗೆ ಧನ್ಯವಾದ ಅರ್ಪಿಸಿದ್ದರು. ಇದೀಗ ಆರ್​ಸಿಬಿ ತಂಡ ಸೇರಿದ್ದ ಆಟಗಾರರು ಮರಳಿ ತಮ್ಮ ತಾಯ್ನಾಡಿಗೆ ತೆರಳಿದ್ದಾರೆ. ಇದಕ್ಕೂ ಮೊದಲು ದುಬೈನಲ್ಲಿ ಆರ್​ಸಿಬಿ ತಂಡ ಕೊನೆಯ ಗ್ರೂಪ್​ ಫೋಟೋ ತೆಗೆಸಿಕೊಂಡಿದೆ. ಆರ್​ಸಿಬಿಯ ಎಲ್ಲಾ ಆಟಗಾರರು, ಸಿಬ್ಬಂದಿ ಈ ಫೋಟೋದಲ್ಲಿದ್ದು, ಮ್ಯಾನೇಜ್​ಮೆಂಟ್​ ಎಲ್ಲಾ ಆಟಗಾರರಿಗೂ ಧನ್ಯವಾದ ಅರ್ಪಿಸಿದೆ.

ಬಯೋ ಬಬಲ್​ನಲ್ಲಿ ಶ್ರಮ ವಹಿಸಿದ್ದು ಮತ್ತು ಲೆಕ್ಕವಿಲ್ಲದಷ್ಟು ಸಮಯ ಸಮರ್ಪಣೆ ಮಾಡಿದ ಆರ್​​ಸಿಬಿಯ ಈ ಕುಟುಂಬಕ್ಕೆ ಧನ್ಯವಾದಗಳು. ಪ್ಲೇ ಬೋಲ್ಡ್ ಅಂದರೆ ಏನೆಂದು ನಮಗೆ ತೋರಿಸಿದೆ ಎಂದು ಟ್ವೀಟ್ ಮಾಡಲಾಗಿದೆ.

ಈ ಬಾರಿಯ ಐಪಿಎಲ್​ ಟೂರ್ನಿಯಲ್ಲಿ ಆರ್​​ಸಿಬಿ ಪ್ರಶಸ್ತಿ ಗೆಲ್ಲುವ ನಿರೀಕ್ಷೆ ಮೂಡಿಸಿತ್ತು. ಆದರೆ ಎಲಿಮಿನೇಟರ್ ಪಂದ್ಯದಲ್ಲಿ ಮುಗ್ಗರಿಸಿ ನಿರಾಸೆ ಮೂಡಿಸಿತು.