ಮುಂಬೈ:ಭಾರತ ತಂಡದ ಆಲ್ರೌಂಡರ್ ದೀಪಕ್ ಹೂಡ ಮೊದಲ ಬಾರಿಗೆ ತಮ್ಮ ಮತ್ತು ಕೃನಾಲ್ ಪಾಂಡ್ಯ ಜೊತೆಗಿನ ಸಂಬಂಧ ಹೇಗಿದೆ ಎಂದು ಬಹಿರಂಗವಾಗಿ ಹೇಳಿದ್ದಾರೆ. ಕಳೆದ ವರ್ಷ ಬರೋಡ ತಂಡದ ಬಯೋಬಬಲ್ ವೇಳೆ ಈ ಇಬ್ಬರು ಆಟಗಾರರ ನಡುವೆ ವೈಮನಸ್ಸು ಏರ್ಪಟ್ಟಿತ್ತು.
ಸೈಯದ್ ಮುಸ್ತಾಕ್ ಅಲಿ ಟೂರ್ನಮೆಂಟ್ ವೇಳೆ ತಂಡ ಒಟ್ಟಾಗಿ ಸೇರಿದ್ದ ವೇಳೆ ಕೃನಾಲ್ ತಮ್ಮನ್ನು ಹೀಯಾಳಿಸಿದ್ದಾರೆ ಮತ್ತು ತಮ್ಮ ಜೊತೆಗೆ ಕೆಟ್ಟದಾಗಿ ವರ್ತಿಸಿದ್ದಾರೆ ಎಂದು ದೀಪಕ್ ದೂರು ನೀಡಿದ್ದರು. ನಂತರ ತಂಡವನ್ನು ತ್ಯಜಿಸಿ ರಾಜಸ್ಥಾನ್ ಡೊಮೆಸ್ಟಿಕ್ ತಂಡ ಸೇರಿದ್ದರು.
ಆದರೆ ಈ ಜೋಡಿ 2022ರ ಮೆಗಾ ಹರಾಜಿನಲ್ಲಿ ಲಖನೌ ಸೂಪರ್ ಜೈಂಟ್ಸ್ ತಂಡವನ್ನು ಸೇರಿಕೊಂಡಿದ್ದರು. ಆದರೆ ಇಬ್ಬರ ನಡುವೆ ವೈಮಸ್ಸು ಇರುವುದರಿಂದ ಹೇಗೆ ತಂಡದಲ್ಲಿ ಒಟ್ಟಿಗೆ ಆಡಲಿದ್ದಾರೆ, ಇಬ್ಬರ ನಡುವೆ ವಿಷಯಗಳು ಹೇಗೆ ಬದಲಾಗಬಹುದೇ ಎಂಬ ಊಹಾಪೋಹಗಳೆದ್ದಿದ್ದವು, ಆದರೆ ಈ ಜೋಡಿ ಕೊನೆಗೆ ಒಟ್ಟಾಗಿ ತಂಡಕ್ಕೋಸ್ಕರ ಆಡುವ ಮೂಲಕ ದ್ವೇಷವನ್ನು ಮರೆತಿದ್ದಾರೆ.
"ಕೃನಾಲ್ ಪಾಂಡ್ಯ ನನ್ನ ಸಹೋದರನಿದ್ದಂತೆ, ಅಣ್ಣತಮ್ಮಂದಿರು ಜಗಳ ಮಾಡಿಕೊಳ್ಳುತ್ತಿರುತ್ತಾರೆ. ಇದೀಗ ನಾವಿಬ್ಬರು ಒಂದೇ ಗುರಿಯನ್ನಿಟ್ಟುಕೊಂಡು ಆಡುತ್ತಿದ್ದೇವೆ, ಅದೇನೆಂದರೆ ಲಖನೌ ಸೂಪರ್ ಜೈಂಟ್ಸ್ಗೆ ಗೆಲುವು ತಂದುಕೊಡುವುದು" ಎಂದು ಖಾಸಗಿ ಮಾಧ್ಯಮದ ಮಾತನಾಡುವ ವೇಳೆ ತಿಳಿಸಿದ್ದಾರೆ.
ಟಿ20 ವಿಶ್ವಕಪ್ನಲ್ಲಾಡುವುದು ನನ್ನ ಕನಸು:ದೇಶದ ಪ್ರತಿಯೊಬ್ಬ ಕ್ರಿಕೆಟಿಗನಂತೆ ನನಗೂ ಕೂಡ ಭಾರತ ತಂಡವನ್ನು ಪ್ರತಿನಿಧಿಸಬೇಕೆಂಬ ಕನಸಿದೆ. ಈ ನಿಟ್ಟಿನಲ್ಲಿ ನನ್ನ ಕೆಲಸವೇನೆಂದರೆ ಅತ್ಯುತ್ತಮ ಪ್ರದರ್ಶನ ನೀಡುವುದು. ಉಳಿದಿದ್ದನ್ನೆಲ್ಲಾ ಆಯ್ಕೆಗಾರರು ನಿರ್ಧರಿಸಲಿದ್ದಾರೆ. ನಾನೊಬ್ಬ ಆಲ್ರೌಂಡರ್, ಬ್ಯಾಟಿಂಗ್ ಮಾಡುವ ಜೊತೆಗೆ ಬೌಲಿಂಗ್ನಲ್ಲೂ ಉತ್ತಮ ಪ್ರದರ್ಶನ ನೀಡುವುದು ನನ್ನ ಗುರಿಯಾಗಿದೆ. ಅದನ್ನು ಬಿಟ್ಟು ಇನ್ನೇನು ಆಲೋಚಿಸುವುದಿಲ್ಲ ಎಂದು ಬರೋಡದ ಆಲ್ರೌಂಡರ್ ತಿಳಿಸಿದ್ದಾರೆ.
ಇದನ್ನೂ ಓದಿ:ಡೆಲ್ಲಿಗೆ ವಾರ್ನರ್ ಬಲ, ಲಖನೌ ಮಣಿಸಿ ಗೆಲುವಿನ ಹಳಿಗೆ ಮರಳುವತ್ತ ಕ್ಯಾಪಿಟಲ್ಸ್ ಚಿತ್ತ
