ದೆಹಲಿ​ ಗೆಲುವಿಗೆ ಮೊಹ್ಸಿನ್​ ಖಾನ್​ ಭಂಗ.. ಕ್ಯಾಪಿಟಲ್ಸ್ ವಿರುದ್ಧ ಸೂಪರ್​ ಜೈಂಟ್ಸ್​ಗೆ 6 ರನ್​ ಜಯ

ಎಡಗೈ ಬೌಲರ್​ ಮೊಹ್ಸಿನ್ ಖಾನ್​ರ ದಾಳಿಗೆ ಕುಸಿದ ದೆಹಲಿ ಕ್ಯಾಪಿಟಲ್ಸ್​ ತಂಡ ಲಖನೌ ಸೂಪರ್​​ ಜೈಂಟ್ಸ್​ ತಂಡದೆದುರು ಸೋಲು ಕಂಡಿದೆ.

ಮುಂಬೈ:ಕೆ.ಎಲ್.​ ರಾಹುಲ್​, ದೀಪಕ್​ ಹೂಡಾರ ಅರ್ಧಶತಕ, ಮೊಹ್ಸಿನ್​ ಖಾನ್​ರ ಕರಾರುವಾಕ್​ ದಾಳಿಗೆ ನಲುಗಿದ ದೆಹಲಿ ಕ್ಯಾಪಿಟಲ್ಸ್​ ತಂಡ ಲಖನೌ ಸೂಪರ್​ ಜೈಂಟ್ಸ್​ ವಿರುದ್ಧ 6 ರನ್​ಗಳ ಸೋಲು ಕಂಡಿದೆ. ಲಖನೌ ತಂಡ ನೀಡಿದ್ದ 195 ರನ್​ಗಳ ಗುರಿ ಬೆನ್ನತ್ತಿದ ದೆಹಲಿ ತಂಡ 20 ಓವರ್​ಗಳಲ್ಲಿ 7 ವಿಕೆಟ್​ ಕಳೆದುಕೊಂಡು 189 ರನ್​ ಗಳಿಸಲಷ್ಟೇ ಶಕ್ತವಾಯಿತು.

ದೆಹಲಿಗೆ ಆರಂಭಿಕ ಆಘಾತ:ಬೃಹತ್​ ಮೊತ್ತದ ಗುರಿ ಹೊಂದಿದ್ದ ದೆಹಲಿ ತಂಡ ಭದ್ರ ಬುನಾದಿ ಹಾಕಿಕೊಡಬೇಕಿದ್ದ ಆರಂಭಿಕ ಆಟಗಾರರಾದ ಫೃಥ್ವಿ ಶಾ(5) ಮತ್ತು ಡೇವಿಡ್​ ವಾರ್ನರ್​(3) 13 ಗಳಿಸುವಷ್ಟರಲ್ಲಿ ಇಬ್ಬರೂ ಪೆವಿಲಿಯನ್​ ಸೇರಿದರು. ಮಿಚೆಲ್​​ ಮಾರ್ಷ್ (37), ರಿಷಬ್​ ಪಂತ್​(44) ರನ್​ ಬಾರಿಸಿ ಕುಸಿಯುತ್ತಿದ್ದ ತಂಡಕ್ಕೆ ನೆರವಾದರು. ಲಲಿತ್​ ಯಾದವ್​(3) ಮತ್ತೆ ವಿಫಲವಾದರೆ, ರೋವ್​ಮನ್​ ಫೋವೆಲ್​(35), ಅಕ್ಷರ್​ ಪಟೇಲ್​ (42) ರನ್​ ಗಳಿಸಿದರೂ ತಂಡ ಗೆಲುವಿನ ದಡ ಮುಟ್ಟಿಸುವಲ್ಲಿ ಸಫಲವಾಗಲಿಲ್ಲ.

ಖಾನ್​ ದರ್ಬಾರ್​:ಒಂದೆಡೆ ರಿಷಬ್​ ಪಂತ್​ ಮತ್ತು ಅಕ್ಷರ್​ ಪಟೇಲ್​ ಉತ್ತಮವಾಗಿ ಬ್ಯಾಟ್​ ಬೀಸುತ್ತಿದ್ದರೆ, ಇನ್ನೊಂದೆಡೆ ಅದ್ಭುತ ಬೌಲಿಂಗ್ ಮಾಡಿದ ಮೊಹ್ಸಿನ್​ ಖಾನ್​ 4 ಓವರ್​ಗಳಲ್ಲಿ 16 ರನ್​ ನೀಡಿ 4 ವಿಕೆಟ್​ ಪಡೆಯುವ ಮೂಲಕ ದೆಹಲಿಯ ಬ್ಯಾಟಿಂಗ್ ಬೆನ್ನೆಲುಬು ಮುರಿದರು. ಇದಲ್ಲದೇ, ದುಷ್ಮಂತ್​ ಚಮೀರಾ, ರವಿ ಬಿಷ್ಣೋಯಿ, ಕೃಷ್ಣಪ್ಪ ಗೌತಮ್​ ತಲಾ 1 ವಿಕೆಟ್​ ಪಡೆದರು.

ರಾಹುಲ್​, ಹೂಡಾ ಅರ್ಧಶತಕ:ಈ ಸೀಸನ್​ನಲ್ಲಿ ಆರೇಂಜ್ ​ಕ್ಯಾಪ್​ಗೆ ಜೋಸ್​ ಬಟ್ಲರ್​​ಗೆ ಭಾರಿ ಪೈಪೋಟಿ ನೀಡುತ್ತಿರುವ ಕೆ.ಎಲ್​. ರಾಹುಲ್​ ಮತ್ತೊಮ್ಮೆ ಬ್ಯಾಟಿಂಗ್​ನಲ್ಲಿ ಮಿಂಚಿದರು. ಇನ್ನಿಂಗ್ಸ್​ನ ಮೊದಲ ಎಸೆತದಿಂದಲೇ ಹೊಡಿಬಡಿ ಆಟಕ್ಕೆ ಮುಂದಾದ ರಾಹುಲ್​ 5 ಸಿಕ್ಸರ್​, 4 ಫೋರ್​ ಸಮೇತ 51 ಎಸೆತಗಳಲ್ಲಿ 77 ರನ್​ ಬಾರಿಸಿದರು. ಶತಕದೆಡೆಗೆ ಮುನ್ನುಗ್ಗುತ್ತಿದ್ದ ರಾಹುಲ್​ 18 ನೇ ಓವರ್​ನಲ್ಲಿ ಶಾರ್ದೂಲ್​ ಠಾಕೂರ್​ ಎಸೆತದಲ್ಲಿ ಲಲಿತ್​ ಯಾದವ್​ಗೆ ಕ್ಯಾಚ್​ ನೀಡಿ ನಿರ್ಗಮಿಸಿದರು.

ರಾಹುಲ್​ ಜೊತೆಗೆ ಇನ್ನೊಂದು ತುದಿಯಲ್ಲಿ ಉತ್ತಮವಾಗಿ ಬ್ಯಾಟ್ ಬೀಸಿದ ದೀಪಕ್​ ಹೂಡಾ 34 ಎಸೆತಗಳಲ್ಲಿ 52 ರನ್​ ಬಾರಿಸಿ ಔಟಾದರು. ಕ್ವಿಂಟನ್​ ಡಿ ಕಾಕ್​ 23, ಮಾರ್ಕಸ್​ ಸ್ಟೋಯಿನಿಸ್​ 17, ಕೃನಾಲ್ ಪಾಂಡ್ಯ 9 ರನ್​ ಗಳಿಸಿದರು. ದೆಹಲಿ ಕ್ಯಾಪಿಟಲ್ಸ್​ ಪರವಾಗಿ ಶಾರ್ದೂಲ್​ ಠಾಕೂರ್​ ಒಬ್ಬರೇ 3 ವಿಕೆಟ್​ ಪಡೆದು ಮಿಂಚಿದರೆ, ಇನ್ನುಳಿದ ಎಲ್ಲಾ ಬೌಲರ್​ಗಳು ವಿಕೆಟ್​ ಗಳಿಸುವಲ್ಲಿ ವಿಫಲವಾದರಲ್ಲದೇ ದಂಡನೆಗೆ ಒಳಗಾದರು.

ಓದಿ:ಐಪಿಎಲ್​ ಆವೃತ್ತಿಯೊಂದರಲ್ಲಿ ರಾಜಸ್ಥಾನ್​ ಪರ ಗರಿಷ್ಠ ರನ್​ ದಾಖಲಿಸಿದ ಜಾಸ್ ಬಟ್ಲರ್