ಅಮಿತ್ ಮಿಶ್ರಾ ದಾಳಿಗೆ ಮುಗ್ಗರಿಸಿದ ಚಾಂಪಿಯನ್ಸ್: ಡೆಲ್ಲಿ ಗೆಲುವಿಗೆ ಕೇವಲ 138ರನ್ ಟಾರ್ಗೆಟ್​​​

ಮುಂಬೈ ಇಂಡಿಯನ್ಸ್ 20 ಓವರ್​ಗಳಲ್ಲಿ 9 ವಿಕೆಟ್ ಕಳೆದುಕೊಂಡು ಕೇವಲ 137 ರನ್​ಗಳಿಸಿದೆ. ಅಮಿತ್ ಮಿಶ್ರಾ 4 ವಿಕೆಟ್ ಪಡೆದರೆ, ಆವೇಶ್ ಖಾನ್​ 2 ವಿಕೆಟ್ ಪಡೆದು ಚಾಂಪಿಯನ್​ ತಂಡದ ಬ್ಯಾಟ್ಸ್​ಮನ್​ಗಳಿಗೆ ಕಡಿವಾಣ ಹಾಕುವಲ್ಲಿ ಯಶಸ್ವಿಯಾಗಿದ್ದಾರೆ.

ಚೆನ್ನೈ: ಅನುಭವಿ ಸ್ಪಿನ್ನರ್​ ಅಮಿತ್ ಮಿಶ್ರಾ ಬೌಲಿಂಗ್ ದಾಳಿಗೆ ತತ್ತರಿಸಿದ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ 20 ಓವರ್​ಗಳಲ್ಲಿ 8 ವಿಕೆಟ್​ ಕಳೆದುಕೊಂಡು 137 ರನ್​ಗಳಿಸಿದೆ.

ಟಾಸ್​​ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಮುಂಬೈ ಇಂಡಿಯನ್ಸ್ ಆರಂಭದಿಂದಲೂ ವಿಕೆಟ್ ಕಳೆದುಕೊಳ್ಳುತ್ತಾ ಸಾಗಿತು. ಕೇವಲ 9 ರನ್​ಗಳಿಸಿ ಡಿಕಾಕ್ ಔಟಾದರೆ. ಭರವಸೆಯ ಬ್ಯಾಟ್ಸ್​ಮನ್ ಸೂರ್ಯಕುಮಾರ್ ಯಾದವ್​ 15 ಎಸೆತಗಳಲ್ಲಿ 24 ರನ್​ಗಳಿಸಿ ಆವೇಶ್​ ಖಾನ್​ಗೆ ವಿಕೆಟ್​ ಒಪ್ಪಿಸಿದರು. ನಾಯಕ ರೋಹಿತ್ ಶರ್ಮಾ ಸ್ಪೋಟಕ ಆಟಕ್ಕೆ ಮುಂದಾಗಿ ವಿಕೆಟ್​ ಕಳೆದುಕೊಂಡರು. ಅವರು 30 ಎಸೆತಗಳಲ್ಲಿ ತಲಾ 3 ಬೌಂಡರಿ ಮತ್ತು ಸಿಕ್ಸರ್​ಗಳ ನೆರವಿನಿಂದ 44 ರನ್​ಗಳಿಸಿದರು.

ರೋಹಿತ್ ನಂತರ ಬಂದ ಹಾರ್ದಿಕ್​ ಮಿಶ್ರಾರ ಅದೇ ಓವರ್​ನಲ್ಲಿ ​ಸ್ಟೀವ್​ ಸ್ಮಿತ್​ಗೆ ಕ್ಯಾಚ್​ ನೀಡಿ ಡಕ್​ ಔಟಾದರು. ಇವರ ಸಹೋದರ ಕೃನಾಲ್ 1 ಮತ್ತು ಪೊಲಾರ್ಡ್​ 2 ರನ್​ಗಳಿಸಿ ಬಂದಷ್ಟೇ ವೇಗವಾಗಿ ಪೆವಿಲಿಯನ್ ಸೇರಿಕೊಂಡರು.

ಇಶಾನ್ ಕಿಶನ್ 26 ಮತ್ತು ಜಯಂತ್ ಯಾದವ್​ 23 ರನ್​ಗಳಿಸಿ ತಂಡದ ಮೊತ್ತವನ್ನು 100ರ ಗಡಿ ದಾಟಿಸಿದರು. ಕೊನೆಯಲ್ಲಿ ಮುಂಬೈ 20 ಓವರ್​ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 137 ರನ್​ಗಳಿಸಿತು.

ಡೆಲ್ಲಿ ಕ್ಯಾಪಿಟಲ್ಸ್ ಪರ ಅಮಿತ್ ಮಿಶ್ರಾ 24ಕ್ಕೆ 4, ಆವೇಶ್ ಖಾನ್ 15ಕ್ಕೆ 2, ಲಲಿತ್ ಯಾದವ್​ , ಕಗಿಸೋ ರಬಾಡ ಮತ್ತು ಮಾರ್ಕಸ್ ಸ್ಟೋಯ್ನಿಸ್​ ತಲಾ ಒಂದು ವಿಕೆಟ್ ಪಡೆದರು.