ಫಿಟ್ನೆಸ್‌ ನೆಪದಲ್ಲಿ ಬೆಂಚ್‌ ಕಾದ ವಿಲಿಯಮ್ಸನ್‌; ಹೈದ್ರಾಬಾದ್‌ ಅಭಿಮಾನಿಗಳ ಅಸಮಾಧಾನ

ಮ್ಯಾಚ್ ಫಿಟ್‌ನೆಸ್ ಪಡೆಯಲು ಕೇನ್ ವಿಲಿಯಮ್ಸನ್​ಗೆ ಇನ್ನೂ ಸ್ವಲ್ಪ ಸಮಯ ಬೇಕು. ಐಪಿಎಲ್​ ಟೂರ್ನಿಯ ಮುಂದಿನ ಪಂದ್ಯಗಳಲ್ಲಿ ವಿಲಿಯಮ್ಸನ್ ಪ್ಲೇಯಿಂಗ್​ -11ನಲ್ಲಿ ಕಮ್​ ಬ್ಯಾಕ್​ ಮಾಡಲಿದ್ದಾರೆ ಎಂದು ಸನ್ ರೈಸರ್ಸ್ ಹೈದರಾಬಾದ್ ಕೋಚ್ ಟ್ರೆವರ್​ ಬೇಲಿಸ್​ ಹೇಳಿದ್ದಾರೆ.

ಚೆನ್ನೈ (ತಮಿಳುನಾಡು):ಕೋಲ್ಕತಾ ನೈಟ್ ರೈಡರ್ಸ್ ವಿರುದ್ಧದ ಆರಂಭಿಕ ಪಂದ್ಯದಲ್ಲೇ ಸನ್ ರೈಸರ್ಸ್ ಹೈದರಾಬಾದ್ ಸೋಲುಕಂಡಿದೆ. ನಿನ್ನೆಯ ಪಂದ್ಯದಿಂದ ಹೊರಗುಳಿದಿದ್ದ ನ್ಯೂಜಿಲ್ಯಾಂಡ್ ಕ್ಯಾಪ್ಟನ್​ ಹಾಗೂ ಹೈದರಾಬಾದ್​ ತಂಡದ ಆಟಗಾರ ಕೇನ್​ ವಿಲಿಯಮ್ಸನ್​ ಬಗ್ಗೆ ಎಸ್‌ಆರ್‌ಹೆಚ್ ಕೋಚ್ ಟ್ರೆವರ್​ ಬೇಲಿಸ್​ ಹೇಳಿಕೆಯೊಂದನ್ನು ನೀಡಿದ್ದಾರೆ.

ಮ್ಯಾಚ್ ಫಿಟ್‌ನೆಸ್ ಪಡೆಯಲು ವಿಲಿಯಮ್ಸನ್​ಗೆ ಇನ್ನೂ ಸ್ವಲ್ಪ ಸಮಯ ಬೇಕು. ಮೊದಲಿನಂತೆ ಇದ್ದಿದ್ದರೆ ಜಾನಿ ಬೈರ್‌ಸ್ಟೋವ್ ಬದಲಿಗೆ ವಿಲಿಯಮ್ಸನ್ ಆಡುತ್ತಿದ್ದರು. ಆದರೆ ಈ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳುವುದಿಲ್ಲ. ಇತ್ತೀಚೆಗೆ ಭಾರತದಲ್ಲಿ ವೈಟ್-ಬಾಲ್ ಕ್ರಿಕೆಟ್‌ನಲ್ಲಿ ಜಾನಿ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಐಪಿಎಲ್​ ಟೂರ್ನಿಯ ಮುಂದಿನ ಪಂದ್ಯಗಳಲ್ಲಿ ವಿಲಿಯಮ್ಸನ್ ಪ್ಲೇಯಿಂಗ್​ -11ನಲ್ಲಿ ಕಮ್​ ಬ್ಯಾಕ್​ ಮಾಡಲಿದ್ದಾರೆ ಎಂದು ನಿನ್ನೆ ಮ್ಯಾಚ್​ ಮುಗಿದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಬೇಲಿಸ್ ಹೇಳಿದರು.

ಇದನ್ನೂ ಓದಿ:IPL-2021: ಸನ್​ರೈಸರ್ಸ್ ಮೇಲೆ ಸವಾರಿ ಮಾಡಿದ ನೈಟ್​ ರೈಡರ್ಸ್​

ಚೆನ್ನೈನ ಎಂ.ಎ.ಚಿದಂಬರಂ ಕ್ರೀಡಾಂಗಣದಲ್ಲಿ ನಿನ್ನೆ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಕೆಕೆಆರ್, ನಿತೀಶ್ ರಾಣಾ ಅವರ 80 ಹಾಗೂ ರಾಹುಲ್ ತ್ರಿಪಾಠಿ ಅವರ 53 ರನ್​​ಗಳ ನೆರವಿನಿಂದ 6 ವಿಕೆಟ್ ನಷ್ಟಕ್ಕೆ 187 ರನ್​​ ಗಳಿಸಿ, ಎಸ್‌ಆರ್‌ಹೆಚ್ ವಿರುದ್ಧ 10 ರನ್​ಗಳಿಂದ ಗೆಲುವು ಸಾಧಿಸಿತ್ತು.

ಎಸ್‌ಆರ್‌ಹೆಚ್ ತಂಡದಲ್ಲಿ ಡೇವಿಡ್ ವಾರ್ನರ್, ಜಾನಿ ಬೈರ್‌ಸ್ಟೋವ್, ರಶೀದ್ ಖಾನ್ ಮತ್ತು ಮೊಹಮ್ಮದ್ ನಬಿ - ಈ ನಾಲ್ಕು ವಿದೇಶಿ ಆಟಗಾರರಿದ್ದಾರೆ. ವಿಲಿಯಮ್ಸನ್​ರನ್ನು ಪ್ಲೇಯಿಂಗ್​ -11ನಿಂದ ಹೊರಗಿಟ್ಟಿರುವುದಕ್ಕೆ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಅಸಮಾಧಾನ, ನಿರಾಶೆ ವ್ಯಕ್ತಪಡಿಸಿದ್ದಾರೆ.

ಒಬ್ಬ ವರ್ಲ್ಡ್​ ಪ್ಲೇಯರ್​ನ ಬೆಂಚ್​ ಕಾಯಿಸುವುದು ಸರಿಯಿಲ್ಲ. ಇಂತಹ ಉತ್ತಮ ಆಟಗಾರ ಆಡದೇ ಇರುವುದನ್ನು ನೋಡಲು ದುಃಖವೆನಿಸುತ್ತದೆ, ಇದು ಅನ್ಯಾಯ ಎಂದು ಫ್ಯಾನ್ಸ್​ ಟ್ವೀಟ್​ ಮಾಡಿದ್ದಾರೆ.