ಮಳೆಯಿಂದ ಆರ್​ಸಿಬಿ-ಆರ್​ಆರ್​ ಪಂದ್ಯ ರದ್ದು.. ಉಭಯ ತಂಡಗಳಿಗೂ ಒಂದೊಂದು ಅಂಕ

ಆರ್​ಸಿಬಿ-ರಾಜಸ್ಥಾನ ನಡುವಿನ ಐಪಿಎಲ್​ ಪಂದ್ಯಕ್ಕೆ ವರುಣ ಅಡ್ಡಿ. ಉಭಯ ತಂಡಗಳಿಗೂ ತಲಾ ಒಂದೊಂದು ಅಂಕ, ಬೇರೆಯವರ ಫಲಿತಾಂಶದ ಮೇಲೆ ಆರ್​ಆರ್​ ಪ್ಲೇ ಆಫ್​ ಭವಿಷ್ಯ ನಿರ್ಧಾರವಾಗಲಿದೆ.

ಬೆಂಗಳೂರು:ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಆರ್​ಸಿಬಿ ಮತ್ತು ರಾಜಸ್ಥಾನ ನಡುವಿನ ಪಂದ್ಯ ಮಳೆಯಿಂದ ರದ್ದಾಗಿದ್ದು, ಎರಡು ತಂಡಗಳಿಗೆ ತಲಾ ಒಂದೊಂದು ಅಂಕ ನೀಡಲಾಗಿದೆ.

ಮಳೆಯ ಕಾರಣದಿಂದ ಪಂದ್ಯವನ್ನ 5 ಓವರ್​ಗಳಿಗೆ ಕಡಿತಗೊಳಿಸಲಾಗಿತ್ತು. ಪರಿಣಾಮ ಮೊದಲ ಓವರ್​ನಲ್ಲೇ ಅಬ್ಬರಿಸಿದ ಕೊಹ್ಲಿ-ಎಬಿಡಿ ಜೋಡಿ 23 ರನ್​ ಪೇರಿಸಿದರು. ಗೋಪಾಲ್​ ಎಸೆದ ಎರಡನೇ ಓವರ್​ನಲ್ಲಿ ಮೊದಲೆರಡು ಎಸೆತಗಳಲ್ಲಿ ಬೌಂಡರಿ-ಸಿಕ್ಸರ್​ ಸಿಡಿಸಿದ ಕೊಹ್ಲಿ(25) ಮೂರನೇ ಎಸೆತದಲ್ಲಿ ಕ್ಯಾಚ್​ ನೀಡಿದರು. ನಂತರ 2 ಎಸೆತಗಳಲ್ಲಿ ಎಬಿಡಿ(10) ಹಾಗೂ ಸ್ಟೋಯ್ನಿಸ್(0)​ ಕೂಡ ಕ್ಯಾಚ್​ ನೀಡಿ ಔಟಾದರು. ಶ್ರೇಯಸ್​ ಗೋಪಾಲ್ ಹ್ಯಾಟ್ರಿಕ್​ ವಿಕೆಟ್​ ಪಡೆಯುವ ಮೂಲಕ ಮತ್ತೊಮ್ಮೆ ಆರ್​ಸಿಬಿ ಪಾಲಿಗೆ ಕಂಟಕರಾದರು.

ಮೂರನೇ ಓವರ್ ಎಸೆದ ರಿಯಾನ್​ ಪರಾಗ್​ 10 ರನ್​ ಬಿಟ್ಟುಕೊಟ್ಟು 6 ರನ್​ಗಳಿಸಿದ್ದ ಗುರುಕಿರಾತ್ ವಿಕೆಟ್​ ಪಡೆದರು. 4 ನೇ ಓವರ್​ನಲ್ಲಿ ಉನಾದ್ಕಟ್​ 9 ರನ್​ ನೀಡಿ ಪಾರ್ಥೀವ್​ ಪಟೇಲ್​ ವಿಕೆಟ್​ ಪಡೆದರು. ಕೊನೆಯ ಓವರ್​ ಎಸೆದ ಒಸಾನೆ ಥಾಮಸ್​ 6 ರನ್​ ನೀಡಿ 2 ವಿಕೆಟ್​ ಪಡೆದುಕೊಂಡರು.

ಒಟ್ಟಾರೆ ಮೊದಲ ಓವರ್​ನಲ್ಲಿ 23 ರನ್​ಗಳಿಸಿದ್ದ ಆರ್​ಸಿಬಿ ತಂಡ 5 ಓವರ್​ಗಳಲ್ಲಿ 62 ರನ್ ​ಗಳಿಸಿತು.

63 ರನ್​ಗಳ ಗುರಿ ಬೆನ್ನತ್ತಿದ ರಾಜಸ್ಥಾನ ತಂಡದ ಆರಂಭಿಕ ಆಟಗಾರರು ಆರ್​ಸಿಬಿ ಬೌಲರ್​ಗಳ ಮೇಲೆ ಸವಾರಿ ಮಾಡಿದ್ರು. 3.2 ಓವರ್​ಗಲ್ಲಿ ಒಂದು ವಿಕೆಟ್​ ಕಳೆದುಕೊಂಡು 41 ರನ್​ಗಳಿಸಿರುವಾಗ ಮತ್ತೆ ಮಳೆ ಪ್ರಾರಂಭವಾಯ್ತು. ಹೀಗಾಗಿ ಪಂದ್ಯವನ್ನ ಅರ್ಧಕ್ಕೆ ಕೈಬಿಟ್ಟು, ಎರಡೂ ತಂಡಗಳಿಗೂ ಒಂದೊಂದು ಅಂಕ ನೀಡಲಾಯಿತು.

ರಾಜಸ್ಥಾನ ತಂಡದ ಪರ ಸಂಜು ಸ್ಯಾಮ್​ಸನ್ ​​28 ರನ್ ​ಗಳಿಸಿದ್ರೆ, ಲಿಯಾಮ್ ಲಿವಿಂಗ್ಸ್ಟೋನ್ 11 ರನ್ ​ಗಳಿಸಿದ್ದಾರೆ. ಇನ್ನು ಆರ್​ಸಿಬಿ ಪರ​ ಯುಜುವೇಂದ್ರ ಚಹಾಲ್​ ಒಂದು ವಿಕೆಟ್​ ಪಡೆದುಕೊಂಡರು.​