ಮುಂಬೈ(ಮಹಾರಾಷ್ಟ್ರ): ಇಂಗ್ಲೆಂಡ್ ವಿರುದ್ಧದ ಮೂರು ಪಂದ್ಯಗಳ ಟಿ20 ಸರಣಿಯನ್ನು ಜೀವಂತವಾಗಿರಿಸಿಕೊಳ್ಳಲು ನಾಳೆ (ಡಿ.9) ನಡೆಯಲಿರುವ ಪಂದ್ಯವನ್ನು ಹರ್ಮನ್ಪ್ರೀತ್ ಕೌರ್ ನಾಯಕತ್ವದ ವನಿತೆಯರ ತಂಡ ಗೆಲ್ಲಲೇಬೇಕಿದೆ. ಮೊದಲ ಪಂದ್ಯದಲ್ಲಿ ಧಾರಾಳವಾಗಿ ರನ್ ಬಿಟ್ಟುಕೊಟ್ಟು ಮತ್ತು ಕ್ಷೇತ್ರರಕ್ಷಣೆಯಲ್ಲಾದ ಎಡವಟ್ಟುಗಳನ್ನು ತಿದ್ದಿಕೊಂಡು ಜಯದ ಲಯಕ್ಕೆ ಮರಳಲೇಬೇಕಿದೆ.
ಮುಂಬೈನ ವಾಂಖೆಡೆಯಲ್ಲಿ ನಡೆದ ಮೊದಲ ಟಿ20ಯಲ್ಲಿ ಅಬ್ಬರದ ಬ್ಯಾಟಿಂಗ್ ಮಾಡಿದ ಆಂಗ್ಲ ವನಿತೆಯರು 198 ರನ್ಗಳ ಬೃಹತ್ ಗುರಿ ನೀಡಿದ್ದರು. ಇದನ್ನು ಬೆನ್ನತ್ತಿದ ಭಾರತ 38 ರನ್ಗಳ ಅಂತರದಿಂದ ಸೋಲನುಭವಿಸಿತ್ತು. ಭಾರತದ ವಿರುದ್ಧ ಇಂಗ್ಲೆಂಡ್ ಆಡಿದ 28 ಟಿ20 ಪಂದ್ಯಗಳಲ್ಲಿ 21ನೇ ಮತ್ತು ಭಾರತದಲ್ಲೇ ನಡೆದ 10 ಪಂದ್ಯದಲ್ಲಿ ಪಡೆದ 8ನೇ ಗೆಲುವು ಇದಾಗಿದೆ. 1-0ಯ ಮುನ್ನಡೆ ಪಡೆದಿರುವ ಇಂಗ್ಲೆಂಡ್ ವನಿತೆಯರು ಎರಡನೇ ಪಂದ್ಯ ಗೆದ್ದು ಸರಣಿ ಕೈವಶದ ಚಿಂತನೆಯಲ್ಲಿದ್ದಾರೆ.
ಬೌಲರ್ಗಳು ದುಬಾರಿ:ಇಂಗ್ಲೆಂಡ್ ಬ್ಯಾಟರ್ಗಳನ್ನು ಸ್ಪಿನ್ ಬೌಲಿಂಗ್ನಿಂದ ಕಟ್ಟಿಹಾಕುವ ಯೋಜನೆ ರೂಪಿಸಿದ್ದ ಹರ್ಮನ್ಪ್ರೀತ್ ಲೆಕ್ಕಾಚಾರ ಮೊದಲ ಪಂದ್ಯದಲ್ಲಿ ಬುಡಮೇಲಾಗಿತ್ತು. ಪಾದಾರ್ಪಣೆ ಪಂದ್ಯವನ್ನಾಡುತ್ತಿದ್ದ ಶ್ರೇಯಾಂಕಾ ಪಾಟೀಲ್ (2/44) ಮತ್ತು ಸೈಕಾ ಇಶಾಕ್ (1/38) ದುಬಾರಿಯಾಗಿದ್ದರು. ಡ್ಯಾನಿ ವ್ಯಾಟ್, ನ್ಯಾಟ್ ಸ್ಕಿವರ್ ಬ್ರಂಟ್ ವೇಗದ ಅರ್ಧಶತಕ ಮತ್ತು ಆಮಿ ಜೋನ್ಸ್ ಉತ್ತಮ ಇನ್ನಿಂಗ್ಸ್ ಆಡಿದ್ದರು. ಇವರನ್ನು ಕಟ್ಟಿಹಾಕಲು ಭಾರತದ ಬೌಲರ್ಗಳಿಗೆ ಸಾಧ್ಯವಾಗಲಿಲ್ಲ. ನಾಳಿನ ಪಂದ್ಯದಲ್ಲಿ ಈ ಮೂವರ ಜೊತೆಗೆ ಇತರೆ ಆಟಗಾರ್ತಿಯರು ಅಬ್ಬರಿಸದಂತೆ ನಿಯಂತ್ರಿಸಬೇಕಿದೆ.
ಜೊತೆಯಾಟದ ಕೊರತೆ: ಭಾರತಕ್ಕೆ ಚೇಸಿಂಗ್ನಲ್ಲಿ ಜೊತೆಯಾಟದ ಕೊರತೆ ಆಗಿತ್ತು. ಆರಂಭಿಕ ಆಟಗಾರ್ತಿ ಶಫಾಲಿ ವರ್ಮಾ ಅರ್ಧಶತಕದ ಇನ್ನಿಂಗ್ಸ್ ಆಡಿದ್ದರು. ಆದರೆ ಅವರೊಂದಿಗೆ ಯಾರೂ ಜೊತೆಯಾಟ ಮಾಡಲಿಲ್ಲ. ಇದು ಬೃಹತ್ ಗುರಿ ಬೆನ್ನತ್ತುವ ಭಾರತದ ಹಿನ್ನಡೆಗೆ ಕಾರಣವಾಯಿತು. ಇಂಗ್ಲೆಂಡ್ ವೇಗದ ಬೌಲರ್ಗಳು ಭಾರತದ ಬ್ಯಾಟರ್ಗಳ ಮೇಲೆ ಒತ್ತಡ ಹೇರುವಲ್ಲಿ ಯಶಸ್ವಿಯಾದರು.