ಹೈದರಾಬಾದ್ (ತೆಲಂಗಾಣ):ಸನ್ರೈಸರ್ಸ್ ಹೈದರಾಬಾದ್ ತಂಡದ ವಿರುದ್ಧ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡ ಐದು ರನ್ಗಳಿಂದ ಗೆಲುವು ಸಾಧಿಸಿದೆ. ನಿತೀಶ್ ರಾಣಾ ಪಡೆ ನೀಡಿದ್ದ 172 ರನ್ಗಳ ಟಾರ್ಗೆಟ್ ಬೆನ್ನಟ್ಟಿದ್ದ ಹೈದರಾಬಾದ್ 8 ವಿಕೆಟ್ ಕಳೆದುಕೊಂಡು 166 ರನ್ ಕಲೆ ಹಾಕಲು ಮಾತ್ರ ಶಕ್ತವಾಯಿತು.
ಇಲ್ಲಿನ ರಾಜೀವ್ ಗಾಂಧಿ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಕೋಲ್ಕತ್ತಾ 9 ವಿಕೆಟ್ ನಷ್ಟಕ್ಕೆ 171 ರನ್ ಪೇರಿಸಿತ್ತು. ಈ ರನ್ಗಳ ಗುರಿ ಬೆನ್ನಟ್ಟಿದ ಹೈದರಾಬಾದ್ ಉತ್ತಮ ಆರಂಭವನ್ನು ಪಡೆಯಲಿಲ್ಲ. ಆರಂಭಿಕರಾದ ಮಯಾಂಕ್ ಅಗರ್ವಾಲ್ (18) ಮತ್ತು ಅಭಿಷೇಕ್ ಶರ್ಮಾ (9) ಬೇಗ ವಿಕೆಟ್ ಒಪ್ಪಿಸಿದರು.
ನಂತರ ಬಂದ ರಾಹುಲ್ ತ್ರಿಪಾಠಿ ಬಿರುಸಿನ ಬ್ಯಾಟಿಂಗ್ ಬೀಸಿದರೂ ದೊಡ್ಡ ಮೊತ್ತ ಕಲೆ ಹಾಕಲು ಸಾಧ್ಯವಾಗಿಲ್ಲ. 9 ಎಸತೆಗಳಲ್ಲಿ 20 ರನ್ ಸಿಡಿಸಿ ಔಟಾದರು. ಹ್ಯಾರಿ ಬ್ರೂಕ್ ಶೂನ್ಯಕ್ಕೆ ಪೆವಿಲಿಯನ್ ಸೇರಿದರು. ಈ ಮೂಲಕ ಹೈದಾರಾಬಾದ್ ತಂಡದ ಮೊತ್ತ 54 ರನ್ಗಳು ಆಗುವಷ್ಟರಲ್ಲಿ ನಾಲ್ಕು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು.
ಈ ನಡುವೆ ನಾಯಕ ಐಡೆನ್ ಮಾರ್ಕ್ರಾಮ್ ಮತ್ತು ಹೆನ್ರಿಕ್ ಕ್ಲಾಸೆನ್ 70 ರನ್ಗಳ ಉತ್ತಮ ಜೊತೆಯಾಟ ನೀಡಿದರು. 30 ಎಸೆತಗಳಲ್ಲಿ ಮೂರು ಸಿಕ್ಸರ್, ಒಂದು ಬೌಂಡರಿ ಸಮೇತ 36 ರನ್ಗಳ ಕಾಣಿಕೆ ನೀಡಿದರು. 40 ಬಾಲ್ಗಳು ಎದುರಿಸಿದ ಮಾರ್ಕ್ರಾಮ್ ನಾಲ್ಕು ಬೌಂಡರಿಗಳೊಂದಿಗೆ 41 ರನ್ ಬಾರಿಸಿ ವಿಕೆಟ್ ಒಪ್ಪಿಸಿದರು. ಮಾರ್ಕೊ ಜಾನ್ಸೆನ್ 4 ಬಾಲ್ ಎದುರಿಸಿ ಒಂದೇ ರನ್ ಮಾಡಿದರು.
ಕೊನೆಯ ಓವರ್ಗೆ ಹೈದರಾಬಾದ್ಗೆ 9 ರನ್ ಅಗತ್ಯವಿತ್ತು. ಆದರೆ, ಕೇವಲ 3 ರನ್ ಮಾತ್ರ ಬಂದವು. 21 ರನ್ ಗಳಿಸಿ ಆಡುತ್ತಿದ್ದ ಅಬ್ದುಲ್ ಸಮದ್ ಮೂರನೇ ಬಾಲ್ನಲ್ಲಿ ವಿಕೆಟ್ ಒಪ್ಪಿಸಿದರು. ಅಂತಿಮದ ಮೂರು ರನ್ಗಳಲ್ಲಿ ಕೇವಲ ಒಂದು ಮಾತ್ರ ಬಂತು. ಇದರಿಂದ ಸೋಲೊಪ್ಪಿಕೊಳ್ಳಬೇಕಾಯಿತು. ಭುವನೇಶ್ವರ್ ಕುಮಾರ್ (5), ಮಾಯಾಂಕ್ ಮಾರ್ಕಂಡೆ (1) ಅಜೇಯರಾಗಿ ಉಳಿದರು. ಕೋಲ್ಕತ್ತಾ ಪರ ವೈಭವ್ ಆರೋರಾ, ಶಾರ್ದೂಲ್ ಠಾಕೂರ್ ತಲಾ 2 ವಿಕೆಟ್ ಪಡೆದರೆ, ಆಂಡ್ರೆ ರಸೆಲ್, ಹರ್ಷಿತಾ ರಾಣಾ, ವರುಣ್ ಚಕ್ರವರ್ತಿ, ಅನುಕುಲ್ ರಾಯ್ ತಲಾ ಒಂದು ವಿಕೆಟ್ ಪಡೆದರು.
ಇದಕ್ಕೂ ಮುನ್ನ ಕೋಲ್ಕತ್ತಾ ತಂಡ ನಾಯಕನಿತೀಶ್ ರಾಣಾ ಹಾಗೂ ರಿಂಕು ಸಿಂಗ್ ಸಹಾಯದಿಂದ 171 ರನ್ಗಳ ಗಳಿಸಿತ್ತು. ಮೊದಲು ಬ್ಯಾಟಿಂಗ್ಗೆ ಇಳಿದ ಕೋಲ್ಕತ್ತಾಗೆ ಮಾರ್ಕೊ ಯಾನ್ಸೆನ್ ಎರಡು ವಿಕೆಟ್ ಪಡೆದುಕೊಂಡು ಆರಂಭಿಕ ಆಘಾತ ಕೊಟ್ಟರು. ರಹಮುನ್ನುಲ್ಲಾ ಗುರ್ಬಾಜ್ ತಮ್ಮ ಮೊದಲ ಎಸೆತದಲ್ಲೆ ಔಟಾಗಿ ಪೆವಿಲಿಯನ್ ಹಾದಿ ಹಿಡಿದರು. ನಂತರ ಬ್ಯಾಟಿಂಗ್ಗೆ ಬಂದ ವೆಂಕಟೇಶ್ ಅಯ್ಯರ್ 4 ಎಸೆತದಲ್ಲಿ 7 ರನ್ ಗಳಿಸಿ ನಿರ್ಗಮಿಸಿದರು. ಸುಮಾರು ಪಂದ್ಯಗಳ ನಂತರ ತಂಡಕ್ಕೆ ಮರಳಿದ್ದ ಕಾರ್ತಿಕ್ ತ್ಯಾಗಿ ತಮ್ಮ ಮೊದಲನೇ ಓವರ್ನಲ್ಲೇ ಜೇಸನ್ ರಾಯ್ ಅವರ ವಿಕೆಟ್ ಕಬಳಿಸಿದರು.
ನಂತರ ತಂಡದ ನಾಯಕ ನಿತೀಶ್ ರಾಣಾ ಜವಾಬ್ದಾರಿಯುತ ಆಟವಾಡಿ 31 ಎಸೆತದಲ್ಲಿ 42 ರನ್ ಬಾರಿಸಿದರು. ಇದರ ನಡುವೆ ರಾಣಾ ಎಸ್ಆರ್ಹೆಚ್ ತಂಡದ ನಾಯಕ ಮಾರ್ಕಮ್ ಅವರಿಗೆ ವಿಕೆಟ್ ಒಪ್ಪಿಸಿದರು. ಹೊಡಿ ಬಡಿ ಆಟಗಾರ ಆಂಡ್ರೆ ರಸೆಲ್ 15 ಎಸೆದಲ್ಲಿ ಎರಡು ಸಿಕ್ಸರ್, ಒಂದು ಬೌಂಡರಿಯೊಂದಿಗೆ 24 ಬಾರಿಸಿ ಮಾಯಂಕ್ ಮಾರ್ಕಂಡೆಗೆ ಬಲೆಗೆ ಸಿಲುಕಿದರು. ವಿಕೆಟ್ಗಳು ಬೀಳುತ್ತಿದ್ದರೂ ರಿಂಕು ಸಿಂಗ್ ತಮ್ಮ ಬ್ಯಾಟಿಂಗ್ ಮುಂದುವರೆಸಿದರು.
ಕೊನೆಯಲ್ಲಿ ಬಂದ ಬ್ಯಾಟರ್ಗಳು ಸ್ಕೋರ್ ಹೆಚ್ಚಿಸಲು ಪ್ರಯತ್ನಿಸಿದರೂ ಹೆಚ್ಚು ಹೊತ್ತು ಯಾರು ಕ್ರೀಸ್ನಲ್ಲಿ ನಿಲ್ಲಲಿಲ್ಲ. ಡೆತ್ ಓವರ್ನಲ್ಲಿ ಬ್ಯಾಟ್ ಬೀಸಿದ ರಿಂಕು ಸಿಂಗ್ (46) ನಟರಾಜನ್ ಬೌಲಿಂಗ್ನಲ್ಲಿ ಕ್ಯಾಚ್ ಕೊಟ್ಟರು. ಅಂತಿಮವಾಗಿ 9 ವಿಕೆಟ್ ನಷ್ಟಕ್ಕೆ 171 ರನ್ಗಳ ಕಲೆ ಹಾಕಿತ್ತು. ಸನ್ರೈಸರ್ಸ್ ಪರ ಮಾರ್ಕೊ ಯಾನ್ಸೆನ್ ಮತ್ತು ನಟರಾಜನ್ ತಲಾ 2 ವಿಕೆಟ್ ತೆಗದುಕೊಂಡರೆ, ಭುವನೇಶ್ವರ್ ಕುಮಾರ್, ಕಾರ್ತಿಕ್ ತ್ಯಾಗಿ, ಮಾಯಂಕ್ ಮಾರ್ಕಂಡೆ ಮತ್ತು ಮಾರ್ಕಮ್ ತಲಾ ಒಂದು ವಿಕೆಟ್ ಪಡೆದರು.
