ನವದೆಹಲಿ: ಇತ್ತೀಚೆಗೆ ಯುಎಇಯಲ್ಲಿ ಮುಗಿದ ಟಿ20 ವಿಶ್ವಕಪ್ನಲ್ಲಿ ಮುಖಾಮುಖಿಯಾಗಿದ್ದ ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ ಮತ್ತು ಪಾಕಿಸ್ತಾನ ನಡುವಿನ ಲೀಗ್ ಪಂದ್ಯ ವಿಶ್ವಕಪ್ ಇತಿಹಾಸದಲ್ಲೇ ಹೆಚ್ಚು ವೀಕ್ಷಣೆ ಪಡೆದ ಪಂದ್ಯ ಎಂಬ ದಾಖಲೆಗೆ ಪಾತ್ರವಾಗಿದೆ.
5 ವರ್ಷಗಳ ನಂತರ ಮರಳಿದ್ದ ಟಿ20 ವಿಶ್ವಕಪ್ ಕ್ರಿಕೆಟ್ ಅಭಿಮಾನಿಗಳಿಗೆ ರಸದೌತಣ ಉಣಬಡಿಸಿತ್ತು. ಜನಪ್ರಿಯ ತಂಡಗಳನ್ನೊಳಗೊಂಡ ಈ ಟೂರ್ನಮೆಂಟ್ಗೆ ಇದೇ ಮೊದಲ ಬಾರಿಗೆ ಯುಎಇ ಮತ್ತು ಒಮಾನ್ ದೇಶಗಳು ವೇದಿಕೆ ಒದಗಿಸಿದ್ದವು. ದೀರ್ಘಕಾಲದ ನಂತರ ಮರಳಿದ್ದ ಚುಟುಕು ಮಹಾಸಮರ ವೀಕ್ಷಣೆಯಲ್ಲೂ ದಾಖಲೆ ಬರೆದಿದೆ.
ಟೂರ್ನಿಯಲ್ಲಿ ಅತ್ಯಂತ ನಿರೀಕ್ಷಿತ ಭಾರತ-ಪಾಕಿಸ್ತಾನ ಪಂದ್ಯ ಸ್ಟಾರ್ ಇಂಡಿಯಾ ನೆಟ್‌ವರ್ಕ್‌ನಲ್ಲಿ ಭಾರತದಾದ್ಯಂತ 167 ಮಿಲಿಯನ್ ಮಂದಿಯನ್ನು ತಲುಪಿದ್ದು, ಸುಮಾರು 15.9 ಶತಕೋಟಿ(ಬಿಲಿಯನ್) ನಿಮಿಷಗಳ ವೀಕ್ಷಣೆ ಪಡೆದಿದೆ.
ಈ ಪಂದ್ಯ ಟಿ20 ವಿಶ್ವಕಪ್ ಇತಿಹಾಸದಲ್ಲೇ ಅತೀ ಹೆಚ್ಚು ವೀಕ್ಷಣೆ ಪಡೆದ ಪಂದ್ಯ ಎಂಬ ದಾಖಲೆಗೂ ಪಾತ್ರವಾಗಿದೆ. ಈ ಹಿಂದೆ, 2016ರ ಟಿ20 ವಿಶ್ವಕಪ್ನ ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಸೆಮಿಫೈನಲ್ ಪಂದ್ಯ ಗರಿಷ್ಠ ವೀಕ್ಷಣೆ ಪಡೆದ ಟಿ20 ಪಂದ್ಯವಾಗಿತ್ತು. ಇಡೀ ಟೂರ್ನಮೆಂಟ್ ಭಾರತದಲ್ಲಿ 115 ಶತಕೋಟಿ ವೀಕ್ಷಣೆ ಪಡೆದುಕೊಂಡಿದೆ ಎಂದು ಐಸಿಸಿ ತಿಳಿಸಿದೆ.
ಇದನ್ನೂ ಓದಿ: ಪದಾರ್ಪಣೆ ಪಂದ್ಯದಲ್ಲಿ ಅರ್ಧಶತಕ: ಶ್ರೇಯಸ್ ಅಯ್ಯರ್ ಪ್ರಶಂಸಿಸಿದ ರೋಹಿತ್