ಮುಂಬೈ (ಮಹಾರಾಷ್ಟ್ರ): ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಮುಂಬೈ ಇಂಡಿಯನ್ಸ್ ನಡುವೆ ಇಂಡಿಯನ್ ಪ್ರೀಮಿಯರ್ ಲೀಗ್ನ 12ನೇ ಪಂದ್ಯ ಇಲ್ಲಿನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆಯುತ್ತಿದ್ದು, ಟಾಸ್ ಗೆದ್ದ ಚೆನ್ನೈ ಸೂಪರ್ ಕಿಂಗ್ಸ್ ನಾಯಕ ಎಂಎಸ್ ಧೋನಿ ಕ್ಷೇತ್ರರಕ್ಷಣೆ ಆಯ್ಕೆ ಮಾಡಿಕೊಂಡಿದ್ದಾರೆ. ಚೆನ್ನೈ ಈವರೆಗೆ ಒಂದು ಸೋಲು ಒಂದು ಗೆಲುವು ಕಂಡಿದ್ದರೆ, ಮುಂಬೈ ಪ್ರಥಮ ಪಂದ್ಯದಲ್ಲಿ ಆರ್ಸಿಬಿ ವಿರುದ್ಧ ಸೋತಿದ್ದು, ಇಂದು ತವರಿನಲ್ಲಿ ಎರಡನೇ ಪಂದ್ಯ ಗೆಲ್ಲುವ ಗುರಿ ಹೊಂದಿದೆ.
ಚೆನ್ನೈ ತಂಡದಲ್ಲಿ ಎರಡು ಬದಲಾವಣೆಗಳಾಗಿದ್ದು, ಬೆನ್ ಸ್ಟೋಕ್ಸ್ ಗಾಯ ಕಾರಣ ಈ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ. ಮೋಯಿನ್ ಅಲಿ ಸಹ ಈ ಪಂದ್ಯವನ್ನು ಆಡುತ್ತಿಲ್ಲ ಅವರ ಬದಲಿಯಾಗಿ ಅಜಿಂಕ್ಯ ರೆಹಾನೆ ಮತ್ತು ಪ್ರಿಟೋರಿಯಸ್ ಕಣಕ್ಕಿಳಿಯುತ್ತಿದ್ದಾರೆ. ಮುಂಬೈನ ಜೋಫ್ರಾ ಆರ್ಚರ್ ಸಹ ಗಾಯಕ್ಕೆ ತುತ್ತಾಗಿದ್ದು, ಗಂಭೀರತೆಗೂ ಮೊದಲು ರೆಸ್ಟ್ ನೀಡಲಾಗಿದೆ ಎಂದು ನಾಯಕ ರೋಹಿತ್ ತಿಳಿಸಿದ್ದಾರೆ.
ಎರಡು ಸೀಸನ್ನಲ್ಲಿ ವಿಫಲತೆ ಎದುರಿಸುತ್ತಿರುವ ಉಭಯ ತಂಡಗಳು:2022ರ ಆವೃತ್ತಿಯಲ್ಲಿ ಚೆನ್ನೈ 9 ಹಾಗೂ ಮುಂಬೈ ಇಂಡಿಯನ್ಸ್ 10ನೇ ಸ್ಥಾನವನ್ನು ಅಂಕಪಟ್ಟಿಯಲ್ಲಿ ಗಳಿಸಿತ್ತು. 14 ಪಂದ್ಯದಲ್ಲಿ ಉಭಯ ತಂಡಗಳು ಕೇವಲ 4ರಲ್ಲಿ ಮಾತ್ರ ಗೆಲುವು ಸಾಧಿಸಿದ್ದವು. 15 ವರ್ಷದ ಐಪಿಎಲ್ನಲ್ಲಿ ಇತ್ತಂಡಗಳು ಅತೀ ಹೆಚ್ಚು ಪ್ರಶಸ್ತಿ ಗೆದ್ದ ದಾಖಲೆಯನ್ನು ಹೊಂದಿವೆ. ಮುಂಬೈ ಐದು ಬಾರಿ ಜಯಿಸಿದ್ದರೆ, ಚೆನ್ನೈ 4 ಬಾರಿ ಚಾಂಪಿಯನ್ ಆಗಿದೆ. ಆದರೆ ಈಗ ಎರಡೂ ತಂಡ ತನ್ನ ಚಾರ್ಮ್ಅನ್ನು ಕಳೆದುಕೊಂಡಿದೆ.
ಐಪಿಎಲ್ಗೆ ಗಾಯದ ಬರೆ:ಇತ್ತೀಚೆಗೆ ಚೇತರಿಸಿಕೊಂಡು ತಂಡ ಸೇರಿರುವ ಜೋಫ್ರಾ ಆರ್ಚರ್ ಗಾಯಕ್ಕೆ ತುತ್ತಾಗಿದ್ದಾರೆ ಎಂದು ರೋಹಿತ್ ಶರ್ಮಾ ಹೇಳಿದ್ದಾರೆ. ಅದರ ಜೊತೆಗೆ ಗಂಭೀರತೆ ಪಡೆದುಕೊಳ್ಳುವ ಮೊದಲು ಮುನ್ನೆಚ್ಚರಿಕೆಯ ಕ್ರಮವಾಗಿ ವಿಶ್ರಾಂತಿ ನೀಡಿರುವುದಾಗಿ ತಿಳಿಸಿದ್ದಾರೆ. ಚೆನ್ನೈ ತಂಡದ ಆಲ್ರೌಂಡರ್ ಬೆನ್ ಸ್ಟೋಕ್ಸ್ ಸಹ ಗಾಯಕ್ಕೊಳಗಾಗಿದ್ದಾರೆ ಎಂದು ಧೋನಿ ಹೇಳಿದ್ದು, ಈ ಕಾರಣ ಇಂದು ಅವರೂ ಆಡುತ್ತಿಲ್ಲ.