ಶ್ರೀಲಂಕಾ ವಿರುದ್ಧ 238 ರನ್​ಗಳ ಜಯ ಸಾಧಿಸಿದ ಭಾರತ; 2-0ಯಲ್ಲಿ ಸರಣಿ ಕ್ಲೀನ್ ಸ್ವೀಪ್

ಎಂ. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಭಾರತ ನೀಡಿದ್ದ 447 ರನ್​ಗಳ ಗುರಿ ಬೆನ್ನತ್ತಿದ ಪ್ರವಾಸಿ ಶ್ರೀಲಂಕಾ ತಂಡ ಕೇವಲ 208ರನ್​ಗಳಿಗೆ ಆಲೌಟ್ ಆಗುವ ಮೂಲಕ 238ರನ್​ಗಳ ಹೀನಾಯ ಸೋಲಿಗೆ ತುತ್ತಾಯಿತು.

ಬೆಂಗಳೂರು: ಸಂಘಟಿತ ಬೌಲಿಂಗ್ ದಾಳಿಯ ನೆರವಿನಿಂದ ಭಾರತ ತಂಡ ಶ್ರೀಲಂಕಾ ವಿರುದ್ಧದ ಅಹರ್ನಿಶಿ ಟೆಸ್ಟ್ ಪಂದ್ಯವನ್ನು 238ರನ್​ಗಳಿಂದ ಗೆಲುವು ಸಾಧಿಸಿ, ಸರಣಿಯನ್ನು 2-0ಯಲ್ಲಿ ಕ್ಲೀನ್​ ಸ್ವೀಪ್​ ಸಾಧಿಸಿದೆ.

ಭಾರತ ನೀಡಿದ್ದ 447 ರನ್​ಗಳ ಗುರಿ ಬೆನ್ನತ್ತಿದ ಪ್ರವಾಸಿ ಶ್ರೀಲಂಕಾ ತಂಡ ಕೇವಲ 208ರನ್​ಗಳಿಗೆ ಆಲೌಟ್ ಆಗುವ ಮೂಲಕ ಮತ್ತೊಂದು ಹೀನಾಯ ಸೋಲಿಗೆ ತುತ್ತಾಯಿತು.

ಬೃಹತ್ ಗುರಿಯನ್ನು ಬೆನ್ನತ್ತಿದ ಶ್ರೀಲಂಕಾ ತಂಡ ಮೊದಲ ಓವರ್​ನಲ್ಲೇ ಲಹಿರು ತಿರಿಮನ್ನೆ(0) ವಿಕೆಟ್ ಕಳೆದುಕೊಂಡು ಆಘಾತಕ್ಕೆ ಒಳಗಾಗಿತ್ತು. 2ನೇ ದಿನದಂತ್ಯಕ್ಕೆ 7 ಓವರ್​ಗಳಲ್ಲಿ 1 ವಿಕೆಟ್ ಕಳೆದುಕೊಂಡು 28 ರನ್​ಗಳಿಸಿದ್ದ ಪ್ರವಾಸಿ ತಂಡ, 3ನೇ ದಿನವಾದ ಇಂದು 2ನೇ ವಿಕೆಟ್​ಗೆ 97 ರನ್​ ಸೇರಿಸಿತು. 60 ಎಸೆತಗಳಲ್ಲಿ 8ಬೌಂಡರಿ ಸಹಿತ 54 ರನ್​ಗಳಿಸಿದ್ದ ಕುಸಾಲ್​ ಮೆಂಡಿಸ್​ ಔಟಾಗುತ್ತಿದ್ದಂತೆ ಲಂಕಾ ತಂಡದ ಪತನ ಆರಂಭವಾಯಿತು.

ನಂತರ ಬಂದತಂಗಹ ಮ್ಯಾಥ್ಯೂಸ್​(1), ಧನಂಜಯ ಡಿ ಸಿಲ್ವಾ(4), ನಿರೋಷನ್ ಡಿಕ್ವೆಲ್ಲಾ(12), ಅಸಲಂಕಾ(5), ಎಂಬುಲ್ದೇನಿಯಾ(2), ಸುರಂಗ ಲಕ್ಮಲ್(1) ವಿಶ್ವ ಫರ್ನಾಂಡೊ(2) ಭಾರತೀಯ ಬೌಲರ್​ಗಳ ದಾಳಿಗೆ ಉತ್ತರಿಸಲಾಗದೆ ಅಲ್ಪಮೊತ್ತಕ್ಕೆ ವಿಕೆಟ್​ ಒಪ್ಪಿಸಿದರು.

ಆದರೆ ನಾಯಕ ದಿಮುತ್ ಕರುಣರತ್ನೆ ಏಕಾಂಗಿ ಹೋರಾಟ ನಡೆಸಿ ವೃತ್ತಿ ಜೀವನದ 14ನೇ ಶತಕ ಸಿಡಿಸಿದರು. ಅವರು 174 ಎಸೆತಗಳಲ್ಲಿ 15 ಬೌಂಡರಿ ಸಹಿತ 107ರನ್​ಗಳಿಸಿ ಬುಮ್ರಾ ಬೌಲಿಂಗ್​ನಲ್ಲಿ ಬೌಲ್ಡ್ ಆದರು. ಇವರು ವಿಕೆಟ್​ ಒಪ್ಪಿಸಿದ 4 ರನ್​ ಅಂತದಲ್ಲಿ ಲಂಕಾ ತಂಡ ಕೊನೆಯ 4 ವಿಕೆಟ್ ಕಳೆದುಕೊಂಡಿತು.

ಟೀಮ್ ಇಂಡಿಯಾ ಪರ ರವಿಚಂದ್ರನ್ ಅಶ್ವಿನ್ 55ಕ್ಕೆ 4, ಜಸ್ಪ್ರೀತ್ ಬುಮ್ರಾ 23ಕ್ಕೆ3, ಅಕ್ಷರ್ ಪಟೇಲ್ 37ಕ್ಕೆ2, ಮತ್ತು ಜಡೇಜಾ 48ಕ್ಕೆ 1 ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.

ಭಾರತ ಮೊದಲ ಇನ್ನಿಂಗ್ಸ್​ನಲ್ಲಿ ಶ್ರೇಯಸ್​ ಅಯ್ಯರ್ ಅವರ 92 ರನ್​ಗಳ ನೆರವಿನಿಂದ 252 ರನ್​ಗಳಿಸಿದರೆ, ಇದಕ್ಕುತ್ತರವಾಗಿ ಶ್ರೀಲಂಕಾ 109ರನ್​ಗಳಿಸಿತ್ತು. 2ನೇ ಇನ್ನಿಂಗ್ಸ್​ನಲ್ಲಿ ಭಾರತ 303ರನ್​ಗಳಿಸಿ ಡಿಕ್ಲೇರ್ ಘೋಷಿಸಿ 447ರನ್​ಗಳ ಟಾರ್ಗೆಟ್​ ನೀಡಿತ್ತು.

ಇದನ್ನೂ ಓದಿ:ಆಸೀಸ್​ ವಿರುದ್ಧ ತವರಿನಲ್ಲೇ ಮುಖಭಂಗ ಅನುಭವಿಸಿದ ಪಾಕ್.. 148ಕ್ಕೆ ಆಲೌಟ್, 408 ರನ್​ಗಳ ಬೃಹತ್​ ಹಿನ್ನಡೆ..