ಪಂದ್ಯದಲ್ಲಿ ಆರಂಭಿಕರ ಪಾತ್ರ ನಿರ್ಣಾಯಕ, ಒತ್ತಡ ಹೇರಲ್ಲ: ರಹಾನೆ

ವಿರಾಟ್‌ ಕೊಹ್ಲಿ ಅನುಪಸ್ಥಿತಿಯಲ್ಲಿ ತಂಡ ಮುನ್ನಡೆಸುವ ಹೊಣೆ ಅಜಿಂಕ್ಯ ರಹಾನೆ ಹೆಗಲಿಗೆ ಬಿದ್ದಿದೆ. ಸರಣಿಯ ಮೊದಲ ಪಂದ್ಯದ ಸೋಲಿನ ತಿರುಗೇಟು ನೀಡಲು ರಹಾನೆ ನೇತೃತ್ವದ ಟೀಂ ಇಂಡಿಯಾ ಸಜ್ಜಾಗಿದೆ.

ಮೆಲ್ಬೋರ್ನ್​​​:ಆಸ್ಟ್ರೇಲಿಯಾ ವಿರುದ್ಧದಗುಲಾಬಿ ಚೆಂಡು ಪಂದ್ಯದಲ್ಲಿ ಅತ್ಯಂತ ಕಳಪೆ ಪ್ರದರ್ಶನ ತೋರಿದ ಆರಂಭಿಕ ಆಟಗಾರ ಪೃಥ್ವಿ ಶಾ ಬದಲಿಗೆ ಶುಭ್ಮನ್​ ಗಿಲ್​​ ಕಣಕ್ಕಿಳಿಯಲಿದ್ದಾರೆ.

ಇನ್ನಿಂಗ್ಸ್​ ಆರಂಭಿಸುವ ಆಟಗಾರರ ಪಾತ್ರ ನಿರ್ಣಾಯಕವಾಗಿರಲಿದೆ. ಹೀಗಾಗಿ, ಮಾಯಾಂಕ್​ ಅಗರ್ವಾಲ್​ ಮತ್ತು ಶುಭ್ಮನ್​ ಗಿಲ್ ​​​ಮೇಲೆ ಯಾವುದೇ ಒತ್ತಡ ಹೇರುವುದಿಲ್ಲ ಎಂದು ಭಾರತ ತಂಡದ ನಾಯಕ ಅಜಿಂಕ್ಯ ರಹಾನೆ ಹೇಳಿದರು.

ಮೊದಲ ಅಹರ್ನಿಶಿ ಟೆಸ್ಟ್ ಪಂದ್ಯದಲ್ಲಿ ಉತ್ತಮ ಆರಂಭ ದೊರೆಯದ ಕಾರಣ ಭಾರತ ತಂಡ 8 ವಿಕೆಟ್​​ಗಳ ಸೋಲನುಭವಿಸಿತು. ಮೊದಲ ಟೆಸ್ಟ್​ನ ಎರಡೂ ಇನ್ನಿಂಗ್ಸ್​​​ಗಳಲ್ಲಿ ಪೃಥ್ವಿ ಶಾ ರನ್ ಗಳಿಸಲು ಹೆಣಗಾಡಿದರು. ಅದಲ್ಲದೆ, ಅಭ್ಯಾಸ ಪಂದ್ಯದಲ್ಲೂ ಬ್ಯಾಟಿಂಗ್​​ನಲ್ಲಿ ವೈಫಲ್ಯ ಕಂಡಿದ್ದರು.

ಆದರೂ ಆಡುವ 11ರ ಬಳಗದಲ್ಲಿ ಆತ ಕಾಣಿಸಿಕೊಂಡಾಗ ತಂಡದ ವಿರುದ್ಧ ತೀವ್ರ ಟೀಕೆಗಳು ವ್ಯಕ್ತವಾಗಿದ್ದವು. ಮೊದಲ ಟೆಸ್ಟ್​​ನಲ್ಲಿ ಮಯಾಂಕ್​ ಅಗರ್ವಾಲ್​ ಉತ್ತಮ ಪ್ರದರ್ಶನ ತೋರದಿದ್ದರೂ ಕೊಂಚ ಸಮಯ ವಿಕೆಟ್​ ಕಾಪಾಡಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದರು. ಶಾ ವಿಫಲವಾದ ಕಾರಣ ಶುಭ್ಮನ್​ ಗಿಲ್​ ಕಣಕ್ಕಿಳಿಯಲಿದ್ದಾರೆ.

ಆಸ್ಟ್ರೇಲಿಯಾ ಮಾತ್ರವಲ್ಲ, ಬೇರೆಡೆಯೂ ಆರಂಭಿಕ ಆಟಗಾರನ ಪಾತ್ರ ನಿರ್ಣಾಯಕ. ತಮ್ಮ ಆರಂಭಿಕ ಆಟಗಾರರಿಗೆ ಸಾಕಷ್ಟು ಸ್ವಾತಂತ್ರ್ಯ ಕೊಟ್ಟಿದ್ದೇನೆ. ನಾಳೆಯ ಪಂದ್ಯದಲ್ಲಿ ಅವರ ನೈಸರ್ಗಿಕ ಆಟ ನೋಡುವ ಭರವಸೆ ಹೊಂದಿದ್ದೇನೆ. ಹೀಗಾಗಿ, ಒತ್ತಡ ಹೇರುತ್ತಿಲ್ಲ ಎಂದರು.

ವಿರಾಟ್​ ಕೊಹ್ಲಿ ಅನುಪಸ್ಥಿತಿ ನಿಜಕ್ಕೂ ತಂಡಕ್ಕೆ ಕಾಡಲಿದೆ. ಅವರ ಜವಾಬ್ದಾರಿಯನ್ನು ನಾನು ವಹಿಸಿಕೊಂಡಿದ್ದೇನೆ. ಯಾವುದೇ ಧಕ್ಕೆ ಬಾರದಂತೆ ಪಂದ್ಯ ಗೆಲ್ಲಿಸಿಕೊಡಲು ಪ್ರಯತ್ನ ಮಾಡುತ್ತೇವೆ. ಆಟಗಾರರೂ ಉತ್ತಮ ಪ್ರದರ್ಶನ ತೋರುವ ವಿಶ್ವಾಸವಿದೆ ಎಂದು ರಹಾನೆ ಹೇಳಿದರು.

ಆಸ್ಟ್ರೇಲಿಯಾ ವಿರುದ್ಧ ಮೆಲ್ಬೋರ್ನ್​ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಎರಡನೇ ಪಂದ್ಯ ಮತ್ತು ಬಾಕ್ಸಿಂಗ್​ ಡೇ ಟೆಸ್ಟ್​ ಪಂದ್ಯ ನಾಳೆ (ಡಿ.26) ಬೆಳಿಗ್ಗೆ ಆರಂಭವಾಗಲಿದೆ.