ಅಬುದಾಭಿಯಲ್ಲಿ ಪಂಜಾಬ್ vs ಕೆಕೆಆರ್​ ಫೈಟ್: ಗೆಲ್ಲಲೇಬೇಕಾದ ಒತ್ತಡದಲ್ಲಿ ರಾಹುಲ್ ಪಡೆ

ಟೂರ್ನಿಯಲ್ಲಿ ಸಾಲು ಸಾಲು ಸೋಲುಗಳಿಂದ ನಿರಾಶೆ ಅನುಭವಿಸಿರುವ ಪಂಜಾಬ್​ ತಂಡ, ಬಲಿಷ್ಠ ಚೆನ್ನೈ ತಂಡವನ್ನು ಕಡಿಮೆ ರನ್​ಗಳಿಗೆ ಕಟ್ಟಿಹಾಕಿ ಆತ್ಮವಿಶ್ವಾಸದ ಅಲೆಯಲ್ಲಿ ತೇಲುತ್ತಿರುವ ಕೆಕೆಆರ್​ ತಂಡವನ್ನು ಎದುರಿಸುತ್ತಿದೆ.

ಅಬುಧಾಬಿ: ಇಂದು ಮಧ್ಯಾಹ್ನ ನಡೆಯುವ ಇಂಡಿಯನ್ ಪ್ರೀಮಿಯರ್ ಲೀಗ್​ನ ಮೊದಲ ಪಂದ್ಯದಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ಮತ್ತು ಕೋಲ್ಕತ್ತಾ ನೈಟ್​ ರೈಡರ್ಸ್​ ತಂಡಗಳು ಸೆಣಸಾಡಲಿವೆ.

ಈಗಾಗಲೇ 5 ಪಂದ್ಯಗಳನ್ನು ಕೈಚೆಲ್ಲಿರುವ ಪಂಜಾಬ್ ಗೆಲ್ಲಲೇಬೇಕಾದ ಒತ್ತಡಕ್ಕೆ ಸಿಲುಕಿದೆ. ಬರಿ ಗೆಲುವಷ್ಟೇ ಅಲ್ಲ, ಉತ್ತಮ ರನ್​ರೇಟ್​ ಕೂಡ ಪಂಜಾಬ್​ಗೆ ಅವಶ್ಯವಾಗಿದೆ. ಟಿ-20 ಸ್ಟಾರ್​ ಬ್ಯಾಟ್ಸ್​ಮನ್​ಗಳಿದ್ದರೂ ಪಂಜಾಬ್ ಅದೃಷ್ಠ ಸರಿ ಇದ್ದಂತೆ ಕಾಣುತ್ತಿಲ್ಲ. ಬ್ಯಾಟ್ಸ್​ಮನ್​ಗಳ ವೈಫಲ್ಯ ತಂಡಕ್ಕೆ ದೊಡ್ಡ ಹೊಡೆತವಾಗಿದೆ.

ಕಿಂಗ್ಸ್ ಇಲೆವೆನ್ ಪಂಜಾಬ್

ಕಳೆದ ಪಂದ್ಯದಲ್ಲಿ ನಿಕೋಲಸ್ ಪೂರನ್ ಹೊರತುಪಡಿಸಿ ಯಾವೊಬ್ಬ ಬ್ಯಾಟ್ಸ್​ಮನ್​ ಕೂಡ ಮಿಂಚಲಿಲ್ಲ. ಟೂರ್ನಿ ಆರಂಭವಾದಾಗಿನಿಂದ ಮ್ಯಾಕ್ಸ್​ವೆಲ್ ಸಿಡಿಯದಿರುವುದು ತಂಡಕ್ಕೆ ತಲೆನೋವಾಗಿದೆ. ಇತ್ತ ಬೌಲಿಂಗ್​ನಲ್ಲೂ ರಾಹುಲ್​ ಹುಡುಗರು ಎಡವುತ್ತಿದ್ದಾರೆ. ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ 15 ಓವರ್​ಗಳವರೆಗೆ ಒಂದೇ ಒಂದು ವಿಕೆಟ್ ಕೂಡ ಪಡೆಯಲು ಸಾಧ್ಯವಾಗಿರಲಿಲ್ಲ. ಆದರೆ ಪಂದ್ಯದ ಅಂತ್ಯದಲ್ಲಿ ಸ್ಪಿನ್ನರ್ ರವಿ ಬಿಶ್ನೋಯಿ 3 ವಿಕೆಟ್ ಪಡೆದು ಮಿಂಚಿದ್ದರು.

ಇತ್ತ ಕೆಕೆಆರ್​ ತಂಡ ಆಡಿದ 5 ಪಂದ್ಯಗಳ ಪೈಕಿ 3ರಲ್ಲಿ ಜಯ ಸಾಧಿಸಿದ್ದು ಉತ್ತಮ ಪ್ರದರ್ಶನ ತೋರಿದೆ. ಕಳೆದ ಪಂದ್ಯದಲ್ಲಿ ಕಡಿಮೆ ರನ್​ ಗಳಿಸಿದ್ರೂ ಬಲಿಷ್ಠ ಸಿಎಸ್​ಕೆ ತಂಡವನ್ನು ಕಡಿಮೆ ರನ್​ಗಳಿಗೆ ಕಟ್ಟಿಹಾಕಿ ಜಯ ಸಾಧಿಸಿದ್ದು ಆತ್ಮವಿಶ್ವಾಸವನ್ನು ಹೆಚ್ಚಿಸಿಕೊಂಡಿದೆ.

ಕೋಲ್ಕತ್ತಾ ನೈಟ್​ ರೈಡರ್ಸ್

ಮೊದಲ ಬಾರಿ ಆರಂಭಿಕನಾಗಿ ಕಣಕ್ಕಿಳಿದ ರಾಹುಲ್‌ ತ್ರಿಪಾಠಿ ಅಮೋಘ ಪ್ರದರ್ಶನ ತೋರಿದರು. ಶುಬ್ಮನ್ ಗಿಲ್,​ ಮಾರ್ಗನ್, ನಿತೀಶ್ ರಾಣಾ ಉತ್ತಮ ಲಯದಲ್ಲಿದ್ದಾರೆ. ಆದರೆ ರಸೆಲ್​ ಮಾತ್ರ ಬ್ಯಾಟಿಂಗ್​ನಲ್ಲಿ ಮಿಂಚುತ್ತಿಲ್ಲ. ಬೌಲಿಂಗ್‌ನಲ್ಲಿ ಕಮಾಲ್​ ಮಾಡಿದ್ದ ಕಮಲೇಶ್‌ ನಾಗರ್‌ಕೋಟಿ, ಶಿವಂ ಮಾವಿ, ವರುಣ್‌ ಚರ್ಕವರ್ತಿ ಮೇಲೆ ಇಂದು ತಂಡ ಹೆಚ್ಚು ನಿರೀಕ್ಷೆ ಇಟ್ಟುಕೊಂಡಿದೆ.

ಪಂಜಾಬ್ - ಕೆಕೆಆರ್​ ಮುಖಾಮುಖಿ

ಉಭಯ ತಂಡಗಳು ಇಲ್ಲಿಯವರೆಗೆ 25 ಪಂದ್ಯಗಳಲ್ಲಿ ಮುಖಾಮುಖಿಯಾಗಿದ್ದು, 8 ಪಂದ್ಯಗಳಲ್ಲಿ ಪಂಜಾಬ್ ಗೆಲುವು ಸಾಧಿಸಿದ್ರೆ, 17 ಪಂದ್ಯಗಲ್ಲಿ ಕೆಕೆಆರ್​ ಗೆಲುವಿನ ನಗೆ ಬೀರಿದೆ.