ಮ್ಯಾನ್ ಆಫ್ ದಿ ಮ್ಯಾಚ್ ಅವಾರ್ಡ್ ಅವನಿಗೆ ಸಿಗುತ್ತದೆ ಅಂದುಕೊಂಡಿದ್ದೆ.. ಆಲ್‌ರೌಂಡರ್‌ ಹಾರ್ದಿಕ್ ಪಾಂಡ್ಯ

ಮ್ಯಾನ್ ಆಫ್ ದಿ ಮ್ಯಾಚ್​ ಅವಾರ್ಡ್​ ಬಗ್ಗೆ ಮಾತನಾಡಿರುವ ಹಾರ್ದಿಕ್​ ಪಾಂಡ್ಯ, ಈ ಪ್ರಶಸ್ತಿ ನನಗೆ ಕೊಡುತ್ತಾರೆ ಎಂದು ನಾನು ನಿರೀಕ್ಷಿಸಿರಲಿಲ್ಲ. ಈ ಅವಾರ್ಡ್​ ಟಿ. ನಟರಾಜನ್​ಗೆ ಸಿಗುತ್ತದೆ ಎಂದು ಕೊಂಡಿದ್ದೆ..

ಸಿಡ್ನಿ: ಟೀಂ ಇಂಡಿಯಾ ಆಸ್ಟ್ರೇಲಿಯಾ ಪ್ರವಾಸದಲ್ಲಿದೆ. ಏಕದಿನ ಸರಣಿ ಸೋಲು ಕಂಡ ನಂತರ ಪುಟದೆದ್ದ ಕೊಹ್ಲಿ ಪಡೆ ಟಿ-20 ಸರಣಿಯನ್ನ ತನ್ನ ಕೈ ವಶ ಮಾಡಿಕೊಂಡಿದೆ.

3 ಪಂದ್ಯಗಳ ಟಿ-20 ಸರಣಿಯಲ್ಲಿ ಟೀಂ ಇಂಡಿಯಾ ಆಡಿದ ಎರಡು ಪಂದ್ಯಗಳಲ್ಲಿ ಜಯ ಸಾಧಿಸುವ ಮೂಲಕ ಸರಣಿ ಗೆದ್ದು ಆಸೀಸ್‌ ವಿರುದ್ಧ ಸೇಡು ತೀರಿಸಿಕೊಂಡಿದೆ. ಎರಡು ಪಂದ್ಯಗಳಲ್ಲಿ ಕೊಹ್ಲಿ ಬಾಯ್ಸ್ ಕಾಂಗರೂ ಪಡೆ ಮೇಲೆ ಆರ್ಭಟ ತೋರಿದೆ. ಎರಡನೇ ಪಂದ್ಯದಲ್ಲಿ 195 ರನ್​ಗಳ ಬೃಹತ್​ ಮೊತ್ತ ಬೆನ್ನಟ್ಟಿದ ಭಾರತ ತಂಡ ಅಬ್ಬರದ ಬ್ಯಾಟಿಂಗ್​ ಮಾಡಿ ಪಂದ್ಯವನ್ನು ತನ್ನದಾಗಿಸಿಕೊಂಡಿತು.

ಈ ಪಂದ್ಯದಲ್ಲಿ ಜಬರ್ದಸ್ತ್ ಬ್ಯಾಟಿಂಗ್​ ಮಾಡಿದ ಹಾರ್ದಿಕ್ ಪಾಂಡ್ಯ ಕೆವಲ 22 ಎಸತಗಳಲ್ಲಿ 42 ರನ್​​ ಸಿಡಿಸಿ ಗೆಲುವಿನ ರೂವಾರಿಯಾದರು. ಹಾಗೆಯೇ ಮ್ಯಾನ್​ ಆಫ್​ ದಿ ಮ್ಯಾಚ್​ ಅವಾರ್ಡ್ ಕೂಡ ಪಡೆದುಕೊಂಡರು.

ಮ್ಯಾನ್ ಆಫ್ ದಿ ಮ್ಯಾಚ್​ ಅವಾರ್ಡ್​ ಬಗ್ಗೆ ಮಾತನಾಡಿರುವ ಹಾರ್ದಿಕ್​ ಪಾಂಡ್ಯ, ಈ ಪ್ರಶಸ್ತಿ ನನಗೆ ಕೊಡುತ್ತಾರೆ ಎಂದು ನಾನು ನಿರೀಕ್ಷಿಸಿರಲಿಲ್ಲ. ಈ ಅವಾರ್ಡ್​ ಟಿ. ನಟರಾಜನ್​ಗೆ ಸಿಗುತ್ತದೆ ಎಂದು ಕೊಂಡಿದ್ದೆ ಎಂದು ಹೇಳಿದ್ದಾರೆ.

"ಪ್ರಸ್ತುತಿ ಸಮಾರಂಭದಲ್ಲಿ ಟಿ. ನಟರಾಜನ್ ಮ್ಯಾನ್ ಆಫ್ ದಿ ಮ್ಯಾಚ್ ಎಂದು ನಾನು ಭಾವಿಸಿದ್ದೆ. ಆದರೆ, ಮ್ಯಾನ್ ಆಫ್ ದಿ ಮ್ಯಾಚ್​ ಎಂದು ನನ್ನನ್ನು ಘೋಷಿಸಿದಾಗ ಆಶ್ಚರ್ಯವಾಯಿತು, ಈ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದ ಟಿ. ನಟರಾಜನ್ 4 ಓವರ್​ಗಳಲ್ಲಿ ಕೇವಲ 20 ರನ್​ ನೀಡಿ ಎರಡು ಪ್ರಮುಖ ವಿಕೆಟ್​ ಪಡೆದಿದ್ದರು. ಆಸ್ಟ್ರೇಲಿಯಾ ತಂಡ 200ರ ಗಡಿ ದಾಟದ ಹಾಗೇ ಕಟ್ಟಿಹಾಕುವಲ್ಲಿ ಅವರ ಪಾತ್ರ ದೊಡ್ಡದಿತ್ತು. ಹಾಗಾಗಿ ಈ ಪ್ರಶಸ್ತಿ ಅವರಿಗೆ ಸಿಗುತ್ತದೆ ಎಂದುಕೊಂಡಿದ್ದೆ ಎಂದು ಅವರು ಹೇಳಿದ್ದಾರೆ.

"ನಿಜ ಹೇಳಬೇಕೆಂದರೆ, ನಾನು ಅವನ ಬಗ್ಗೆ ಪ್ರಭಾವಿತನಾಗಿದ್ದೇನೆ. ಯಾಕೆಂದರೆ, ಅವನು ಎಲ್ಲವನ್ನು ಸರಳವಾಗಿ ತೆಗೆದುಕೊಳ್ಳುತ್ತಾನೆ. ಹಾಗೆಯೇ ಏನಾದ್ರೂ ಸಲಹೆ ನೀಡಿದರು ಅದನ್ನು ಸಹ ಗಂಭೀರವಾಗಿ ತೆಗೆದುಕೊಳ್ಳುತ್ತಾನೆ. ಅವನಿಗೆ ನೀವು ಯಾರ್ಕರ್​ ಬೌಲ್​ ಮಾಡು ಅಂದರು ಮಾಡುತ್ತಾನೆ, ನಿಧಾನವಾಗಿ ಬೌಲ್ ಮಾಡಲು ಹೇಳಿ, ಅವನು ಅದನ್ನು ಮಾಡುತ್ತಾನೆ. ಅವನು ಒಬ್ಬ ಅದ್ಭುತ ಬೌಲರ್​, ಅವನನ್ನು ಅನುಕೂಲಕ್ಕೆ ತಕ್ಕ ಹಾಗೆ ಬಳಕೆ ಮಾಡಬಹುದು ಎಂದು ನಟರಾಜನ್ ಬಗ್ಗೆ ಪಾಂಡ್ಯ ಮೆಚ್ಚುಗೆಯ ಮಾತಾಡಿದರು.