ಮುಂಬೈ: ಪ್ರಸಕ್ತ ಸಾಲಿನ ಇಂಡಿಯನ್ ಪ್ರೀಮಿಯರ್ ಲೀಗ್ನ ಇಂದಿನ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ಪಂಜಾಬ್ ತಂಡಗಳ ನಡುವೆ ಸೆಣಸಾಟ ನಡೆಯಲಿದ್ದು, ಇಂದಿನ ಪಂದ್ಯದಲ್ಲಿ ಗೆಲುವು ಸಾಧಿಸಿ ಖಾತೆ ತೆರೆಯುವ ತವಕದಲ್ಲಿ ಸಿಎಸ್ಕೆ ತಂಡ ಇದೆ.
ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಚೆನ್ನೈ ಸೂಪರ್ ಕಿಂಗ್ಸ್ 7 ವಿಕೆಟ್ಗಳ ಸೋಲು ಕಂಡಿದ್ದು, ರಾಜಸ್ಥಾನ ರಾಯಲ್ಸ್ ವಿರುದ್ಧ ಪಂಜಾಬ್ 4 ರನ್ಗಳ ಭರ್ಜರಿ ಗೆಲುವು ದಾಖಲು ಮಾಡಿದೆ. ಎಲ್ಲ ವಿಭಾಗಗಳಲ್ಲೂ ಪಂಜಾಬ್ ತಂಡ ಬಲಿಷ್ಠವಾಗಿರುವ ಕಾರಣ ಸಿಎಸ್ಕೆಗೆ ಕಠಿಣ ಸವಾಲು ನೀಡುವ ಸಾಧ್ಯತೆ ಇದೆ.
ಹಿಂದಿನ ಪಂದ್ಯದಲ್ಲಿ ಸಿಎಸ್ಕೆ ಪರ ಸುರೇಶ್ ರೈನಾ(54), ಮೊಯಿನ್ ಅಲಿ(36) ಸ್ಯಾಮ್ ಕರ್ರನ್(34), ಜಡೇಜಾ(26) ಹಾಗೂ ರಾಯುಡು (23)ರನ್ಗಳಿಕೆ ಮಾಡಿದ್ದರು. ಆದರೆ ಧೋನಿ ತಾವು ಎದುರಿಸಿದ್ದ ಎರಡನೇ ಎಸೆತದಲ್ಲಿ ವಿಕೆಟ್ ಒಪ್ಪಿಸಿದ್ದರು. ಜತೆಗೆ ಆರಂಭಿಕರಾಗಿ ಕಣಕ್ಕಿಳಿದಿದ್ದ ರಿತುರಾಜ್ ಗಾಯಕ್ವಾಡ್ ಹಾಗೂ ಫಾಫು ಡುಪ್ಲೆಸಿಸ್ ವೈಫಲ್ಯ ಅನುಭವಿಸಿದ್ದರು.
ಮೊದಲ ಪಂದ್ಯದಲ್ಲೇ ಆರ್ಭಟಿಸಿರುವ ಕೆಎಲ್ ರಾಹುಲ್(91)ರನ್, ಕ್ರಿಸ್ ಗೇಲ್(40)ರನ್ ಹಾಗೂ ದೀಪಕ್ ಹೂಡಾ(64)ರನ್ ತಂಡಕ್ಕೆ ಆಧಾರವಾಗಿದ್ದು, ಇಂದಿನ ಪಂದ್ಯದಲ್ಲೂ ತಮ್ಮ ಪ್ರದರ್ಶನ ಮುಂದುವರೆಸುವ ಸಾಧ್ಯತೆ ಇದೆ. ಬೌಲಿಂಗ್ ವಿಭಾಗದಲ್ಲಿ ಪಂಜಾಬ್ ಪರ ಅರ್ಷದೀಪ್ ಸಿಂಗ್,ಮೊಹಮ್ಮದ್ ಶಮಿ, ರಿಚರ್ಡ್ಸನ್ ಆಕ್ರಮಣಕಾರಿಯಾಗಿದ್ದಾರೆ.