ನವದೆಹಲಿ:ಐಪಿಎಲ್ 2023ರ ಇಂಡಿಯನ್ ಪ್ರೀಮಿಯರ್ ಲೀಗ್ನ ಫೈನಲ್ ಪಂದ್ಯ ಮಳೆಯಿಂದಾಗಿ ಅನೇಕ ಅಭಿಮಾನಿಗಳಿಗೆ ಬೇಸರ ಉಂಟು ಮಾಡಿತ್ತು. 28 ರಂದು ಭಾನುವಾರ ಅದ್ಧೂರಿಯಾಗಿ ಫೈನಲ್ಗೆ ಎಲ್ಲ ತಯಾರಿಗಳು ನಡೆದಿದ್ದವು. ಆದರೆ, ವರುಣ ಕೊಂಚವೂ ಬಿಡುವು ನೀಡದ ಹಿನ್ನೆಲೆ ಮೀಸಲು ದಿನಕ್ಕೆ ಪಂದ್ಯವನ್ನು ಮುಂದೂಡಲಾಯಿತು. ಮೀಸಲು ದಿನದ ಎರಡನೇ ಇನ್ನಿಂಗ್ಸ್ ವೇಳೆಯೂ ಮಳೆ ಬಂದು ರಾತ್ರಿ 12 ಗಂಟೆಗೆ ಓವರ್ ಕಡಿತಗೊಳಿಸಿ ಪಂದ್ಯವನ್ನು ಆಡಿಸಲಾಯಿತು. ಚೆನ್ನೈ ಸೂಪರ್ ಕಿಂಗ್ಸ್ ಪಂದ್ಯ ಗೆದ್ದು 5ನೇ ಬಾರಿಗೆ ಐಪಿಎಲ್ ಟ್ರೋಫಿ ತನ್ನದಾಗಿಸಿಕೊಂಡಿತು.
ಚಾಂಪಿಯನ್ ಆದ ನಂತರ, ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಮಾಲೀಕ ಎನ್ ಶ್ರೀನಿವಾಸನ್ ಅವರು ಐಪಿಎಲ್ ಟ್ರೋಫಿಯೊಂದಿಗೆ ತಿರುಪತಿಗೆ ತೆರಳಿ ಪೂಜೆ ಮಾಡಿಸಿದ್ದಾರೆ. ಮಳೆಯ ಸಂಕಷ್ಟಗಳ ನಡುವೆ ಚೆನ್ನೈನ ಬ್ಯಾಟರ್ಗಳ ಅಬ್ಬರ ಬ್ಯಾಟಿಂಗ್ನಿಂದ ಒಲಿದ ಪ್ರಶಸ್ತಿಯನ್ನು ದೇವರ ಪಾದದ ಅಡಿ ಇಟ್ಟು ಗೆಲುವು ಸಮರ್ಪಿಸಿದ್ದಾರೆ. ತ್ಯಾಗರಾಯನಗರ ತಿರುಪತಿ ದೇವಸ್ಥಾನದಲ್ಲಿ ಎನ್ ಶ್ರೀನಿವಾಸನ್ ಪೂಜೆ ಮಾಡಿಸಿದ್ದಾರೆ.
ಸಪ್ತಗಿರಿವಾಸ ಮೊರೆಹೋದ ಶ್ರೀನಿವಾಸನ್: ಚೆನ್ನೈ ಫ್ರಾಂಚೈಸಿ ಮಾಲೀಕ ಎನ್ ಶ್ರೀನಿವಾಸನ್ ಅವರು ತಿರುಪತಿಯಲ್ಲಿ ಪೂಜೆ ಸಲ್ಲಿಸುತ್ತಿರುವ ವಿಡಿಯೋ ಅಂತರ್ಜಾಲದಲ್ಲಿ ವೈರಲ್ ಆಗುತ್ತಿದೆ. ಈ ವಿಡಿಯೊದಲ್ಲಿ, ಎನ್ ಶ್ರೀನಿವಾಸನ್ ಅವರು ಸಿಎಸ್ಕೆ ಮ್ಯಾನೇಜ್‌ಮೆಂಟ್ ಜೊತೆಗೆ ಐಪಿಎಲ್ ಟ್ರೋಫಿಯನ್ನು ಪೂಜೆ ಸಲ್ಲಿಸುತ್ತಿದ್ದಾರೆ. ಆದರೆ ಪೂಜೆಯಲ್ಲಿ ಸಿಎಸ್ಕೆ ಯಾವುದೇ ಆಟಗಾರರು ಕಂಡುಬಂದಿಲ್ಲ.
ಮೀಸಲು ದಿನದಲ್ಲಿ ಪಂದ್ಯದಲ್ಲಿ ಚೆನ್ನೈ ನಾಯಕ ಧೋನಿ ಟಾಸ್ ಗೆದ್ದು ಮಳೆಯ ಮುನ್ಸೂಚನೆ ಇರುವುದರಿಂದ ಮೊದಲು ಬೌಲಿಂಗ್ ಮಾಡುವುದಾಗಿ ನಿರ್ಣಯ ತೆಗೆದುಕೊಂಡರು. ಆದರೆ, ತಂಡದಿಂದ ಅದ್ಭುತ ಬೌಲಿಂಗ್ ಪ್ರದರ್ಶನ ಕಂಡುಬರಲಿಲ್ಲ. ಪ್ಲೇ ಆಫ್ ಹಂತದ 4ನೇ ಹೆಚ್ಚು ರನ್ ಗುಜರಾತ್ ಗಳಿಸಿತ್ತು. ಗಿಲ್ ಮತ್ತು ಸಹಾ ಮೊದಲ ವಿಕೆಟ್ 50+ ಜೊತೆಯಾಟ ದಾಖಲಿಸಿದರು. ನಂತರ ಬಂದ ಸಾಯಿ ಸುದರ್ಶನ್ ಭರ್ಜರಿ ಬ್ಯಾಟಿಂಗ್ ಮಾಡಿ 96 ರನ್ ಗಳಿಸಿ 4 ರನಿಂದ ಶತಕ ವಂಚಿತರಾದರು. ಸಹಾ, ಸುದರ್ಶನ್ ಮತ್ತು ಹಾರ್ದಿಕ್ ಪಾಂಡ್ಯರ ಬ್ಯಾಟಿಂಗ್ ಬಲದಿಂದ ಗುಜರಾತ್ ಟೈಟಾನ್ಸ್ 214 ರನ್ನ ಬೃಹತ್ ಗುರಿಯನ್ನು ಕೇವಲ ನಾಲ್ಕು ವಿಕೆಟ್ ಕಳೆದುಕೊಂಡು ಗಳಿಸಿದ್ದರು.
ಇದನ್ನು ಬೆನ್ನು ಹತ್ತಲು ಸಿಎಸ್ಕೆ ಮೈದಾನಕ್ಕಿಳಿದು 3 ಬಾಲ್ ಆಡುತ್ತಿದ್ದಂತೆ ಮಳೆ ಆರಂಭವಾಗಿ ಪಂದ್ಯವನ್ನು ನಿಲ್ಲಿಸಲಾಯಿತು. 9:15 ಕ್ಕೆ ಆರಂಭವಾದ ಮಳೆ ಸುಮಾರು 11 :30 ರ ವರೆಗೆ ಧಾರಾಕಾರವಾಗಿ ಸುರಿದಿದೆ. ಮಳೆ ಬಿಟ್ಟನಂತರ 12 ಗಂಟೆಗೆ ಪಂದ್ಯ ಆರಂಭಿಸಿ ಡಿಎಲ್ಎಸ್ ನಿಯಮದಂತೆ 15 ಓವರ್ಗೆ 171 ರನ್ ಗುರಿಯನ್ನು ನೀಡಲಾಯಿತು. ಸಿಎಸ್ಕೆಯ ಕಾನ್ವೆ, ದುಬೆ, ರೆಹಾನೆ, ಜಡೇಜಾ ಅವರ ಬ್ಯಾಟಿಂಗ್ನಿಂದ ಪಂದ್ಯದ ಗತಿಯನ್ನು ಬದಲಾಯಿಸಿತು. ಕೊನೆಯ ಓವರ್ನ ಎರಡು ಬಾಲ್ಗೆ ಹತ್ತು ರನ್ ಬೇಕಾಗಿದ್ದಾಗ ಜಡೇಜ ಸಿಕ್ಸ್ ಮತ್ತು ಬೌಡರಿ ಪಡೆದು ಪಂದ್ಯ ಗೆಲ್ಲಿಸಿದ್ದರು. ಈ ಮೂಲಕ ಚೆನ್ನೈ ಮುಂಬೈ ಇಂಡಿಯನ್ಸ್ನ ದಾಖಲೆಯನ್ನು ಸರಿಗಟ್ಟಿತ್ತು.
ಇದನ್ನೂ ಓದಿ:ಟೆಸ್ಟ್ ಚಾಂಪಿಯನ್ಶಿಪ್ ಟೀಮ್ ಸೇರಿಕೊಂಡ ಕ್ಯಾಪ್ಟನ್ ರೋಹಿತ್: ಲಂಡನ್ನಲ್ಲಿ ಅಭ್ಯಾಸ ಆರಂಭ
