'ಹಾಲ್​ ಆಫ್​ ಫೇಮ್'​ ಗೌರವಕ್ಕೆ ಎಬಿಡಿ,ಗೇಲ್​.. IPL ಇತಿಹಾಸದಲ್ಲಿ ವಿಶೇಷ ಪ್ರಶಸ್ತಿ ಪರಿಚಯಿಸಿದ ಆರ್​ಸಿಬಿ

ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ಇಂಡಿಯನ್​ ಪ್ರೀಮಿಯರ್ ಲೀಗ್​​ನಲ್ಲಿ ಹಾಲ್​ ಆಫ್​ ಫೇಮ್​ ವಿಶೇಷ ಪ್ರಶಸ್ತಿ ಪರಿಚಯ ಮಾಡಿದ್ದು, ಚೊಚ್ಚಲ ಗೌರವಕ್ಕೆ ವೆಸ್ಟ್​ ಇಂಡೀಸ್​ ದೈತ್ಯ ಗೇಲ್ ಹಾಗೂ ಮಿ. 360 ಖ್ಯಾತಿಯ ಎಬಿಡಿ ಭಾಜನರಾಗಿದ್ದಾರೆ.

ಮುಂಬೈ:ಇಂಡಿಯನ್​ ಪ್ರೀಮಿಯರ್ ಲೀಗ್​​​ನ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ವಿಶೇಷ ಪ್ರಶಸ್ತಿ ಪರಿಚಯ ಮಾಡಿದೆ. ತಂಡದ ಪರ ಅತಿ ಹೆಚ್ಚು ವರ್ಷಗಳ ಕಾಲ ಆಟವಾಡಿರುವ ದಕ್ಷಿಣ ಆಫ್ರಿಕಾದ ಎಬಿ ಡಿವಿಲಿಯರ್ಸ್​ ಹಾಗೂ ಕೆರಿಬಿಯನ್​ ದೈತ್ಯ ಕ್ರಿಸ್​ ಗೇಲ್​​​ ಅವರು ಚೊಚ್ಚಲ ಪ್ರಶಸ್ತಿ ಗೌರವಕ್ಕೆ ಭಾಜನರಾಗಿದ್ದಾರೆ. 'ಹಾಲ್​ ಆಫ್​ ಫೇಮ್​​' ಎಂಬ ಹೆಸರಿನಲ್ಲಿ ಪ್ರಶಸ್ತಿ ಪರಿಚಯ ಮಾಡಿರುವ ಆರ್​​ಸಿಬಿ, ಖಾಸಗಿ ಹೋಟೆಲ್​​ನಲ್ಲಿ ಆಯೋಜನೆ ಮಾಡಿದ್ದ ಕಾರ್ಯಕ್ರಮದಲ್ಲಿ ದಿಗ್ಗಜ ಆಟಗಾರರೊಂದಿಗೆ ಸಂವಾದ ಸಹ ನಡೆಸಿದರು.

ಇಂಡಿಯನ್​ ಪ್ರೀಮಿಯರ್ ಲೀಗ್​​ನಲ್ಲಿ ಸದ್ಯ 5ನೇ ಸ್ಥಾನದಲ್ಲಿರುವ ಆರ್​ಸಿಬಿ ಕೊನೆಯ ಪಂದ್ಯದಲ್ಲಿ ಗೆಲುವು ಸಾಧಿಸಿ, ಪ್ಲೇ-ಆಫ್ ರೇಸ್​​ಗೆ ಲಗ್ಗೆ ಹಾಕುವ ಇರಾದೆ ಇಟ್ಟುಕೊಂಡಿದೆ. ಈ ಮಧ್ಯೆ ಆರ್​​ಸಿಬಿ ಪರ ಸುಮಾರು 11 ವರ್ಷಗಳ ಕಾಲ(2011-2021) ಆಡಿರುವ ಎಬಿಡಿ, ಹಾಗೂ 7 ವರ್ಷಗಳ ಕಾಲ ಆಡಿರುವ ಸ್ಫೋಟಕ ಬ್ಯಾಟರ್​ ಕ್ರಿಸ್​ ಗೇಲ್​ಗೆ(2011-2017) ಹಾಲ್​ ಆಫ್​ ಫೇಮ್​​ ಚೊಚ್ಚಲ ಪ್ರಶಸ್ತಿ ಘೋಷಣೆ ಮಾಡಿ, ಗೌರವಿಸಲಾಗಿದೆ. ಆರ್​ಸಿಬಿ ಪರ ಈ ಇಬ್ಬರು ಪ್ಲೇಯರ್ಸ್​​​​ ಅನೇಕ ಮ್ಯಾಚ್​ ವಿನ್ನಿಂಗ್​ ಪ್ರದರ್ಶನ ನೀಡಿ, ಲಕ್ಷಾಂತರ ಅಭಿಮಾನಿಗಳ ಹೃದಯದಲ್ಲಿ ವಿಶೇಷ ಸ್ಥಾನ ಗಳಿಸಿದ್ದಾರೆ.

ಮುಂಬೈನ ಖಾಸಗಿ ಹೋಟೆಲ್​​ನಲ್ಲಿ ಆಯೋಜನೆಗೊಂಡಿದ್ದ ಕಾರ್ಯಕ್ರಮದಲ್ಲಿ ತಂಡದ ಮಾಜಿ ಕ್ಯಾಪ್ಟನ್​ ವಿರಾಟ್​ ಕೊಹ್ಲಿ ವಿಶೇಷವಾಗಿ ಗುಣಗಾನ ಮಾಡಿದ್ದು, ಅವರೊಂದಿಗಿನ ತಮ್ಮ ಒಡನಾಟ ಹಾಗೂ ವಿಶೇಷ ಅನುಭವ ಹಂಚಿಕೊಂಡರು. ಇಂಡಿಯನ್​ ಪ್ರೀಮಿಯರ್ ಲೀಗ್​​ನಲ್ಲಿ ಕ್ರಿಕೆಟರ್ಸ್​ ಆಡುವ ಮನೋಭಾವ ಮಾಡಿರುವ ಶ್ರೇಯ ನಿಮಗೆ ಸಲ್ಲುತ್ತದೆ. ಈ ಹಿಂದಿನ ಐಪಿಎಲ್​ಗೂ ಸದ್ಯದ ಪರಿಸ್ಥಿತಿಗೂ ತುಂಬಾ ಬದಲಾವಣೆಗಳಾಗಿದ್ದು, ಅದಕ್ಕೆ ಮುಖ್ಯ ಕಾರಣ ನೀವು ಬೀರಿರುವ ಪ್ರಭಾವ ಎಂದು ಇಬ್ಬರು ದಿಗ್ಗಜಗಳ ಬಗ್ಗೆ ಕೊಹ್ಲಿ ಗುಣಗಾನ ಮಾಡಿದರು.

ಕಾರ್ಯಕ್ರಮದ ವೇಳೆ ಎಬಿಡಿ ಹಾಗೂ ಗೇಲ್​ ವಿಡಿಯೋ ಕಾಲ್​ ಮೂಲಕ ಆರ್​ಸಿಬಿ ಎಲ್ಲ ಪ್ಲೇಯರ್ಸ್ ಜೊತೆ ಸಂಭಾಷಣೆ ನಡೆಸಿದರು. ಜೊತೆಗೆ ತಮ್ಮ ವಿಶೇಷ ಅನುಭವ ಹಂಚಿಕೊಂಡರು. ಈ ವೇಳೆ ಗೇಲ್​ ಮಾತನಾಡಿ, ಆರ್​ಸಿಬಿ ತಂಡ ಯಾವಾಗಲೂ ನನಗೆ ಫೇವರೆಟ್​, ಅದು ನನ್ನ ಹೃದಯದಲ್ಲಿರುತ್ತದೆ ಎಂದರು. ಈ ಪ್ಲೇಯರ್ಸ್​​ಗೆ ಮುಂದಿನ ವರ್ಷ ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುವ ಕಾರ್ಯಕ್ರಮದಲ್ಲಿ 'ಹಾಲ್​ ಆಫ್​​ ಫೇಮ್​' ಪ್ರಶಸ್ತಿ ನೀಡಿ, ಗೌರವಿಸಲು ನಿರ್ಧಾರ ಕೈಗೊಳ್ಳಲಾಗಿದೆ.