IND vs SA 2nd Test: ದಕ್ಷಿಣ ಆಫ್ರಿಕಾ ಗೆಲುವಿಗೆ 240 ರನ್ ಗುರಿ ನೀಡಿದ ಭಾರತ

ದಕ್ಷಿಣ ಆಫ್ರಿಕಾ ವಿರುದ್ಧದ ಎರಡನೇ ಟೆಸ್ಟ್​​​ ಪಂದ್ಯದ ಎರಡನೇ ಇನ್ನಿಂಗ್ಸ್​​​ನಲ್ಲಿ 266 ರನ್​ಗಳಿಗೆ ಆಲೌಟ್​ ಆಗಿರುವ ರಾಹುಲ್ ಪಡೆ ಹರಿಣಗಳ ಗೆಲುವಿಗೆ 240 ರನ್​ಗಳ ಟಾರ್ಗೆಟ್ ನೀಡಿದೆ.

ಜೋಹಾನ್ಸ್​ಬರ್ಗ್​(ದಕ್ಷಿಣ ಆಫ್ರಿಕಾ):ಹರಿಣಗಳ ವಿರುದ್ಧ ನಡೆಯುತ್ತಿರುವ ಎರಡನೇ ಟೆಸ್ಟ್​​ ಪಂದ್ಯದ 2ನೇ ಇನ್ನಿಂಗ್ಸ್​​ನಲ್ಲಿ ಟೀಂ ಇಂಡಿಯಾ 266 ರನ್​ಗಳಿಗೆ ಆಲೌಟ್​ ಆಗಿದೆ. ಈ ಮೂಲಕ ಎದುರಾಳಿ ತಂಡದ ಗೆಲುವಿಗೆ 240 ರನ್​ಗಳ ಟಾರ್ಗೆಟ್​​ ನೀಡಿದೆ.

ಆತಿಥೇಯ ದಕ್ಷಿಣ ಆಫ್ರಿಕಾ ವಿರುದ್ಧ ಇಲ್ಲಿನ ವಾಂಡರರ್ಸ್​​ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ 2ನೇ ಪಂದ್ಯದಲ್ಲಿ ಚೇತೇಶ್ವರ್ ಪೂಜಾರಾ(53), ಅಂಜಿಕ್ಯ ರಹಾನೆ(58) ಹಾಗೂ ಹನುಮ ವಿಹಾರಿ (40*)ರನ್​ಗಳ ನೆರವಿನಿಂದ 10ವಿಕೆಟ್​ ​ನಷ್ಟಕ್ಕೆ 266 ರನ್ ​ಗಳಿಗೆ ಆಲೌಟ್​​ ಆಗಿದ್ದು, ಈ ಮೂಲಕ ಎದುರಾಳಿ ತಂಡಕ್ಕೆ 240 ರನ್​ಗಳ ಗುರಿ ನೀಡಿದೆ.

ನಿನ್ನೆ 85 ರನ್ ​ಗಳಿಸುವಷ್ಟರಲ್ಲಿ ಪ್ರಮುಖ ಎರಡು ವಿಕೆಟ್ ಕಳೆದುಕೊಂಡಿದ್ದ ಭಾರತ ಇಂದು ಬ್ಯಾಟಿಂಗ್ ಮುಂದುವರೆಸಿತು. 35 ರನ್​ಗಳಿಕೆ ಮಾಡಿದ್ದ ಪೂಜಾರಾ ಹಾಗೂ 11 ರನ್ ​ಗಳಿಕೆ ಮಾಡಿದ್ದ ರಹಾನೆ ಇಂದು ಬ್ಯಾಟಿಂಗ್ ಮುಂದುವರೆಸಿದರು. ಈ ಜೋಡಿ ಆರಂಭದಲ್ಲಿ ದಕ್ಷಿಣ ಆಫ್ರಿಕಾ ಬೌಲರ್​ಗಳನ್ನು ಸುಲಭವಾಗಿ ಎದುರಿಸಿ, ಶತಕದ ಜೊತೆಯಾಟ ನೀಡಿದರು.

53 ರನ್​ಗಳಿಕೆ ಮಾಡಿ ಬ್ಯಾಟ್​ ಮಾಡ್ತಿದ್ದ ವೇಳೆ ಚೇತೇಶ್ವರ್ ಪೂಜಾರಾ ವೇಗಿ ರಬಾಡಾ ಬೌಲಿಂಗ್​ನಲ್ಲಿ ಎಲ್​ಬಿ ಬಲೆಗೆ ಬಿದ್ದರೆ, 58 ರನ್​ಗಳಿಕೆ ಮಾಡಿದ್ದ ರಹಾನೆ ಕೂಡ ಅದೇ ಓವರ್​ನಲ್ಲಿ ವಿಕೆಟ್​ ಒಪ್ಪಿಸಿದರು. ಆ ಬಳಿಕ ವಿಕೆಟ್ ಕೀಪರ್​ ರಿಷಭ್ ಪಂತ್ ಕೂಡ ರಬಾಡಾ ಓವರ್​​ನಲ್ಲೇ ಶೂನ್ಯಕ್ಕೆ ವಿಕೆಟ್​ ಒಪ್ಪಿಸಿದರು. 16 ರನ್​ ಗಳಿಸಿ ಬ್ಯಾಟ್​ ಮಾಡ್ತಿದ್ದ ಅಶ್ವಿನ್​ ವಿಕೆಟ್ ಪಡೆದುಕೊಳ್ಳುವಲ್ಲಿ ಲುಂಗಿ ಎಗ್ಡಿ ಯಶಸ್ವಿಯಾಗಿದ್ದು, ಹರಿಣಗಳ ತಂಡಕ್ಕೆ ಮೇಲುಗೈ ತಂದುಕೊಟ್ಟರು.

ತಂಡಕ್ಕೆ ಆಸರೆಯಾದ ಹನುಮ-ಶಾರ್ದೂಲ್​

ಮೇಲಿಂದ ಮೇಲೆ ಟೀಂ ಇಂಡಿಯಾ ವಿಕೆಟ್​ ಕಳೆದುಕೊಳ್ಳುತ್ತಿದ್ದರೂ, ಮಧ್ಯಮ ಕ್ರಮಾಂಕದಲ್ಲಿ ಹನುಮ ವಿಹಾರಿ ಹಾಗೂ ಶಾರ್ದೂಲ್ ಠಾಕೂರ್ ತಂಡದ ಮೊತ್ತ ಹೆಚ್ಚಿಸುವಲ್ಲಿ ಯಶಸ್ವಿಯಾದರು. ಹನುಮ ವಿಹಾರಿ ಅಜೇಯ 40 ರನ್​ಗಳಿಕೆ ಮಾಡಿದ್ರೆ, ಶಾರ್ದೂಲ್ ಠಾಕೂರ್​ 28 ರನ್​ಗಳಿಸಿದರು. ಉಪನಾಯಕ ಬುಮ್ರಾ 7ರನ್​ಗಳಿಕೆ ಮಾಡಿ ವಿಕೆಟ್​ ಒಪ್ಪಿಸಿದರು.

ಎರಡನೇ ಇನ್ನಿಂಗ್ಸ್​​ನಲ್ಲಿ ದಕ್ಷಿಣ ಆಫ್ರಿಕಾದ ಪರ ರಬಾಡಾ, ನಿಗ್ಡಿ ಹಾಗೂ ಜಾನ್ಸನ್ ತಲಾ 3 ವಿಕೆಟ್ ಪಡೆದುಕೊಂಡರೆ, ಒಲಿವಿರ್ 1 ವಿಕೆಟ್​ ಕಬಳಿಸಿದರು. ಇದೀಗ 240 ರನ್​ಗಳ ಗುರಿ ಬೆನ್ನತ್ತಿರುವ ದಕ್ಷಿಣ ಆಫ್ರಿಕಾ ಟೀ ವಿರಾಮದ ವೇಳೆಗೆ ವಿಕೆಟ್​ ನಷ್ಟವಿಲ್ಲದೇ 34 ರನ್​ಗಳಿಕೆ ಮಾಡಿದ್ದು, ಮರ್ಕ್ರಾಮ್​ 24 ರನ್​ ಹಾಗೂ ಎಲ್ಗರ್​ 10ರನ್​ಗಳಿಸಿ, ಬ್ಯಾಟಿಂಗ್ ನಡೆಸಿದ್ದಾರೆ.