ದುಬೈ: ಐಪಿಎಲ್ ಸೀಸನ್ 13ರ ಮೊದಲ ಕ್ವಾಲಿಫೈಯರ್ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಗೆದ್ದು ನೇರ ಫೈನಲ್ ತಲುಪಿದೆ. ಡೆಲ್ಲಿ ಬೌಲರ್ಗಳ ಸಾಂಘಿಕ ದಾಳಿಯಿಂದ ಒಂದು ಹಂತದಲ್ಲಿ ಪಂದ್ಯ ಸೋಲುವ ಹಂತ ತಲುಪಿತ್ತು. ಆದರೆ ಕೊನೆಯ ಓವರ್ನಲ್ಲಿ ಸಿಡಿದೆದ್ದ ಧೋನಿ ಬೌಂಡರಿ, ಸಿಕ್ಸರ್ ನೆರವಿನಿಂದ ಪಂದ್ಯ ಗೆಲ್ಲಿಸಿ ಗ್ರೇಟೆಸ್ಟ್ ಫಿನಿಶರ್ ಎಂಬುದನ್ನು ಮತ್ತೆ ನಿರೂಪಿಸಿದರು.
ಈ ಹೈವೋಲ್ಟೇಜ್ ಪಂದ್ಯದ ಕುರಿತಂತೆ ರಾಯಲ್ ಚಾಲೆಂಜರ್ಸ್ ತಂಡದ ನಾಯಕ ವಿರಾಟ್ ಕೊಹ್ಲಿ ಪ್ರತಿಕ್ರಿಯಿಸಿ, ಧೋನಿ ಆಟಕ್ಕೆ ತಲೆಬಾಗಿದ್ದಾರೆ. ಈ ಬಗ್ಗೆ ಟ್ವೀಟ್ ಮಾಡಿರುವ ಅವರು, ಧೋನಿಯನ್ನು ‘ಗ್ರೇಟೆಸ್ಟ್ ಫಿನಿಶರ್’ ಎಂದು ಹೊಗಳಿದ್ದಾರೆ.
‘ಕಿಂಗ್ ಈಸ್ ಬ್ಯಾಕ್ ಗ್ರೇಟೆಸ್ಟ್ ಫಿನಿಶರ್ ಎವರ್ ಇನ್ ದಿ ಗೇಮ್’ ಎಂದಿರುವ ಕೊಹ್ಲಿ, ‘ಈ ರಾತ್ರಿ ಮತ್ತೊಮ್ಮೆ ಸೀಟ್ನಿಂದ ಜಿಗಿಯುವಂತೆ ಮಾಡಿದೆ’ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ. ಕೊನೆಯ ಓವರ್ನಲ್ಲಿ 12 ರನ್ ಗಳಿಸುವುದು ಚೆನ್ನೈಗೆ ಸವಾಲಾಗಿತ್ತು. ಆದರೆ ಧೋನಿಯ ಅಬ್ಬರದ ಬ್ಯಾಟಿಂಗ್ನಿಂದಾಗಿ ತಂಡ ಫೈನಲ್ ಪ್ರವೇಶಿಸಿದೆ.
ಇದಕ್ಕೂ ಮೊದಲು ಧೋನಿ ಬ್ಯಾಟಿಂಗ್ ಫಾರ್ಮ್ ಕುರಿತಂತೆ ಟೀಕೆ ಕೇಳಿಬಂದಿದ್ದವು. ಕೆಲ ಪಂದ್ಯಗಳಲ್ಲಿ ಎರಡಂಕಿ ರನ್ ಗಳಿಸಲು ಸಹ ಅವರು ಪರದಾಡಿದ್ದರು. ಆದರೆ ನಿನ್ನೆಯ ಪಂದ್ಯದಲ್ಲಿ ಟೀಕೆಗಳಿಗೆ ಉತ್ತರಿಸಿದ್ದು, ಕ್ರಿಕೆಟ್ ಜಗತ್ತಿನ ‘ಗ್ರೇಟೆಸ್ಟ್ ಫಿನಿಶರ್’ ಎಂಬುದನ್ನು ಮತ್ತೆ ತೋರಿಸಿಕೊಟ್ಟಿದ್ದಾರೆ.
ಇದನ್ನೂ ಓದಿ:ವಿಶ್ವಕಪ್ ತಂಡದಲ್ಲಿದ್ದ 7 ಮಂದಿಗೆ ಗೇಟ್ ಪಾಸ್ ನೀಡಿದ ಶ್ರೀಲಂಕಾ : 15 ಸದಸ್ಯರ ಹೊಸ ಟೀಂ ಪ್ರಕಟ
