ಅಂಡರ್​-19 ಮಹಿಳಾ ಟಿ20 ವಿಶ್ವಕಪ್: ದ.ಆಫ್ರಿಕಾ ವಿರುದ್ಧ ಭಾರತಕ್ಕೆ ಭರ್ಜರಿ ಜಯ

ಭಾರತೀಯ ಮಹಿಳಾ ಕ್ರಿಕೆಟ್‌ ತಂಡ ಅದ್ಭುತ ಪ್ರದರ್ಶನ ನೀಡಿ ಹರಿಣಗಳ ವಿರುದ್ಧ ವಿಜಯ ಸಾಧಿಸಿತು. ಶ್ವೇತಾ ಸೆಹ್ರಾವತ್​ 57 ಎಸೆತದಲ್ಲಿ 92 ರನ್​ ಗಳಿಸಿ ಗೆಲುವಿನ ರುವಾರಿಯಾದರು.

ಬೆನೊನಿ (ದಕ್ಷಿಣ ಆಫ್ರಿಕಾ): ಚೊಚ್ಚಲ ಆವೃತ್ತಿಯ ಅಂಡರ್​-19 ಮಹಿಳಾ ಟಿ20 ವಿಶ್ವಕಪ್​ನಲ್ಲಿ ಭಾರತ ಮೊದಲ ಗೆಲುವು ದಾಖಲಿಸಿತು. ಆರಂಭಿಕರಾದ ಶ್ವೇತಾ ಸೆಹ್ರಾವತ್​, ನಾಯಕಿ ಶಫಾಲಿ ವರ್ಮಾ ಅವರ ಅದ್ಭುತ ಬ್ಯಾಟಿಂಗ್‌ ಬಲದಿಂದ ಭಾರತ ಮಹಿಳೆಯರ ತಂಡ 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ. ಟಾಸ್ ಗೆದ್ದು ಮೊದಲು ಬ್ಯಾಟ್​ ಮಾಡಿದ ದಕ್ಷಿಣ ಆಫ್ರಿಕಾ ಮಹಿಳೆಯರು ನಿಗದಿತ 20 ಓವರ್​ಗಳಲ್ಲಿ 5 ವಿಕೆಟ್​ಗೆ 166 ರನ್​ ಗಳಿಸಿದರು. ಈ ಗುರಿ ಬೆನ್ನತ್ತಿದ ಭಾರತೀಯ ವನಿತೆಯರು 16.3 ಓವರ್​ಗಳಲ್ಲಿ 3 ವಿಕೆಟ್​ ಕಳೆದುಕೊಂಡು 170 ರನ್​ ಗಳಿಸಿ ವಿಜಯದ ಕೇಕೆ ಹಾಕಿದರು.

ದಕ್ಷಿಣ ಆಫ್ರಿಕಾದ ಸಿಮೋನ್​ ಲೊರೆನ್ಸ್​ ಭಾರತದ ಬೌಲರ್​ಗಳನ್ನು ಕೆಚ್ಚೆದೆಯಿಂದ ಎದುರಿಸಿ 44 ಎಸೆತಗಳಲ್ಲಿ 61 ರನ್​ ಗಳಿಸಿದರು. ಉಳಿದಂತೆ, ಮ್ಯಾಡಿಸನ್ ಲ್ಯಾಂಡ್ಸ್ಮನ್​ 17 ಎಸೆತಗಳಲ್ಲಿ 32 ರನ್​ ಮತ್ತು ಎಲಾಂಡ್ರಿ ರೆನ್ಸ್‌ಬರ್ಗ್ 13 ಎಸೆತಗಳಲ್ಲಿ 23 ರನ್​ ಪಡೆದುಕೊಂಡರು. ಭಾರತದ ಆಟಗಾರ್ತಿ ಶ್ವೇತಾ ಸೆಹ್ರಾವತ್​ 57 ಎಸೆತದಲ್ಲಿ 92 ರನ್​ ಗಳಿಸುವುದರ ಮೂಲಕ ಇಂಡಿಯಾ ಗೆಲುವಿಗೆ ಕಾರಣರಾದರು. ತಂಡದ ನಾಯಕಿ ಶಫಾಲಿ ವರ್ಮಾ ಜವಾಬ್ದಾರಿಯುತವಾಗಿ ಆಡಿ 16 ಎಸೆತಗಳಲ್ಲಿ 45 ರನ್ ಕಲೆ ಹಾಕಿದರು.

ಭಾರತದ ಪರವಾಗಿ ಬೌಲಿಂಗ್​ ಮಾಡಿದ ಶೆಫಾಲಿ ವರ್ಮಾ 2 ವಿಕೆಟ್​ ಪಡೆದರೆ, ಸೋನಾಂ ಯಾದವ್​ ಮತ್ತು ಪರ್ಸಾನಿ ಚೋಪ್ರಾ ತಲಾ ಒಂದೊಂದು ವಿಕೆಟ್ ಕಿತ್ತರು. ದಕ್ಷಿಣ ಆಫ್ರಿಕಾದ ಬೌಲರ್​ ಶೇಶ್ನಿ ನಾಯ್ಡು, ಮೈನೆ ಸ್ಮಿತ್​, ಮತ್ತು ಮ್ಯಾಡಿಸನ್​ ಲ್ಯಾಂಡ್ಸ್ಮನ್​ ತಲಾ ಒಂದೊಂದು ವಿಕೆಟ್ ಬಾಚಿಕೊಂಡರು.

ಸಂಕ್ಷಿಪ್ತ ಸ್ಕೋರ್​ ವಿವರ: ದಕ್ಷಿಣ ಆಫ್ರಿಕಾ 20 ಓವರ್​ಗಳಲ್ಲಿ 5 ವಿಕೆಟ್​ಗೆ 166 ರನ್ (ಸಿಮೋನ್​ ಲೊರೆನ್ಸ್ (ಔಟ್​ ಆಗದೆ 61 ರನ್​), ಮ್ಯಾಡಿಸನ್ ಲ್ಯಾಂಡ್ಸ್ಮನ್(32), ಎಲಾಂಡ್ರಿ ರೆನ್ಸ್‌ಬರ್ಗ್(23), ಕರಾಬೊ ಮೆಸೊ(ಔಟಾಗದೆ 19 ರನ್​), ಮೈನೆ ಸ್ಮಿತ್( ಔಟ್​ ಆಗದೆ 16 ರನ್​ ​), ಕೈಲಾ ರೈನೇಕೆ(11) ಶಫಾಲಿ ವರ್ಮಾ(2/31), ಸೋನಾಂ ಯಾದವ್​( 1/47), ಪರ್ಸಾನಿ ಚೋಪ್ರಾ(1/15) ಭಾರತ 16.3 ಓವರ್​ಗಳಲ್ಲಿ 3 ವಿಕೆಟ್​ಗೆ 170 ರನ್​ ( ಶ್ವೇತಾ ಸೆಹ್ರಾವತ್ (92), ಶಫಾಲಿ ವರ್ಮಾ(45), ಗೊಂಗಾಡಿ ತ್ರಿಶಾ(15), ಸೌಮ್ಯ ತಿವಾರಿ(10), ಶೇಶ್ನಿ ನಾಯ್ಡು(1/32), ಮೈನೆ ಸ್ಮಿತ್​(1/15), ಮ್ಯಾಡಿಸನ್​ ಲ್ಯಾಂಡ್ಸ್ಮನ್(1/20)

ಇದನ್ನೂ ಓದಿ:ಪಾಕ್​ ವಿರುದ್ಧ ಏಕದಿನ ಸರಣಿ ಗೆದ್ದ ನ್ಯೂಜಿಲ್ಯಾಂಡ್​: ತವರಿನಲ್ಲಿ ಪಾಕಿಸ್ತಾನಕ್ಕೆ ಸತತ ಸರಣಿ ಸೋಲು