ಮುಂಬೈ: ಇಂಡಿಯನ್ ಪ್ರೀಮಿಯರ್ ಲೀಗ್ನ 15ನೇ ಆವೃತ್ತಿಯಲ್ಲಿ ಸನ್ರೈಸರ್ಸ್ ಹೈದರಾಬಾದ್ ತಂಡದ ಪರ ಮಿಂಚು ಹರಿಸಿರುವ ಕೇವಲ 22 ವರ್ಷದ ಉಮ್ರಾನ್ ಮಲಿಕ್ ಹೊಸದೊಂದು ದಾಖಲೆ ಬರೆದಿದ್ದಾರೆ. ಕಳೆದ ವರ್ಷ ಅರಬ್ ನಾಡಲ್ಲಿ ನಡೆದ ಐಪಿಎಲ್ನಲ್ಲಿ ವೇಗಿ ನಟರಾಜನ್ ಅವರಿಗೆ ಕೋವಿಡ್ ಕಾಣಿಸಿಕೊಂಡಿದ್ದರಿಂದ ಅವರ ಸ್ಥಾನಕ್ಕೆ ಬದಲಿ ಆಟಗಾರನಾಗಿ ಆಯ್ಕೆಯಾಗಿದ್ದ ಉಮ್ರಾನ್ ಈ ಸಲದ ಆವೃತ್ತಿಯಲ್ಲಿ ಹಲ್ಚಲ್ ಎಬ್ಬಿಸಿ, ಎಲ್ಲರೂ ನಿಬ್ಬೆರಗಾಗುವಂತೆ ಮಾಡಿದ್ದಾರೆ.
IPLನಲ್ಲಿ ಹಲ್ಚಲ್ ಎಬ್ಬಿಸಿದ 'ಜಮ್ಮು ಏಕ್ಸ್ಪ್ರೆಸ್'.. ಪ್ರಸಕ್ತ ಸಾಲಿನ ಐಪಿಎಲ್ನಲ್ಲಿ ದಾಖಲೆಯ 157 ಕಿಲೋ ಮೀಟರ್ ವೇಗದಲ್ಲಿ ಬೌಲಿಂಗ್ ಮಾಡುವ ಮೂಲಕ ಹೊಸದೊಂದು ಇತಿಹಾಸ ನಿರ್ಮಿಸಿದ್ದ ಜಮ್ಮು ಎಕ್ಸ್ಪ್ರೆಸ್ ಖ್ಯಾತಿಯ ಉಮ್ರಾನ್ ಮಲಿಕ್, ತಾವು ಆಡಿರುವ ಲೀಗ್ನ 14 ಪಂದ್ಯಗಳಲ್ಲೂ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಐಪಿಎಲ್ನಲ್ಲಿ ನೀಡಲಾಗುವ 'ಫಾಸ್ಟೆಸ್ಟ್ ಡೆಲಿವರಿ ಆಫ್ ದಿ ಮ್ಯಾಚ್' ಅವಾರ್ಡ್ ಪ್ರತಿವೊಂದು ಪಂದ್ಯದಲ್ಲೂ ಮಲಿಕ್ ಪಡೆದುಕೊಂಡಿದ್ದಾರೆ.
ಇದನ್ನೂ ಓದಿ:ಉಮ್ರಾನ್ ಮಲಿಕ್ ಭಾರತ ತಂಡಕ್ಕೆ ಆಯ್ಕೆ: ಕಾಶ್ಮೀರದಲ್ಲಿ ಸಂಭ್ರಮ- ವಿಡಿಯೋ
ಐಪಿಎಲ್ನಲ್ಲಿ ಗಂಟೆಗೆ 150+ ಕಿ.ಮೀ ವೇಗದಲ್ಲಿ ಸ್ಥಿರವಾಗಿ ಚೆಂಡು ಎಸೆಯುವ ಉಮ್ರಾನ್ ಮಲಿಕ್ ಪ್ರತಿ ಪಂದ್ಯಗಳಲ್ಲೂ ಫಾಸ್ಟೆಸ್ಟ್ ಡೆಲಿವರಿ ಅವಾರ್ಡ್ ಗಿಟ್ಟಿಸಿಕೊಂಡಿದ್ದಾರೆ. ಪಂಜಾಬ್ ವಿರುದ್ಧ ನಡೆದ ಲೀಗ್ನ ಕೊನೆಯ ಪಂದ್ಯದಲ್ಲೂ ಉಮ್ರಾನ್ ಮಲಿಕ್ 153.5 ಕಿಲೋ ಮೀಟರ್ ವೇಗದಲ್ಲಿ ಚೆಂಡೆಸೆಯುವ ಮೂಲಕ 14ನೇ ಸಲ ಫಾಸ್ಟೆಸ್ಟ್ ಡೆಲಿವರಿ ಅವಾರ್ಡ್ ಗಿಟ್ಟಿಸಿಕೊಂಡಿದ್ದಾರೆ. ಜೊತೆಗೆ ಈ ಪ್ರಶಸ್ತಿಯನ್ನ ಪ್ರತಿವೊಂದು ಪಂದ್ಯದಲ್ಲೂ ತಮ್ಮದಾಗಿಸಿಕೊಂಡಿರುವ ಮೊದಲ ಪ್ಲೇಯರ್ ಎಂಬ ಸಾಧನೆ ಮಾಡಿದ್ದಾರೆ.
ಪ್ರಸಕ್ತ ಸಾಲಿನ ಐಪಿಎಲ್ನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ತಂಡದ ಪರ ಆಡಿರುವ ಉಮ್ರಾನ್ ಮಲಿಕ್, ತಾವು ಆಡಿರುವ 14 ಪಂದ್ಯಗಳಿಂದ 24 ವಿಕೆಟ್ ಕಿತ್ತಿದ್ದಾರೆ. ಇವರ ಅದ್ಭುತ ಪ್ರದರ್ಶಕ್ಕೆ ಬೆರಗಾಗಿರುವ ಆಯ್ಕೆ ಮಂಡಳಿ ಕೂಡ ಮುಂಬರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಟಿ-20 ಸರಣಿಗೆ ಇವರಿಗೆ ಮಣೆ ಹಾಕಿದೆ. ಜೂನ್ 9ರಿಂದ ಭಾರತದಲ್ಲೇ ದಕ್ಷಿಣ ಆಫ್ರಿಕಾ ವಿರುದ್ಧ ಐದು ಟಿ-20 ಪಂದ್ಯಗಳ ಕ್ರಿಕೆಟ್ ಸರಣಿ ನಡೆಯಲಿದೆ.
