ತಮ್ಮ ಜರ್ಸಿ ನಂಬರ್ 7ರ ರಹಸ್ಯ ಬಹಿರಂಗಗೊಳಿಸಿದ ಎಂ.ಎಸ್.ಧೋನಿ

ಆರಂಭದಲ್ಲಿ ತುಂಬಾ ಜನ 7 ನನ್ನ ಅದೃಷ್ಟ ಸಂಖ್ಯೆ ಎಂದು ಭಾವಿಸಿದ್ದರು. ಆದರೆ ಆ ಸಂಖ್ಯೆ ಬಳಸುವುದಕ್ಕೆ ತುಂಬಾ ಸರಳ ಕಾರಣವಿದೆ ಎಂದು ಧೋನಿ ವಿವರಿಸಿದ್ದಾರೆ.

ಸೂರತ್​:'7 ನನ್ನ ಹೃದಯಕ್ಕೆ ಹತ್ತಿರವಾದ ಸಂಖ್ಯೆ. ಏಕೆಂದರೆ ನಾನು 7ನೇ ತಿಂಗಳ 7ನೇ ದಿನಾಂಕದಂದು ಜನಿಸಿದ್ದೇನೆ. ಅದಕ್ಕಾಗಿ ನನ್ನ ಜರ್ಸಿಯಲ್ಲಿ ಅದೇ ನಂಬರ್ ಇದೆ. 7 ನನ್ನ ಅದೃಷ್ಟ ಸಂಖ್ಯೆ ಎನ್ನುವುದೆಲ್ಲ ಸುಳ್ಳು. ನಾನು ಆ ರೀತಿಯ ಯಾವುದೇ ಮೂಢನಂಬಿಕೆಯನ್ನು ಹೊಂದಿಲ್ಲ' ಎಂದು ಭಾರತ ತಂಡದ ಮಾಜಿ ನಾಯಕ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ನಾಯಕ ಎಂ.ಎಸ್.ಧೋನಿ ತಿಳಿಸಿದ್ದಾರೆ.

ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದಾಗಿನಿಂದಲೂ ಎಂ.ಎಸ್.ಧೋನಿ 7 ಸಂಖ್ಯೆಯನ್ನು ತಮ್ಮ ಜರ್ಸಿ ನಂಬರ್​ ಆಗಿ ಬಳಸುತ್ತಿದ್ದಾರೆ. ಇಂಡಿಯಾ ಸಿಮೆಂಟ್​ ಆಯೋಜಿಸಿದ್ದ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡುತ್ತಾ, 7ನ್ನು ಜರ್ಸಿ ನಂಬರ್ ಆಗಿ ಬಳಸುತ್ತಿರುವ ಹಿನ್ನೆಲೆಯನ್ನು ಅವರು ವಿವರಿಸಿದರು.

ಆರಂಭದಲ್ಲಿ ತುಂಬಾ ಜನ 7 ನನ್ನ ಅದೃಷ್ಟ ಸಂಖ್ಯೆ ಎಂದೇ ಭಾವಿಸಿದ್ದರು. ಅದು ನಾನು ಹುಟ್ಟಿದ 7ನೇ ತಿಂಗಳ 7ನೇ ದಿನವಷ್ಟೇ. ನನ್ನ ಜನ್ಮದಿನಾಂಕವನ್ನು ಜರ್ಸಿ ನಂಬರ್ ಆಗಿ ಬಳಸಿಕೊಂಡಿದ್ದೇನೆಯೇ ಹೊರತು, ಅದು ಒಳ್ಳೆಯ ನಂಬರ್​ ಅಥವಾ ಅದೃಷ್ಟದ ನಂಬರ್ ಎಂದಲ್ಲ ಎಂದು ಧೋನಿ ಸ್ಪಷ್ಟಪಡಿಸಿದರು.

ಕೆಲವು ಜನರು ಮತ್ತೆ ಇದರ ಬಗ್ಗೆ ಕೇಳುತ್ತಲೇ ಇರುತ್ತಾರೆ. ಹಾಗಾಗಿ ನಾನು ಜನ್ಮದಿನಾಂಕ ಮತ್ತು ತಿಂಗಳು ಎಂದು ಹೇಳುವುದರ ಜೊತೆಗೆ ಕೆಲವೊಮ್ಮೆ 81 ನಾನು ಹುಟ್ಟಿದ ವರ್ಷ. ಅಷ್ಟೇ ಅಲ್ಲ, 8-1=7 ಎಂದು ಹೆಚ್ಚಿಗೆ ಸೇರಿಸಿ ಹೇಳುತ್ತೇನೆ ಎಂದು ಸಿಎಸ್​ಕೆ ನಾಯಕ ಹೇಳಿದರು.

ಐಪಿಎಲ್‌ ಹಾಲಿ ಚಾಂಪಿಯನ್​ ಚೆನ್ನೈ ಸೂಪರ್ ಕಿಂಗ್ಸ್ ಈಗಾಗಲೆ ಸೂರತ್​ನಲ್ಲಿ ಅಭ್ಯಾಸ ಆರಂಭಿಸಿದೆ. ಮಾರ್ಚ್​ 26ರಂದು ವಾಂಖೆಡೆಯಲ್ಲಿ ನಡೆಯಲಿರುವ ಉದ್ಘಾಟನಾ ಪಂದ್ಯದಲ್ಲಿ ಕೆಕೆಆರ್​ ವಿರುದ್ಧ ಕಣಕ್ಕಿಳಿಯಲಿದೆ.

ಇದನ್ನೂ ಓದಿ:ನಾಯಕತ್ವ ತ್ಯಜಿಸಿ ಒತ್ತಡಮುಕ್ತ ಕೊಹ್ಲಿ ಎದುರಾಳಿಗಳಿಗೆ ಅಪಾಯಕಾರಿ: ಮ್ಯಾಕ್ಸ್​ವೆಲ್