ಡೆಲ್ಲಿ ಮಣಿಸಿ ಪ್ಲೇ ಆಫ್​ಗೆ ಪ್ರವೇಶ ಪಡೆದ ಚೆನ್ನೈ: ತವರಿನಲ್ಲಿ ಧೋನಿಗೆ ಇನ್ನೊಂದು ಪಂದ್ಯದ ಅವಕಾಶ

ಚೆನ್ನೈ 77 ರನ್​ಗಳಿಂದ ಡೆಲ್ಲಿಯನ್ನು ಮಣಿಸಿ ಕ್ವಾಲಿಪೈಯರ್​ಗೆ ಪ್ರವೇಶ ಮಾಡಿದ ಎರಡನೇ ತಂಡವಾಗಿದೆ. ಗುಜರಾತ್​ ವಿರುದ್ಧ ಮೇ 23 ರಂದು ಚೆನ್ನೈನಲ್ಲಿ ಮೊದಲ ಕ್ವಾರ್ಟರ್ ಫೈನಲ್ ಪಂದ್ಯ ಆಡಲಿದೆ.

ನವದೆಹಲಿ:ಚೆನ್ನೈ ಸೂಪರ್​ ಕಿಂಗ್ಸ್​ ನೀಡಿದ್ದ ಬೃಹತ್​ ಮೊತ್ತವನ್ನು ಪೇರಿಸಲಾಗದೆ ಡೆಲ್ಲಿ ಕ್ಯಾಪಿಟಲ್ಸ್​ ಮಣಿಯಿತು. ಇದರಿಂದ ಧೋನಿ ನಾಯಕತ್ವದ ಚೆನ್ನೈ ಪ್ಲೇ ಆಫ್​ ಪ್ರವೇಶ ಪಡೆದುಕೊಂಡಿದ್ದು, ಈ ಆವೃತ್ತಿಯ ಎರಡನೇ ತಂಡವಾಗಿದೆ. ಹಳದಿ ಪಡೆ 224 ರನ್​ ಗುರಿ ನೀಡಿತ್ತು. ಇದನ್ನು ಬೆನ್ನು ಹತ್ತಿದ ಡೆಲ್ಲಿ ನಿಗದಿತ ಓವರ್​ ಅಂತ್ಯಕ್ಕೆ 9 ವಿಕೆಟ್​ ನಷ್ಟಕ್ಕೆ 146 ರನ್​ ಮಾತ್ರ ಗಳಿಸಿತು. ಇದರಿಂದ ಚೆನ್ನೈ 77 ರನ್​ ದೊಡ್ಡ ಗೆಲುವು ದಾಖಲಿಸಿತು.

ಡೆಲ್ಲಿ ಈ ಆವೃತ್ತಿಯ ಉದ್ದಕ್ಕೂ ಬ್ಯಾಟಿಂಗ್ ವೈಫಲ್ಯವನ್ನು ಎದುರಿಸಿಕೊಂಡೇ ಬಂದಿದೆ. ಇಂದು ಸಹ ಮತ್ತೆ ಚೆನ್ನೈ ಬೌಲರ್​ಗಳ ಮುಂದೆ ಡೆಲ್ಲಿ ಬ್ಯಾಟರ್​ಗಳು ಪೆವಿಲಿಯನ್​ ಪರೇಡ್​ ನಡೆಸಿದರು. ಡೆಲ್ಲಿ ಕ್ಯಾಪಿಟಲ್ಸ್​ ನಾಯಕ ಡೇವಿಡ್​ ವಾರ್ನರ್​ ಮಾತ್ರ ಏಕಾಂಗಿ ಆಟ ಪ್ರದರ್ಶಿಸಿದರು. ಅವರ ಬ್ಯಾಟಿಂಗ್​ ನೆರವಿನಿಂದ ಡೆಲ್ಲಿ 100 ರನ್​ ಗಡಿ ದಾಟಿತು. ವಾರ್ನರ್​ 58 ಬಾಲ್​ನಲ್ಲಿ 5 ಸಿಕ್ಸ್ ಮತ್ತು 7 ಬೌಂಡರಿಯಿಂದ 86 ರನ್​ ಕಲೆಹಾಕಿ 14 ರನ್​ನಿಂದ ಶತಕ ವಂಚಿತರಾದರು. ಉಳಿದಂತೆ ಅಕ್ಷರ್​ ಪಟೇಲ್​ 15 ಮತ್ತು ಯಶ್ ಧುಲ್ 13 ರನ್​ ಗಳಿಸಿದ್ದೇ ಹೆಚ್ಚಿನ ಸ್ಕೋರ್​ ಆಗಿತ್ತು.

ಆರಂಭಿಕ ಆಟಗಾರ ಪೃಥ್ವಿ ಶಾ ಕಳೆದ ಪಂದ್ಯದಲ್ಲಿ ಅರ್ಧಶತಕ ಗಳಿಸಿ ಭರವಸೆ ಮೂಡಿಸಿದ್ದರೆ, ಈ ಪಂದ್ಯದಲ್ಲಿ 5 ರನ್​ ಔಟ್​ ಆದರು. ಆವರಂತೆ ಒಂದಂಕಿಗೆ 6 ಜನ ವಿಕೆಟ್​ ಕೊಟ್ಟರು. ಫಿಲಿಪ್ ಸಾಲ್ಟ್ 3, ರಿಲೀ ರೋಸೊವ್ 0, ಅಮನ್ ಹಕೀಮ್ ಖಾನ್ 7, ಲಲಿತ್ ಯಾದವ್ 6 ಮತ್ತು ಕುಲದೀಪ್ ಯಾದವ್ ಶೂನ್ಯಕ್ಕೆ ವಿಕೆಟ್​ ಕೊಟ್ಟರು. ಚೆನ್ನೈ ಪರ ದೀಪಕ್​ ಚಹಾರ್​ 3, ತೀಕ್ಷ್ಣ ಮತ್ತು ಪಥಿರಣ 2 ವಿಕೆಟ್​ ಪಡೆದರೆ, ಜಡೇಜಾ ಹಾಗೂ ದೇಶ ಪಾಂಡೆ ಒಂದೊಂದು ವಿಕೆಟ್​ ಉರುಳಿಸಿದರು.

ಇದಕ್ಕೂ ಮುನ್ನ ಪ್ಲೇ ಆಫ್​ ಪ್ರವೇಶದ ಮಹತ್ವದ ಪಂದ್ಯದಲ್ಲಿ ಚೆನ್ನೈ ಸೂಪರ್​​ ಕಿಂಗ್ಸ್​ನ ಆರಂಭಿಕ ಜೊತೆಗಾರರು ಮತ್ತೊಂದು ಬೃಹತ್​ ರನ್​ನ ಜೊತೆಯಾಟ ನೀಡಿದ್ದಾರೆ. ರುತುರಾಜ್ ಗಾಯಕ್ವಾಡ್ ಮತ್ತು ಡೆವೊನ್ ಕಾನ್ವೇ ಅವರ ಮೊದಲ ವಿಕೆಟ್​ಗೆ 141 ರನ್​ನ ಕಲೆಹಾಕಿದರು. ಈ ಮೂಲಕ ಐಪಿಎಲ್​ನಲ್ಲಿ 4ನೇ ಬಾರಿಗೆ ಶತಕದ ಜೊತೆಯಾಟವನ್ನು ಈ ಜೋಡಿ ಮಾಡಿತು. ಇವರ ಬ್ಯಾಟಿಂಗ್​ ನೆರವಿನಿಂದ ಚೆನ್ನೈ ನಿಗದಿತ ಓವರ್ ಅಂತ್ಯಕ್ಕೆ 3 ವಿಕೆಟ್​ ನಷ್ಟಕ್ಕೆ 223 ರನ್​ ಹಾಕಿತು. ಡೆಲ್ಲಿ ಪಂದ್ಯ ಗೆಲ್ಲಲು 224 ರನ್​ ಗಳಿಸಬೇಕಿತ್ತು. ಆದರೆ, ಅಷ್ಟು ರನ್​ಗಳನ್ನು ಗಳಿಸಲು ವಿಫಲವಾಗಿ ಸೋಲು ಅನುಭವಿಸಿ ಐಪಿಎಲ್​​ ಸ್ಪರ್ಧೆಯಿಂದ ಹೊರ ಹೋಯಿತು.

ಟಾಸ್​ ಗೆದ್ದು ಡೆಲ್ಲಿಯ ಅರುಣ್​​ ಜೇಟ್ಲಿ ಕ್ರೀಡಾಂಗಣದಲ್ಲಿ ಬ್ಯಾಟಿಂಗ್​ ತೆಗೆದುಕೊಂಡ ಧೋನಿ ಅವರ ನಿರ್ಧಾರವನ್ನು ಮೇಲ್ಪಂಕ್ತಿಯ ಬ್ಯಾಟರ್​ಗಳು ಸಮರ್ಥಿಸಿಕೊಂಡರು. ರುತುರಾಜ್ ಗಾಯಕ್ವಾಡ್ ಮತ್ತು ಡೆವೊನ್ ಕಾನ್ವೇ ಜೋಡಿಯಿಂದ ಮತ್ತೊಂದು ದೊಡ್ಡ ಆರಂಭಿಕ ಜೊತೆಯಾಟ ಬಂತು. 141 ರನ್​ ಗಳಿಸಿ ಈ ಜೋಡಿ ಸಿಎಸ್​ಕೆಯ 4ನೇ ಬೃಹತ್​ ಜೊತೆಯಾಟವನ್ನು ಆಡಿದರು. ಈ ಬಾರಿ ಐಪಿಎಲ್​ನ ನಾಲ್ಕನೇ ಬೃಹತ್​ ಜೊತೆಯಾಟ ಎಂಬ ಕೀರ್ತಿಗೂ ಭಾಜನವಾಗಿದೆ.

ಆರಂಭಿಕ ರುತುರಾಜ್ ಗಾಯಕ್ವಾಡ್ 50 ಬಾಲ್​ ಎದುರಿಸಿ 7 ಸಿಕ್ಸ್​ ಮತ್ತು 3 ಬೌಂಡರಿ ಸಹಿತ 79 ರನ್​ ಕಲೆಹಾಕಿದರು. ನಂತರ ಬಂದ ಶಿವಂ ದುಬೆ ಅಬ್ಬರಿಸಿದರು ಕೇವಲ 9 ಬಾಲ್​ ಎದುರಿಸಿ 3 ಸಿಕ್ಸ್​ನಿಂದ 22 ರನ್​ ಕಲೆಹಾಕಿದರು. ಈ ನಡುವೆ ಶತಕದತ್ತ ದಾಪುಗಾಲು ಹಾಕುತ್ತಿದ್ದ 87 ಕ್ಕೆ ವಿಕೆಟ್​ ಒಪ್ಪಿಸಿದರು. ಅವರು ಈ ಇನ್ನಿಂಗ್ಸ್​ನಲ್ಲಿ 52 ಬಾಲ್​ ಎದುರಿಸಿ 11 ಬೌಂಡರಿ ಮತ್ತು 3 ಸಿಕ್ಸ್​ ಗಳಿಸಿದರು. 2023 ಐಪಿಎಲ್​ನಲ್ಲಿ ಅವರ ಬ್ಯಾಟ್​ನಿಂದ ಮತ್ತೊಂದು ಶತಕ ಕಾನ್ವೆ ಬ್ಯಾಟ್​ನಿಂದ ಬರುವ ನಿರೀಕ್ಷೆ ಇತ್ತು. ಆದರೆ, 13 ರನ್​ನಿಂದ ಶತಕ ವಂಚಿತರಾದರು.

ನಂತರ ಬಂದ ರವೀಂದ್ರ ಜಡೇಜಾ ಮತ್ತು ಧೋನಿ ಕೊನೆಯಲ್ಲಿ ಉತ್ತಮ ಜೊತೆಯಾಟವಾಡಿ ಅಜೇರಾಗಿ ಉಳಿದರು. 7 ಬಾಲ್​ ಎದುರಿಸಿದ ಜಡೇಜಾ 1 ಸಿಕ್ಸ್​ ಮತ್ತು 3 ಬೌಂಡರಿ ಇಂದ 20 ರನ್​ ಕಲೆಹಾಕಿದರು. ಕೇವಲ ನಾಲ್ಕು ಬಾಲ್​ ಎದುರಿಸಿದ ಧೋನಿ 5 ರನ್​ಗಳನ್ನು ಮಾತ್ರವೇ ಗಳಿಸಿದರು. ಡೆಲ್ಲಿ ಪರ ಖಲೀಲ್ ಅಹ್ಮದ್, ಅನ್ರಿಚ್ ನಾರ್ಟ್ಜೆ ಮತ್ತು ಚೇತನ್ ಸಕಾರಿಯಾ ತಲಾ ಒಂದು ವಿಕೆಟ್​ ಪಡೆದರು.

ಇದನ್ನೂ ಓದಿ:CSK vs DC: ಟಾಸ್​ ಗೆದ್ದ ಚೆನ್ನೈ ಬ್ಯಾಟಿಂಗ್​ ಆಯ್ಕೆ: ಪ್ಲೇ ಆಫ್​ ಪ್ರವೇಶ ಪಡೆಯುತ್ತಾ ತಲೈವಾ ಪಡೆ?