ಚೆನ್ನೈ(ತವಿಳುನಾಡು): ಇಂದಿನ ಇಂಡಿಯನ್ ಪ್ರೀಮಿಯರ್ ಲೀಗ್ ಮ್ಯಾಚ್ನಲ್ಲಿ ತಮಿಳು ಮತ್ತು ತೆಲುಗಿನ ಹೋರಾಟ ಎಂದರೆ ತಪ್ಪಾಗದು. ಇಲ್ಲಿನ ಚೆಪಾಕ್ ಕ್ರೀಡಾಂಗಣ ಐಪಿಎಲ್ನ 29ನೇ ಪಂದ್ಯದಲ್ಲಿ ಇಂದು ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಸನ್ ರೈಸರ್ಸ್ ಹೈದರಾಬಾದ್ ಕಣಕ್ಕಿಳಿಯುತ್ತಿದೆ. ಎರಡೂ ತಂಡಗಳು ಈ ಆವೃತ್ತಿಯನ್ನು ಸೋಲಿನಿಂದ ಆರಂಭಿಸಿದರೂ, ಚೆನ್ನೈ ಉತ್ತಮ ಕಂ ಬ್ಯಾಕ್ ಕಂಡಿದೆ. ಆದರೆ ಸನ್ ರೈಸರ್ಸ್ ಮಾತ್ರ ಕುಂಟುತ್ತಿದೆ.
ಚೆನ್ನೈ ಸೂಪರ್ ಕಿಂಗ್ಸ್ ಕಳೆದ ಪಂದ್ಯದಲ್ಲಿ ರಾಯಲ್ಸ್ ಚಾಲೆಂಜರ್ಸ್ ಅನ್ನು ಬೆಂಗಳೂರಿನಲ್ಲೇ ಸೋಲಿಸಿದ್ದು, ಇಂದಿನ ತವರಿನ ಪಿಚ್ನಲ್ಲಿ ಇನ್ನಷ್ಟೂ ಹುಮ್ಮಸ್ಸಿನಿಂದ ಕಣಕ್ಕಿಳಿಯುತ್ತಿದೆ. ಆರು ಪಂದ್ಯದಲ್ಲಿ ಎರಡರಲ್ಲಿ ಸೋತಿರುವ ಚೆನ್ನೈ ಅಂಕ ಪಟ್ಟಿಯಲ್ಲಿ ಆರು ಅಂಕದಿಂದ ಮೂರನೇ ಸ್ಥಾನದಲ್ಲಿದೆ. ಇಂದಿನ ಗೆಲುವು ಸ್ಥಾನವನ್ನು ಉಳಿಸಿಕೊಳ್ಳಲು ಚೆನ್ನೈಗೆ ಸಹಕಾರವಾಗಲಿದೆ.
ಆರಂಭಿಕ ಎರಡು ಪಂದ್ಯಗಳ ಸೋಲಿನಿಂದ ಆವೃತ್ತಿ ಆರಂಭಿಸಿದ ಸನ್ ರೈಸರ್ಸ್ ಐದು ಪಂದ್ಯದಲ್ಲಿ ಎರಡನ್ನು ಮಾತ್ರ ಗೆದ್ದು ಕೊಂಡಿದೆ. ಕಳೆದ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ 14 ರನ್ ಸೋಲನುಭವಿಸಿರುವ ಐಡೆನ್ ಮಾರ್ಕ್ರಾಮ್ ಪಡೆ, ಇಂದು ಗೆಲುವಿನ ಲಯಕ್ಕೆ ಮರಳುವ ನಿರೀಕ್ಷೆಯಲ್ಲಿದೆ. ಚೆನ್ನೈ ತಂಡದ ಆಡುವ ಹನ್ನೊಂದರ ಬಳಗಕ್ಕೆ ಬೆನ್ ಸ್ಟೋಕ್ಸ್ ಬರುವ ಸಾಧ್ಯತೆ ಇದೆ. ಅವರು ಕಾಲು ಬೆರಳ ಗಾಯದಿಂದ ಚೇತರಿಸಿಕೊಂಡಿದ್ದು, ನೆಟ್ಸ್ನಲ್ಲಿ ಅಭ್ಯಾಸದಲ್ಲಿ ತೊಡಗಿ ಕೊಂಡಿದ್ದಾರೆ. ಮಹೇಶ್ ತೀಕ್ಷಣ ಮತ್ತು ಮಥೀಶ ಪತಿರಣ ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಅಜಿಂಕ್ಯ ರಹಾನೆ ಫಾರ್ಮ್ ಮೂರನೇ ಕ್ರಮಾಂಕದಲ್ಲಿ ರನ್ ವೇಗ ಹೆಚ್ಚುತ್ತಿದೆ.