ಕೃನಾಲ್​ ಬೆನ್ನಲ್ಲೇ ಚಹಾಲ್​, ಗೌತಮ್​ಗೂ ವಕ್ಕರಿಸಿರುವ ಕೋವಿಡ್​... ಲಂಕಾದಲ್ಲಿಯೇ ಆಟಗಾರರ ಐಸೋಲೇಷನ್​

ಕೋವಿಡ್ ದೃಢಪಟ್ಟಿರುವ ಹಿನ್ನೆಲೆ ಕೃನಾಲ್​​ ಪಾಂಡ್ಯಗೆ ಶ್ರೀಲಂಕಾದಲ್ಲೇ ಚಿಕಿತ್ಸೆ ಮುಂದುವರಿಯಲಿದೆ. ಟೀಂ ಇಂಡಿಯಾದ ಇತರ ಸದಸ್ಯರು ದೇಶಕ್ಕೆ ಮರಳಲಿದ್ದಾರೆ.

ಕೊಲಂಬೊ:ಆಲ್​ರೌಂಡರ್​​ ಕೃನಾಲ್​ಗೆ ಕೋವಿಡ್​ ದೃಢಪಟ್ಟು ಐಸೋಲೇಷನ್​ನಲ್ಲಿ ಇರುವ ಈ ಹೊತ್ತಲ್ಲೇ, ಮತ್ತಿಬ್ಬರು ಭಾರತೀಯ ಆಟಗಾರರಿಗೆ ಕೊರೊನಾ ತಗುಲಿದೆ. ಯುಜ್ವೇಂದ್ರ ಚಹಾಲ್ ಮತ್ತು ಕೆ.ಗೌತಮ್​ಗೆ ಸೋಂಕು ತಗುಲಿದ್ದು, ಶ್ರೀಲಂಕಾದಲ್ಲಿಯೇ ಚಿಕಿತ್ಸೆ ಪಡೆಯಲಿದ್ದಾರೆ.

ಕೃನಾಲ್​ ಪಾಂಡ್ಯಗೆ ಕೋವಿಡ್​ ದೃಢಪಟ್ಟು ಇಂದಿಗೆ ನಾಲ್ಕು ದಿನಗಳಾಗಿದ್ದು, ಪ್ರತ್ಯೇಕವಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇದೀಗ ಈ ಇಬ್ಬರೂ ಆಟಗಾರರು ಅಲ್ಲಿಯೇ ಉಳಿಯಲಿದ್ದಾರೆ.

ಆರು ಪಂದ್ಯಗಳ ವೈಟ್- ಬಾಲ್ ಸರಣಿ ಪೂರ್ಣಗೊಳಿಸಿದ ನಂತರ ಭಾರತೀಯ ಕ್ರಿಕೆಟ್ ತಂಡವು ಇಂದು ಭಾರತಕ್ಕೆ ಮರಳಲಿದೆ. ಆದರೆ, ಈ ಮೂವರು ಆಟಗಾರರು ಕೋವಿಡ್​ ನೆಗೆಟಿವ್​ ವರದಿ ಬರುವವರೆಗೆ ಶ್ರೀಲಂಕಾದಲ್ಲಿಯೇ ಉಳಿಯಲಿದ್ದಾರೆ.

ಇಂಗ್ಲೆಂಡ್ ತಂಡದಲ್ಲಿರುವ ಇಬ್ಬರು ಆಟಗಾರರಾದ ಸೂರ್ಯಕುಮಾರ್​ ಯಾದವ್​ ಮತ್ತು ಪೃಥ್ವಿ ಶಾ ಕೊಲಂಬೊದಿಂದ ನೇರವಾಗಿ ಭಾರತಕ್ಕೆ ಹಿಂದಿರುಗುವ ಸಾಧ್ಯತೆಯಿದೆ.