ಚೆನ್ನೈ: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2021ರ ಆವೃತ್ತಿಯ ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ (ಆರ್ಸಿಬಿ) ರೋಚಕ 2 ವಿಕೆಟ್ಗಳಿಂದ ಗೆಲವು ಸಾಧಿಸಿದೆ.
ಮುಂಬೈ ನೀಡಿದ್ದ 160 ರನ್ಗಳ ಮೊತ್ತದ ಬೆನ್ನು ಹತ್ತಿದ ಆರ್ಸಿಬಿ, ತಂಡದ ಮೊತ್ತ 98/3 ಆದಾಗ ನಾಯಕ ವಿರಾಟ್ ಕೊಹ್ಲಿ (33) ತಮ್ಮ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ಕ್ರೀಸಿನಲ್ಲಿ ನೆಲೆಯೂರಿದ ಗ್ಲೆನ್ ಮ್ಯಾಕ್ಸ್‌ವೆಲ್ (39) ಕೂಡ ಔಟಾದರು. ಶಹಬಾಜ್ ಅಹ್ಮದ್ ಕೂಡ ಒಂದು ರನ್ಗೆ ಮಾರ್ಕೊ ಜಾನ್ಸೆನ್ಗೆ ವಿಕೆಟ್ ಒಪ್ಪಿಸಿದರು. ಅಂತಿಮ ಐದು ಓವರ್‌ಗಳಲ್ಲಿ ಆರ್ಸಿಬಿ ಗೆಲುವಿಗೆ 54 ರನ್ಗಳ ಅವಶ್ಯಕತೆಯಿತ್ತು. ಗೆಲುವಿನ ನಿರೀಕ್ಷೆಗಳನ್ನು ಹೊತ್ತ ಕಣದಲ್ಲಿ ನಿಂತಿದ್ದ ಎಬಿ ಡಿ ವಿಲಿಯರ್ಸ್, 27 ಎಸೆತಗಳನ್ನು ಎದುರಿಸಿದ ನಾಲ್ಕು ಬೌಂಡರಿ ಹಾಗೂ ಎರಡು ಸಿಕ್ಸರ್ ನೆರವಿನಿಂದ 48 ರನ್ ಗಳಿಸಿದರು. ಆದರೆ ಗೆಲುವಿಗೆ 2 ರನ್ ಮಾತ್ರ ಬಾಕಿ ಉಳಿದಿರುವಾಗ ರನೌಟ್ ಆಗಿ ನಿರಾಸೆ ಮೂಡಿಸಿದರು. ಬಳಿಕ ಬಂದ ಹರ್ಷಲ್ ಪಟೇಲ್ ಗೆಲುವಿನ ರನ್ ಬಾರಿಸಿದರು.
ಈ ಗೆಲುವಿನ ನಂತರ, ಆರ್ಸಿಬಿ ನಾಯಕ ವಿರಾಟ್ ಕೊಹ್ಲಿ ಅವರು ಗೆಳೆಯ ಎಬಿ ಡಿವಿಲಿಯರ್ಸ್ ಆಟವನ್ನು ಗುಣಗಾನ ಮಾಡಿದ್ದು, ಎಬಿ ಬಹುಶಃ ತಂಡದಲ್ಲಿನ ಒಬ್ಬನೇ ಒಬ್ಬ ಬಹುಮುಖ ಪ್ರತಿಭೆಯ (ಚಾಣಾಕ್ಷ) ಆಟಗಾರ. ನಿಧಾನಗತಿಯ ವಿಕೆಟ್‌ಗಳಲ್ಲಿ ಆತ ಏನು ಮಾಡುತ್ತಾನೋ ಬಹುತೇಕರಿಗೂ ಅದನ್ನು ಮಾಡಲು ಸಾಧ್ಯವಿಲ್ಲ. ಒಂದು ಕಠಿಣವಾದ ಸವಾಲನ್ನು ಬೆನ್ನಟ್ಟುವಾಗ ನಿಮ್ಮಲ್ಲಿ ಸಾಕಷ್ಟು ಅನುಭವ ಇರಬೇಕು. ಎದುರಾಳಿಗೆ ಆತನಲ್ಲಿನ ಅನುಭವದ ಬಗ್ಗೆ ಅರಿವಿದೆ. ಅಷ್ಟು ಸುಲಭಕ್ಕೆ ಅವನನ್ನು ಹೊರ ಹಾಕಲು ಆಗುವುದಿಲ್ಲ ಎಂಬುದೂ ಅವರಿಗೆ ತಿಳಿದಿದೆ. ಆತನ ಕುರಿತು ಬೌಲರ್‌ಗಳು ಬೇರೆ-ಬೇರೆ ತರಹ ಯೋಚನೆ ಮಾಡುತ್ತಲ್ಲೇ ಇರುತ್ತಾರೆ ಎಂದರು.